Read Khiamniungan Naga Yob 29 Bible Online

Yob 29 - Khiamniungan Naga bible

Yob 29

¹Yobüh loüh chiteshin. Yob

²Jü aa loühjam Goa nou jü khako thaptsünli noishitünto.

³Goa asaita ngüko hakü noiküla naiuso ngo anyakhem yankü tsakei nai ngo hau awon kium.

⁴Ngo tsüomeikü noitsün nung ajekhaiu nouso noiküla, naiuso Goa ko nge-etsün nou jü tsamkhaiu sojeikü noiküla.

⁵Akongteng Goa ngoko hakü noiküla, naiuso ngo jü thsosoüh lemjeikü noiküla.

⁶Jü jangtsoso naiuso won nousoüh anyao nou saiukü kiu, naiuso jü olip pai nouso lung goh nai samsankü noiküla.

⁷Ti taoko noknio petche nouso phete naiuso ngo ngüso ongko jü noikham lokü noiküla,

⁸ngüsoüh ngo eptsünko aikü pühehoi nouso yam nou shih kiukü noiküla, naiuso ngü hau asuhat kiuau petchehoi nou tsakü noiküla.

⁹Aheihoi nouso chitetsün laowan;

¹⁰thata atengting khaiuniahoi nouso lüko tsamkü noiküla.

¹¹Ngo eptsün tsüdekünai jü thaiutha lulatsünsoüh ngü ti chhin nung thaiutha amei ngiokiukü noiküla.

¹²Tilai angja haiüh ven, ngü ngüso hachu; Tiai soilükhunau tsünoikün mejetthso nouso hau ngü ahachu kium.

¹³Thatü thsüokü akuothe nai noitsün khaiunia nousoüh ngo lomsan, naiuso jihihoi nouso hau aalo eplo-i au ngü hachu.

¹⁴Ngü asaita tsokü naiuso thakü nai chhin.

¹⁵Niopek hai thaiutha niovei nou ngo, naiuso chiune hai thaiutha hok nou ngo noiküla.

¹⁶Angja hai thaiutha ngo po tsak khekkü noiküla naiuso angja taoko ngo mesanhai akuo lüko noiküla.

¹⁷Mongthe khaiunia nouso oukong ngü lothean naiuso ngüsoüh tawaikiutsünso ngü kipsan.

¹⁸Ngü asaita aakihlaiukü kih au yang naiuso aalokü tsamai eanau yangkü noiküla.

¹⁹Ngo asaita khiam noitsün pai tsak eiu khekkü noiküla naiuso paikia nouso khiamle nou paithsaokü noiküla.

²⁰Khaiunia pungkü nou asaita ngo lomsan, naiuso jü oukong tilaitso ouchankü tsü-iula.

²¹Tilai ngü ayamhan kium khaiuniahoi nou tsamkü noiküla naiuso ngü ti ngioji nung da tsüokü ang;

²²ngü tilai kheme, ngüsoüh ti ngioshiau tsünoiküla. Jü ngio nouso a-ouchan khekkü tsangkü nap;

²³eiu-a khaiuniahoi nousoüh thsanyan nyim taoko ah-ou monglingkü lotsünli khaiunia pungkü nou jü ngio nouso loum.

²⁴Tilai ngüso monglamtsün mowane; jü khasinio iwon nou ngüso mong losongkium.

²⁵Ngü nialokiu küta thalukiu; nokpao tsaküh apa süpaihoi niakü khutsünli, ngüso henyinyi taoko ngüso hau aalo nou kium.