Read Khiamniungan Naga Yob 27 Bible Online

Yob 27 - Khiamniungan Naga bible

Yob 27

¹Ngü Akongteng aa Goa nianko ngiomongshingkü ngioji, sauüh ngo hau ngiotsüo nou tsühan naiuso jü aa khosakkü shankiu.

³Goa nou ngo hau ilo taiukiutsün lektso,

⁴jü sonkouüh tilaitso tsümeikü tsüngio-e, jü leikhaioüh tilaitso yaang tsüchite-e.

⁵Asam khaiuniahoi ayam thakü noin ta ngü tilaitso tsüngio-e; Ngo mo-ekün lektso ngo atsüoting nou ta thaloutsün nung tsüli-eshi-e.

⁶Ngü ayamthakü nai meikü helokü noin nung tilaitso tsüleane; jü mong sanglingkü noin.

⁷Ngo tü nantsün naiuso ngo thako litsünso chikü tsümeikün si tsüsiokün khaiuniahoi khekkü angja lünoi-i.

⁸Goa nou ngüso aa saotsün taoko Goa tsühakün khaiuniahoi thaiutha ayang ti noin?

⁹Tilai angja shi-e, Goa nou ngüsoüh vetsün lula-e süne?

¹⁰Apaüh kiutsün amongling nou ta ngüso mongchiotsün taiuau noin; ngüsoüh apa tü tsülaokü mi saoau noin.

¹¹Goa ün oukong titi asong noin nung thaiutha ngo asam hau tsande-e, naiuso Akongteng Goa nou ti yangtaium nung chite-e.

¹²Lüko tsüde, atsüo naito, asamüh chijakü eppiu; nungaito alat tsünoikün ai tiau chiteji? Zofar

¹³Tsümeikün naiuso amongthe khaiuniahoi hau Akongteng Goa nou nungti angja kiuji.

¹⁴Ngüso thsoso piakü noilüko, ngüso chikü ehli nai loatane, ngüso thsosoüh tilaitso eheshiu saiukü tsütaiu-e.

¹⁵Sauhai apa ainou poisan ngüso akiasiya nou eane, naiuso ngüso jihihoisoüh lüko ngüso eantsün nai tsümongsaiu-e.

¹⁶Tsümeikünsoüh aveau tsüshiokü tangkason kamsan taiu au shiom naiuso meshenüh poutsün chiai shikü neshe taiu au shiom;

¹⁷Lüko khaiunia amei ajantsoüh nung neshe amei nouso tholo-e, naiuso ngiotsüo khaiunia ajantsoüh nung tangkason lowane.

¹⁸Tsümeikünsoüh mekhakha aochan khekkü tsamlahji tsüdekünai eiu ai jimtsün tsamki tsak lop khekkü lahji.

¹⁹Ngüso memei iulakü saianji, lüko nunglu, naiuso tilai ngüso asailatsün ainou chuji, ngüsoüh ngüso memei jengtsaiu tsüepshi-e.

²⁰Khiamthe alekta saotsün khekkü apa da ahat nou shingoi-e; asoh ahsheih tsaküh ngüso shipkü khuwane;

²¹Shingngan ahsheih nou ngüso tsam ainou shipkü khuwane;

²²nung ngüso chiai atsüojinyang tsühakü sheilute ngüso akhulükhunau ngüsoüh shiotsün lektso ngüso kowe-e.

²³Ngüso jingtsün taoko ahsheih nou ngüso kome, naiuso alotheantsün oukong hakü ngüso lohatte.