Read Khiamniungan Naga Yob 17 Bible Online

Yob 17 - Khiamniungan Naga bible

Yob 17

¹Jü aakih athon nou shimkü noin. Ngü iloau jeikülu shioji; etam tsüdekünaito jü thaiutha amao titso tsünoishi.

²Ngo tü thatü khosakkü lochi lotsaotsünso ta ngü thapji.

³Ngü ngiotsüo noin Goa. Jüngio nouso alou. Ngü ti ngioji nung jungloau amao sau tsünoi.

⁴Angelatsün ainou ni ngüso mong kiapkü wan; Lo ngüso hau jü khako ashiotsün lanoi-i.

⁵Chai thaiutha khaiunia tsaküh meshen paiusihaiso kausaiatji naiuso nung thaiuthako apa thsosoüh angja epji ta akenghai ngio nai ngiotaim.

⁶Naiuso lo nung ngio nou khaiuniahoi nousoüh ngü thako kankeiji; ngüso shiküta jükha nai lei nou thuplut.

⁷Jü amongsaiu nou ngo niopekli iula-iu; jüphasihok nouso akhemsoli matchaikü iula-iu.

⁸Sauhaiüh saitha ta ngioji ngüso lekkat, naiuso ngüso chikü nou ngü goa tsühakünli wanan.

⁹Asuhat noin ta ngiotsün hoi chikü ngüso ayamtha nai noin ta tekkü mongkü iulaji.

¹⁰Lüko ngüso chikü shiküta jü khako tsatünto, ngü ngüso tsaktso ange amoun tsüepsanela.

¹¹Jü ajekhaiuso yanlükhunaniu; jü mongthat nouso tsüthawao; jü ayangtaiu lotheaniu.

¹²Lüko jü paiusihaisoüh aso anyakhem nung anyi awon ta ngioji; awon shimkü noin ta ngüsoüh ngioji, lüko ngüso anyakhem nai noin ta ngü ngeji.

¹³Jü ayangtaiu nung eantsün goumchi noulu noin, nungai ngo anyakhem nai saikü khuwane.

¹⁴Etam khan nou tü ngü jüpo ta jone, naiuso ngo heantsün suong nouso tü ngo jü nyiu naiuso jü nioso ta jone.

¹⁵Nungaito jü ayangtaiu tiai noin? Naiuso jü ayangtaiu nou ta sauüh thape?

¹⁶Tilai ngo eantsün goumchi nai nappane ayangtaiu nouto ngoko tsükhuha-e.