Read Khiamniungan Naga Yob 16 Bible Online

Yob 16 - Khiamniungan Naga bible

Yob 16

¹Nung ngio nouso khekkü ngü nung khako lulakü shin; asamüh aalo ngiokiutsün to angjalu noin.

³Asamüh athontsüyangkü chitelutkü noi-e süne? Athonting ngio nou asamüh asaita taim süne?

⁴Asam jü thangko naiuso ngo asam thangko noitünto, asamüh ngiotsün ngü alum ngioau shio-ela. Ngo jü khaiu tü meikü mounküta khiamtsang ngio nousoüh asam lalükhun-i-ela.

⁵Ngü asam ayamhan nou lokongela naiuso asam aalo-iau chitelutkü noi-ela.

⁶Lüko ngü ngiotsün nou ahachu ti tsünoi, naiuso tsamkü noitsün nou jü akiasung tsütaiulüshi.

⁷Ni ngo phoiani-iu, Goa; ni jütsamkhaiu loati-iu.

⁸Ni ngo thalouwaniu; ni jü eh noin. Ngo ou si khun jije, naiuso khaiuniahoi nou nung jü aphio mitha au louji.

⁹Amongmat nai Goa nou ngo chipekkaniu; apaüh ngo tü achinyan nou thapji.

¹⁰Khaiuniahoi nou ngotü tsümongling ngakü nyailutji; ngüsohoi asong nou ngü lemloküta jükha nai patiu.

¹¹Goa nou ngo tsümeikün khaiuniahoi hau lekiuwaniu.

¹²Ngo nokmei nai kihkü noiküla, lüko Goa nou ngo da sang nai thalou küta thsüokü chikü ngü lonekü wan. Goa nou ngo watthat monloau kankeiji

¹³naiuso uokopchon nousoüh ngo da tsoki pungkü nai kopji- nung chon nousoüh ngo thsat naiuso tawaikü noiküla; nungti lüko apaüh atsüojinyang ti tsühanji.

¹⁴Apaüh ngo loüh loühkü tawaiji; süpai tsak ahat nou waiwai iula-antsün khekkü apaüh pha pouji.

¹⁵Ngo mongsaiu küta nethe nou tenloji, naiuso ngo nung pukhao nai mokkü noin.

¹⁶Jükha sengkü mo-iulakün lektso ngo sang asong nou velut, naiuso jüniovei pumkü akhemso tsaküh lemlowan,

¹⁷lüko ngo ti alothe ko tsüphio, naiuso Goa dongai jü misao saitha noin.

¹⁸O goum, ngütü chhitsün aphio nouso latsangpok! Ngiotsüo thaiutha ngü jontsün tsamkü la-iula-i.

¹⁹Jü thaiutha tsakiu au naiuso jüdongai haau aün nai tsak noin.

²⁰Jü paiusoüh ngo lochi lotsaoji; Goa dongai jü niochekhiam tsangji.

²¹Khaiunia tsaküh apa haimei thaiutha kojakiutsünli, jü thaiutha Goa tü koja au ngü ajantso aiuji.

²²Lo jü aakihlaiu pon yankü khuwanji, naiuso ngo tilaitso laokü tsüshitsün yamai tsakeiji.