Read Khiamniungan Naga Yob 22 Bible Online

Yob 22 - Khiamniungan Naga bible

Yob 22

¹Ange amounting lüko khaiu- nia ajantso Goa thaiutha atheau shiokü noimo?

³Ni thakü chhitsün nou Goa thaiutha alesan noimo? tsüdekünai ni mei nou apa tü ahachu noimo?

⁴Ni Goa lon hat nou shioko apaüh ni angja nai kankü shikü lothaji ta tsüde.

⁵Tsüde, nung ni angei thsüokü sunhe nou shioko; nung ni tsümeikü chhitsün shioko noin.

⁶Adeiüh laiulotsün chailaiu thamshi-i au ni apa neshe kankü khuküta apa atenau titso tsünoikü wan.

⁷Tanatkü noitsün hau ni khiam ashiu au tsükiu, naiuso naiuatkü noinso hau ni ehe au tsükiukü wanan.

⁸Gohthum thalouau ni anoithang naiuso a oukong kankeikü noin.

⁹Ni jihi nouso hachuau noulu shanan tsüde, lüko ni mejetthso nouso kauat küta tsümeikü kankei.

¹⁰Nungtiphe loto ni lemkü jin nou jintaium, naiuso alekta ahat nou miankü iula-iu.

¹¹Ni epau tsüshiokü anyakhem nou sung-iu, naiuso khiamthe nou ni limlo-iu.

¹²Goa, aün nouso akhengting nai tsükih süne küta kianthsüo nouso tsokkü noilüko ngüso ta tsüthap-i süne?

¹³Lüko ni sangji, “Goa nou ti ngeji? Apa to thengmia nou tsangpokkü noin-apaüh titi sam mikheme?

¹⁴Thengmia ateitham nou apaüh epau tsüshio, naiuso apa maou lemkü tsakeiji ta ni yangji.

¹⁵Tsümeikün khaiuniahoi asaita nioluttsün yam da kei au ni lüko mongsong süne?

¹⁶Ngüso atao mosaokün khako lüko ngüso khiamthe tsaküh jikü khuwan.

¹⁷Apaüh ngüso tü ti chhiau tsüshio-e ta monglam küta Goa leankü khuwantsün khaiunia nouso nungso noin.

¹⁸Lüko ngüso atsüomei shantsün nung Goa noiküla. Tsümeikünso mongyang ngü tsüngelaji.

¹⁹Tsümeikünso angja kiutsün epnai, khaiunia amei nouso monglengji naiuso aphio tsünoikün khaiuniahoi nyaiji.

²⁰Tsümeikün khaiuniahoi jengtsaiu chikü lotheanji, naiuso apoitaiu nouso chikü in nou chetheanji.

²¹Nungtiphe, Yob, ni Goa ko haimei lüshan apa ta niko tsaotsün tsakli kankeitsün alaowan; nungti chhi naito, apaüh ni ouk kiu-e.

²²Apaüh atsande kiutsün lülo; apa ngio nouso amongpemai lütaiu.

²³Ah, atsamai tsümeikü chhitsün chhi ai laolu küta, ni Goa dongai tsamlokü laokü shiau noin.

²⁴A chaiou lakkeng lüwanan; a chaiou lakkeng ameiting nou haiu nai lüyakthiowan.

²⁵Achaiou lakkeng au Akongteng Goa nou lüthe, tsokkü kamsantaiutsün atangkason au apa lüthe.

²⁶Nungai Goa da ni asai monglame naiuso apa ni monglamtsün haiungan ta ni epsane.

²⁷Ni tilai misao-e, apaüh ni tü thala-e, naiuso ngiomong shinge shantsün ni taiu-e.

²⁸Ni chhitsün chikü nai ni ashio eppe, naiuso ayamko awon nou je-e.

²⁹Goa nou abülom nouso lonyapji naiuso atsamlo nouso lotsokji.

³⁰Ni aphio tsünoikü naito, naiuso ni chhitsün ayam thakü naito, apaüh ni kipsane.