Read Khiamniungan Naga Yob 21 Bible Online

Yob 21 - Khiamniungan Naga bible

Yob 21

¹Ngü ti ngioji nungtü a-anglu; asam ainou aalo ngü poutsün nunglu noin.

³Ngo hau ngio chite au atao tsak akiu küta ngo chitekhemkü phiai asamüh mongchio nai ngo alochi.

⁴Ngo li-etsün nung khaiuniako tsüde; Ngü tsükiplotsün ko tsotsak noin.

⁵Ngotü athaplu. Asamüh thapkü lekkattsün nungüh tsüsaiu süne?

⁶Ngo tilai ngütü ti thawaokü shin nung yangji, ngo thsüokü ngaongaokü lekkat.

⁷Tiauta Goa nou tsümeikünso aakihlaiu, naiuso atsüomei nai taiukiuji?

⁸Ngüsoüh aa noikü thsososithsaoso chikü sungjikantsün epthioji.

⁹Goa nou ngüso tsamkhaiu khako akuothe kankü tsüshiji; ngüso tilaitso ahat nai tsükihji.

¹⁰Ah, ngüso janghoi shingkü khuji, naiuso angja tsünoikü athso apsanji.

¹¹Ngüso methsoso jingkeiji naiuso onnemoktso nouso khekkü

¹²kokiang si poipoi sangh nouko aikü jih hangji.

¹³Ngüsoüh ngüso aakih atsüomei nai thonji naiuso tsüangjakü nyankü eanji.

¹⁴Tsümeikünsoüh ngüso pemsa awanan ta Goa tü ngioji; ngüso aa thaiutha apa mongchio nou ngeloau ngüsoüh tsümongchio.

¹⁵Goa yathsüoau pokü tsünoi ta ngüsoüh yangji tsüdekünai apa tü misaotsün ti alesan tsünoi ta yangji.

¹⁶Ngüsoüh ashio eptsün nung ngüso oukong tsangkü ta ngioji, lüko ngüsoüh yangtsün ayam nouko ngo tsühaji.

¹⁷Tsümeikün khaiunia ün tson lonyatkiu lüsüne? Ngüso ongko tsaküh akuothe waohekü shin süne? Goa nou amongmat nai tsümeikünso angja kium süne,

¹⁸naiuso ahsheih nou tsokap shipkü khutsün khekkü ngüso shipkü khuwan süne, tsüdekünai ngüso ahthe tsak nai pukhaoli kankü khuwan süne?

¹⁹Apa po angei thaiutha Goa nou thso nou hau angja kiuji ta asamüh ngioji. Tsüde! Goa nou angeihoi angja lükiu; ngüso angei shioko apaüh nung chhiji ta apahau lühan-i.

²⁰Angeihoi nouso hau ngüso angja chija lükan-i; ngüso hau Akongteng Goa ün athesan lüngesan-i.

²¹Tilai khaiunia ün aa nou thonane apa thsoso monglingkü süne tsüde ta apaüh atsüoting yangshiji süne?

²²Sauüh noithang atsok nai noitsünso saokü mikhemji, nung Goa tü khaiunia tsaküh tsandeau shio-e süne?

²³Khaiunia ajantso ngüso eantsün ajekhaiu saokü a-on meikü noiji, ngüso pem oukongkü aalomeikü amongling nai eanji.

²⁵Ajantso to titso amongling tsünoi; ngüso kih küta mongpem akhosak noikü eanji.

²⁶Lüko nungso chikü wekülu eanji küta khananji; ngüso chikü suong nou meanji.

²⁷Asamüh ngo thako tilüsong ayang tsümeikü taim ngü ngeji.

²⁸Asamüh sangji, “Asong khaiunia nou tsam lo tiai noin, tsümeikü chhisiyatsün tsam tiai noin?”

²⁹Atsakeitsün khaiunia ko asam tsüchite süne? Ngüsoüh ngiongem laokü shikiutsün asamüh tsünge süne?

³⁰Goa mongmatkü angjakiutsün ajekhaiu nai, asaita tsümeikün khaiunialu poianji.

³¹Tsümeikün khaiunia thako tsakiu au tsaktso tsünoi tsüdekünai apaüh chhitaiu nou chikü thaiutha apa hau laokiu au tsünoi.

³²Ehü meikü hükü noitsün apa etamai tilai apa etam khan dongai pikü khuji,

³³meakhan tao amkham sonthsa nai khaiunia hengsiheng halut, naiuso apa pem chiai goh nou lüko nyankü noilutji.

³⁴Naiuso asam! Asamüh ngo ti alesan tsünoikün ngioüh aalo-iau kowe! Asamüh athashi kiutsün alum nung yaang!