Read Khiamniungan Naga Yob 20 Bible Online

Yob 20 - Khiamniungan Naga bible

Yob 20

¹Yob, ni ngo thatü yangelati-ji. Ngü loto tsüthashikü noiau tsüjeitaiushi.

³Angio nung alomiam ngio tsak noin, lüko nitü titi thala-e nung ngü ngeji.

⁴Peeta goumchiko khaiunia taiukiutsün konai yakü,

⁵tsümeikün khaiunia tsaktso atheng thonkü tsümongling.

⁶Maou sungyapkü apa sung lüko, apa khaiu nou thengmia nouso yapkü sunglüko,

⁷apa pukhao khekkü shipkü khuwane. Sauhaiüh apa ngekü noiküla apa tiai khuwan ta ngüso ngawane.

⁸Meamean tsak naiuso aso atsangshei eptsün tsak khekkü apa mowane, küta tilaitso müjam tsüepshi-e.

⁹Apa kihtsün athang ainou apa tsüepshi-e;

¹⁰Naiuso apaüh aangjahoi kausaiatkü lokam taiutsün apa thsosoüh lomeishi-e. Naiuso apa pha nou apa jengtsaiu pungkü laokiushi-e.

¹¹Apa pem oum naiuso oukong noiküla, lüko nung shakta pukhao au iula-e.

¹²Apatü tsümeikü nou thatü nyaphe apaüh nung angannyam apa sonai ajantso taiuji.

¹⁴Lüko nung eheshiu apa thaimongai sheh tsaktü chiai khosakkü iula.

¹⁵Tsümeikün khaiunia nou apaüh kaolotaiutsün jengtsaiu phusanji, Goa nou nung apa thaimong ainou lüko laokü lowanji.

¹⁶Tsümeikün khaiunia nou miolitsün to sheh khekkü noin; nungüh atsaoting pao tsaküh jeitsün khekkü apa loatji.

¹⁷Olip khiam sungtsün haiu naiuso liu-khiam si nyao tsangtsün haiutso nouso epkü apa tsükih-e.

¹⁸Apaüh chhisantaiutsün chikü apaüh leane; apa jengtsaiu nouso tü monglengau apa atao tsünoi-e,

¹⁹tiautenai apaüh angja hai thangmang naiuso tsüpaotsang naiuso meiüh lahtaiutsün tsam nouso louwankiu.

²⁰Apa achinek tilaitso amongtsam tsünoi.

²¹Tilai apaüh heji, nungko titso tsüpoisanji, lüko loto apa atsüomei thonaniu.

²²Apaüh shiolotsünko wekü atsok ainou akuothe alethsang nou apa nyammate.

²³Apa hau amongchiotsün chikü lühe-i! Goa nou apa amongmat nai angja kiu-e.

²⁴Tilai apa sonsalaiu ainou thakhuau kowe-e, taoson uokopchon nou apa kophonge.

²⁵Uokop chon tsaküh apa pem chatji; chonson nou tü apa she chaniji, naiuso ahat nou apa mongpem helouji.

²⁶Apaüh kamsantaiutsün alum lotheaniu; khaiunia pha tsangkü tsüsunluttsün in tsaküh apa naiuso apa tsammongso chikü chetheanji.

²⁷Nung khaiunia ün angei aün nou tsangsheikiuji, naiuso apa thako goum nou mitha kiuji.

²⁸Goa ün amongmat nouko apa jengtsaiu chikü lotheane.

²⁹Tsümeikün khaiunia tsak thaiutha haoson nung, naiuso ngüso hau Goa nou thatkiutaiutsün tengkam haoson nung.