Read Khiamniungan Naga Yob 19 Bible Online

Yob 19 - Khiamniungan Naga bible

Yob 19

¹Tiauta asamüh singio nou kia- at-iji?

³Atao pungkü nai asamüh ngo lochiji ngo thako tsümeikü chhitsün thaiutha asam amiam lüko tsümiam.

⁴Ngü tsüthakü chhiankü nai lüko, nungüh titi asam tawaiji?

⁵Ngoko naito asam meitso ta asamüh yangji, naiuso jü angja nouso jü aphioli mitha vesanji.

⁶Nung Goa nou chhin ta asamüh epau tsüshio süne? Apaüh ngü thaloau jin tsak jintaiukü noiküla.

⁷Apa atsao chhisiya thako ngo khengshiji, lüko tsakühtso tsüanglu; ngiotsüo thaiutha ngü vetsün tsakühtso tsülula.

⁸Goa nou yam phangan, naiuso ngo yankü khuau tsüshio; apaüh jüyam anyakhem nai tsangpokkü wan.

⁹Jü chaisiou chikü apaüh kankü khuwan naiuso jü nianlom lotheankium.

¹⁰Apaüh ngo alumai lotheaniu. Apaüh jümongyang seksanküta ngo awonan naiuso eantsün nai wanan.

¹¹Goa nou ngo thako mongmat naiuso mongkiaji; apaüh ngo apa ehoi atsaoting tsak khekkü kankeiji.

¹²Apaüh ngo tü poau apa süpaiso hongji; ngüsoüh jü nejenkhio thaloau khanthop nouso thaiuji.

¹³Goa nou jü deisinioso hau ngo lean-in; naiuso ngo ngekü noitsünso ko ngo mesan tsak noin;

¹⁴jü tsammongso naiuso haiso khuwaniu.

¹⁵Jü tsamai shamnoitsünsoüh ngo beankü khuwaniu; ngo yathsüotsün menyiuthsosoüh ngo mesan naiuso gohmao khaiunia tsak khekkü kankeiji.

¹⁶Ngo tü hachuau kojakü, tilai ngo ayathsüotsün tsak jonji, apaüh tsüthalaji.

¹⁷Jü tsammongnyiu jü isa nyamtsünko tsaau tsüshio, naiuso jü deisinioso ngo shimkü tsüshi.

¹⁸Methsohoi nou ngo epnai lochilotsaokü ngüso ngülon nyaiji.

¹⁹Jü haimeiting nousoüh ngotü chinyankü thapji; ngü thatü tsüojinkü noitsünso chikü ngo thako tsaji.

²⁰Jü khunso jü ou da laolaokü phanlutkü noin; Ngo jü aa nou jeikülu thakhukü noin.

²¹Oh, asam jühaiso! Ngo da atsüojinyang anoi! Goa pha nou ngo thaohonganiu.

²²Goa nou jeiat-itsünli asamüh ngo tiauta jeiat-iji? Asamüh ngo hau saiukü angja kiuwaniu tsüde süne?

²³Jüngio nouso ajantso hauto yangsan-iau ngü aiujila naiuso nung ngio nouso thsam tsakko sattaiu auya!

²⁴Jüngio nouso lung nou da laolutkü nung sattsün asaita noi-auya!

²⁵Lüko sau aphiteng nai ngo kiploau shi-e nung aün ai ajantso noin ta ngü ngeji.

²⁶Akia tsangkü jükhun heankü phiai lüko, nungpem nouko nailu ngü Goa eppe.

²⁷Ngü apa jüniovei nou eppe, naiuso apa mesan tsak tsülatha-e. Ngo mong tsüsongshi tiautenai asamüh ngiom.

²⁸“Samüh titi apa angja kiuau shio-e?” Ngo tü pha poau asamüh mi ajantso ta yamkü noiküla.

²⁹Lüko loto, angei khako Goa ün athesan kankü shitsün salaiu- nunglon hatkü lünoi, nungaito nungko mikhem kiutsün tsak noin ta samüh nge-e.