Read Khiamniungan Naga Yob 28 Bible Online

Yob 28 - Khiamniungan Naga bible

Yob 28

¹Tangkason thaiusantsün athang nouso noin naiuso Chaiou lakkeng losangtsün athang nouso noin.

²Khaiunia nou son nou goh ainou thaiusanji naiuso taoson nou lung ainou chiosanji.

³Khaiunia nou anyakhem a-aouting nou yamchuji. Ngüsoüh lung nou tü anyakhem nai goh kheiting nai yamji.

⁴Achiai khaiunia noitsün anou pungekü khukü apa goh thaiusatkü napji; khaiunia jamtso tsütsakeidekü nai, khaiunia ainou laiukü pungekü saokü khan nai aou nou ta phankü aodangkü nai ngüsoüh chhisiya nou chhiji.

⁵Eheshiu goh ainou sungji, lüko nung goh kheiailu chikü nelangkü paiankü noin.

⁶Goh lung nouso da Safir chaiou lung nouso sunkü noin, naiuso nung pukhao nouko chaiou lakkeng napkü noin.

⁷Nung thaiusantsün yam nouso ti letcheüh tsüep, naiuso meahetsün letche nung chiai tilaitso jeikü tsükhu.

⁸Chongkhao tsüdekünai amao ahat thainian tsak lüko nung yamsating nai tsütsakeiji.

⁹Khaiunia nou lung ajüoting nou thaiusatji, King nouso athan nai yalokü thaiuji.

¹⁰Ngüsoüh haiuchetngan nai thaiuji naiuso chaiou lung nouso epsanji.

¹¹Ngüsoüh haiuchetngan nai thaiuji naiuso tsangkü taiutsün nung awon nai kankü shiji.

¹²Lüko samüh mongthat mongsai nou tiai epau shio-e? Samüh angelatsün tiai ngelo-e?

¹³Mongthat mongsai nou khaiunia ongai epau tsünoi; Nung amai atsüoting sauüh tsünge.

¹⁴Khiamnok naiuso sheasong than nou ngioji: Mongthat mongsai nou nungko tsüep.

¹⁵Nungto chaiou lakkeng tsüdekünai tangkason nou tuh-au tsüshio.

¹⁶Chaiou lakkeng ameiting naiuso Chaiou lung amai vekü hau tsüshio.

¹⁷Nung chaiou lakkeng mai chiai noin; tsüdekünai chaiou lakkeng taiutsün si sosaiu ameiting amai khengai noin.

¹⁸Mongthat mongsai amai nou to Koral lung tsüdekünai asangling lung tsüdekünai chaiou lung seng chiai noin.

¹⁹Topaz lung ameiting naiuso chaiou lakkeng asanglingteng mai nou mongthat mongsai mai nouko ve-eau tsüshio.

²⁰Nungaito, mongthat mongsai haiungan tiai noin? Samüh angelotsün epau tiai ngelo-e?

²¹Waio tsak ajeikeitsün taoko lüko, Aa thainian tiüh nung epau tsüshio.

²²A-eantsün naiuso alotheantsün nou lüko Ngüsoüh atenlam ngiolu lulakü noin ta ngio-iu.

²³Goaüh lu nung yam ngeji, Mongthat mongsai tiai epji nung athang ngeji,

²⁴Tiautenai apaüh goh athon saokü epji, Maou khemko noitsün apaüh alum epji.

²⁵Tilai Goa nou ahsheih hau apa oukong kium Naiuso sheasong atheng atham shan;

²⁶Tilai apaüh a-ou thaiutha ngiokhem shan, Naiuso ahmok si ahsalap thaiutha yam shan;

²⁷Nungai apaüh mongthat mongsai nou ep naiuso nung thelukü taiu — Apaüh nungko apa mongchio nou lomongkiu.

²⁸Goa nou khaiunia tü ngiom, “Athaplu, APAOU lon hattsün nung mongthat mongsai noin; naiuso tsümeikü ainou pungetsün nung angelatsün noin.”