Read Khiamniungan Naga Yob 15 Bible Online

Yob 15 - Khiamniungan Naga bible

Yob 15

¹Ngiokeng jije, Yob! Ngiokeng jije!

³Ange khaiunia sauüh ni chitetsünli tsüchiteji tsüdekünai alesan tsünoikün ngio nousoüh meshen tsükiploji.

⁴Ni amongthat talu naito, tsakühtso Goa asu tsühate; apatü tsakühtso misao tsülou-e.

⁵Ni akausai ngio nouso khemai pamloau koweji. Ni ngiomon ngio nouso tsangkü wanau koweji.

⁶Ni phio-iau jü thaiutha ti pokü tsünoi; ni chitetsün ngio pungkü nou ni phiowani-iu.

⁷Chikü khako ni chong chet ta ni yangji süne? Tilai Goa nou king nouso shan nung taoko ni noikülü süne?

⁸Goa nou thatsantsün tao ni lulan süne? Khaiunia mongthat mongsai nou apemsa kothalu süne?

⁹Ni ngetsün to sauüh tsüngekü titso tsünoi.

¹⁰Sam mongthat mongsai samüh apo khako chettsün khaiuniahoi — khaiuthaio nouso ainou samüh ngeloum.

¹¹Goa nou nihau atsüomei nou kiuji; ni nung losaokü tiauta wanji? Samüh apa thaiutha ngio lüko tangsepkü ngiokiu-iu.

¹²Lüko ni sam tü amongsong amongmat nai langlutkü thapji.

¹³Ni Goa ko mongmatji naiuso apa shananji.

¹⁴Khaiunia ajantsoüh atsüoting sanglingkü noiau shio-e süne? ajantso Goa ko penkü noiau shio-e süne?

¹⁵Tiau, Goa nou apa hongthonso tü lüko tsümonglamji; apa khako ngüso lüko sanglingkü tsünoi.

¹⁶Khiam shiutsün khekkü khaiunia nou angei nou shiuji; ah, khaiunia nou ngiotsüo tsüde; khaiunia nou avesan tsünoi.

¹⁷Lo anglu, Yob, ngo tsande-e.

¹⁸Momgthat mongsai noitsün khaiuniahoi nou ngühau ngiotsüo nou tsande. Sübao ngüsoüh ngüso poso ainou ngelokü noiküla, naiuso ngüsoüh akaungio ti tsangpokkü tsütaiu.

¹⁹Ngüso goumchi gohmao khaiuniahoi ainou aalokü noiküla; ngüso Goa phamongko nou kankü khuwanau sau tsünoiküla.

²⁰Akausai khaiunia tsak sauüh amaohai thangmangji apa aakihlaiu lektso apa to omhe nai noi-e.

²¹Apa noukhan nai akuothe sang-i nousoüh vekü noi-e, naiuso apa aalokü noin ta yangtsün taoko kauhoi nou pha poji.

²²Anyakhem ainou thakhuau apa thaiutha ti ayang tsünoi, tititenai tso ai apa loatau sah nou taiukü noin;

²³naiuso mea hetsün letche nousoüh apa mea heau taiukü noin. Ashiau atao apa thaiutha anyakhem noin ta apaüh ngeji;

²⁴khemlepkü sapattsün nou oukongting nokpao tsak khekkü, apa tü pha pouau taiukü noin.

²⁵Sauüh Goa dongai pha piakekü saiuji, naiuso Akongteng lochiji, nung khaiunia ün akuo nungti noin.

²⁶Nung khaiunia abülom naiuso akhengshitsün noin; apa mongkong nou apa shikhao heloji naiuso Goa thako ehliau khaolaokü khuji.

²⁸Sauüh noknio nouso shioloji naiuso tsampao khuwantsün tsam nouso thalouji, nung khaiunia nou nung noin, lüko nung noknio nouso si tsam nouso ehli nou lotheane.

²⁹Apa memei atao laiukü tsünoi-e; apaüh taiutsün tiühtso athon tsüsao-e. Apa sotsom lüko tsüepshikü mowane,

³⁰naiuso apa anyakhem ainou tsüthakhu-e. Apato sübao paikia nouso in nou chethean, sübao paison nouso ahsheih nou shipkü khuwan, nung pai tsak khekkü noi-e.

³¹Apa tsümeikün ta monglamkülu noi naito, nungaito tsümeikü noulu apa thaiutha amai noi-e.

³²Apa to atao mosaokün khako wonane, Paikia tsak khekkü wonane naiuso nung tilaitso tsüsangnya shi-e.

³³Apato sainaoshep mosemkü choiantsün tsak khekkü naiuso ason nyim taoko thukkantsün Olip-pai tsak khekkü noi-e.

³⁴Goa tsühakün khaiuniahoi thsaosithso tsünoi-e, naiuso nekhem paopei tsangkü lahtsün tsam nouso in nou chetheane.

³⁵Nung khaiunia nousoüh angja nou shanji, naiuso tsümeikü nou chhiji, ngüso mong asaita akhünsilün nou meankü noin.