Read Khiamniungan Naga Yob 23 Bible Online

Yob 23 - Khiamniungan Naga bible

Yob 23

¹Ngü lo saokü Goa thako namnamkü khengshiji; ngo jü monget lolaokü taiuau tsüshio.

³Ngü Apa tiai eppe nung ngetünto, naiuso apa noitsün nai khuao ngetünto.

⁴Ngü apa khako jü mi chitekü jü thaiutha ko ngio he-etsün chikü kiu-ela.

⁵Apaüh ti ngio-e naiuso apaüh ngo ta titi thala-e ngü nung ngioau mongchioji.

⁶Goa nou jü thako apa oukong chikü kankei-e süne? Tsüde, ngü ngiotsün ko apaüh ang-e.

⁷Ngo saitha noin; ngo Goa ko chite au shio-e; apaüh ngü aphio tsünoi ta jam veluttsün nung asaita thaiutha noi-e.

⁸Ngü ajepek nai yamiu, lüko nungai Goa tsünoi; ngü ajenap nai yam nai apa tsüep.

⁹Ajepekki si ajenapki nai Goa nou chhikü noiküla, lüko ngo apa tsüepsan.

¹⁰Lüko apaüh ngü tsakeitsün pungkü ngekü noin. Apaüh ngü tü thelu naito, ngo sanglingkü epsane.

¹¹Apaüh shingsantsün yamtü ngo saitha hoilut, naiuso amaoai tiaitso tsükhu.

¹²Goa nou ti thoilutji ngo nung asaita chhiji; Ngü mongchio nai tsüdekü, apa mongchiotsün nai hoilutji.

¹³Apa tilaitso tsüli-eshiji. Sauühtso apa khengshi au tsüshio. Tsüdekünai apa mongchio chhitsün ainou apa lolaoau tsüshio.

¹⁴Jü thaiutha apaüh ti yangtaium nung thawao-i-e; nung apa ayangtaiu piakü nouko tsaklu noin;

¹⁵Ngo apa khako ahat nou ngaongaoji.

¹⁶Akongteng Goa nou jü amongsong nou lotheaniu. Anyakhem nou ngü loijei-an lüko, ngoko hatsün nung anyakhem tsüde, nung Goa nou noin.