Read Khiamniungan Naga Yob 24 Bible Online

Yob 24 - Khiamniungan Naga bible

Yob 24

¹Tiauta Goa nou mikhemau atao tsak thatsankü tsütaiu, naiuso apa yathsüotsünso thaiutha ngiotsüo ajekhaiu tsak tsütaiu?

²Khaiuniahoi nou goh losongluao elung nou soisoiji; ngüsoüh onnemok hoi kaoloji, naiuso meshen onnemok hoi ongai kamlutji.

³Ngüsoüh mejetthso hai gado lowanji, naiuso jihi nou chailaiu mothamshikün lektso jangtsopong nouso tsüjakü laolowanji.

⁴Ngüsoüh tsosilu hai ayam thakü epau noitsün ainou lolaoji naiuso tsosilu hai khuküta pamkü noianau choiji.

⁵Nungtiphe angjahai liuai noitsün gado nouso khekkü, liutsa awai nai achih yamji; ngüso thsoso thaiutha achih ngüsoüh amao tiaitso epau tsüshio.

⁶Ngüsoüh meshen eiu tsüdekünai chih yamheji, naiuso tsümeikün khaiuniahoi sainaoshep eiu ai sainaoshep yamji.

⁷Asoh ngüso tiüh tsülopokkü saiji, achong ainou haiuloau ti tsünoi.

⁸King ainou saotsün ah-ou nou ngüso paiji, naiuso ngüso asoloau lung nouso soh ai kamshiji.

⁹Po tsühakün methsohoi tsümeikün khaiuniahoi sua au shanji naiuso tsosilu khaiunia ün thsoso chailaiu thamanau kankeiji.

¹⁰Lüko tsosilu nouso ngüso soloau neshe tsüsunkü khu-e; jilo taoko ngüso naiusilekü khu-e.

¹¹Ngüsoüh khaiutsomau olip nou ta, naiuso thengau sainaoshep nou ta thsaji, lüko ngüso pem lekü noiji.

¹²Tawaikü naiuso eantsünsoüh noknio nouso mongai weji, lüko goa nou ngüso misao tsüvesan.

¹³Awon tsümongchiotsün khaiunia piakü noin; ngüsoüh nung tsüngela tsüdekünai nungüh niatsün yamai tsükhu.

¹⁴Khaiunia loattsünso ah shiochan chukü angjahai loatau khuji, naiuso apaüh asoh kao nou kaoji.

¹⁵Ajisiwop chhitsünsoüh anyakhem shiau nou ta taiukü noiji; sauüh apa tsüepau thaiutha apaüh apa kha lopokji.

¹⁶Asoh kao nouso tsam chisatji, lüko anyi to ngüso awon ainou pamanji.

¹⁷Ngüso anyi awonlon hatji, lüko ngüso thaiutha anyakhem nou ti alekkat tsüsemjei.

¹⁸Tsümeikün khaiunia to khiamthe nou lakü khuwanji, naiuso apa ün atha gohthang nouso Goa ün athesan khemai noin; apa loto meshen sainaoshep eiu ai chhi au tsükhushi.

¹⁹Ah lamkü goh awai taoko nyin nyomkü khuwantsün khekkü, goumchi ainou angei khaiunia nouso mowanji.

²⁰Loto apa nyiuüh lüko apa tsüyangsanshiji; apa suong nou heantsün paikeng tsakli lotheaniu.

²¹Jihihoi tü tsümeikü kankeitsün shioko naiuso methso tsüchetkün menyiuhoi tü atsüojinyang tsühan nou nung thawaoji.

²²Goa nou, apa akong nai oukong nouso lotheanji; Goa nou chhi nou chhiji- naiuso tsümeikün khaiunia eanji.

²³Goa nou apa mong songkü kih-iao shiom, lüko atao chikü apatü thapkü noiji.

²⁴Atao letletkü tsümeikün khaiunia tsüomei-iji, lüko apa chih-ai khekkü wonanji, tsonyak sha tsak lamantsün khekkü noin.

²⁵Nung atsüotsüde ta ajantsoüh ngioau shio-emo? Ajantsoüh jü ngio nouso yaang ta mitha kiuau shio-emo?