Read Khiamniungan Naga Yob 2 Bible Online

Yob 2 - Khiamniungan Naga bible

Yob 2

¹Nyitso loüh Goa ün thsoso APAOU khako kamshin, nungai Biya nou ngüso ongko noiküla.

²APAOU nou apatü sangkü ngiom, “Ni ti ainou shin?” Biya nou thalan, “Goumchi nai akhu ashi, naiuso asung asao ta tsakeitsün ainou shin.”

³APAOU nou sangkü ngiom, “Ni jü tsamki Yob ngesanmo?” “Nung Goumchi ko apali amei naiuso amongtsamtsün tsaktso tsünoi. Apaüh ngo amkhamji naiuso tsü- meikün tsüchhisiyaau tsüolokü noin. Ti koko ta tsüdetengkü apatü apha po-iau ni ngo ta kojakü noiküla, lüko Yob to lo naiuso asai thaiutha monglamkü noin.”

⁴Biya nou thalakü ngiom, “Aa nou noi au thaiuthako khaiunia tsaküh apaüh taiunou alum wanan-e.

⁵Lüko lo apa pem tawainai apaüh akhako ni lochi-e!”

⁶Nungtiphe APAOU nou Biya nou ta ngiom, “Apem mein, apa a-oukong khemko noin, lüko ni apa tsüloat-e.”

⁷Nungai Biya nou APAOU khako nou pungekü khuküta Yob pem thapokkü chaikia nou sung-in.

⁸Yob nung achinyan beisikin yaktaiutsün nai khukü moknoi küta apa chaikia mou nai kutau lakpai tsak lokü noiküla.

⁹Apa tsammongnyiuüh apatü ngiom, “Ni lo saokü nung khako lilu mongkiukü noian, nungti süne tsüde? Ni tiauta Goa hau athesankiu küta tsü-elowan?”

¹⁰Yobüh thalakü ngiom, “Ni ti ayanglu tsünoikü singioji! Tilai Goa nou sam hau tso amei tsak hongji, samüh nung monglingkü loji. Tilai apaüh sam dongai angja hongji sam titi namnamau shio-e?” Apa alumai angja eplüko, Yobüh Goa thako tsümeikü titso tsüsingio.

¹¹Yob ün paiusihai süme nouso Teman noknio ainou Elifaz, Shua hai goumchi ainou Bildad, naiuso Naama hai goumchi ainou Zofar so noiküla. Tilai ngüsoüh Yob angja omhetsün lulan, ngüsoüh apa mong losongkiu-ao thatloum.

¹²Ngüso yam laiukü aita Yob epküla, lüko ngüsoüh apa tsütsangshei. Tilai ngüsoüh Yob tsangshei, ngüso shapau naiuso mongsaiuau yachu, ngüso amongsaiu nou ngüso neshe chipek naiuso pukhao loküta koi ai soksan naiuso ngüso khaiuai tsomlut.

¹³Nungai ngüso Yobko hakü ajekhaiu chinyatnyi naiuso chinyatsoh ngiopem tsaktso tsüngiokü goh-ai moknoi, tiautenai apa titi thatso angjakü noiküla nung ngüsoüh ep.