Read Khiamniungan Naga Yob 3 Bible Online

Yob 3 - Khiamniungan Naga bible

Yob 3

¹Aphiteng nai Yobüh son sop küta apa chettsün ajekhaiu hau athesan kium. Yob:

²O Goa, ngo chettsün ajekhaiu da athesan alolut; Methso noithangnai ngo yaloutsün asoh nouda athesan alolut!

⁴Goa, nung ajekhaiu anyakhem au ali-e. Nung ajekhaiu loüh tilaitso layangsan-i; nung ajekhaiu da tilaitso awon lajelutshi.

⁵Nung ajekhaiu anyakhem naiuso asoh tsak anoi-i; nung thengmia nou akhojeiau, naiuso aje nou atsom mowan.

⁶Pon nouko nung asoh nou lükhian-an, naiuso nung tilaitso lawesanha shi;

⁷nung amongling tsüsunkün lon asoh tsak lünoi-i.

⁸Alonga-antsünhoi nouso ta nung ajekhaiu athesan lükiu ta lüngio, sauhaiüh oukongting thainian thakippau shioji.

⁹Ah-nge kianthsüo nou awontsün ainou lolaokü ataiu; nungh asoh nou hau ahshiochan thaiutha ti ayang lakiu.

¹⁰Ngü chettsün asoh thaiutha athesan lükiu, tititenai nungüh ngo angja si amongkia nai chetsan-in.

¹¹Ngo jünyiu thaimongai eantünto tsüdekünai, ngo hatsün ataoting nouko eantünto ta ngo yangkiuji.

¹²Jünyiuüh tiauta ngo apa shiophuko thomloum ya? Tsüdekünai apaüh ngo tiauta apa nyaoüh tsadloum ya?

¹³Ngo nungtaoko eantünto, ngo loto aalo nai noi-ela,

¹⁴sauhaiüh akeng nokpao tsam nouso shanshin, nung nokpaohoi naiuso nokshing hoili saikü noian lüsao.

¹⁵Tsüdekünai chaiou lakkeng taiutsün nokpaohoi nouso sauhaiüh meshen tsam tangkason nou meankü kamsantaiu, ngüso ko ngo noi-ela,

¹⁶tsüdekünai loteng chettsün methso tsak khekkü saikü noi-ela.

¹⁷Etam naito akausai khaiunia nouso chhisiya laowanji, naiuso nungko chhisiya nai tanatkü chhitsünsoüh aphiting aalo epji.

¹⁸Wekü naiuso thsüokü thoiluttsün ainou sua nousoüh lüko amongling aalo epji.

¹⁹Nungaito ehen si asongso kamkü noin, naiuso suahoi aphiting khaiuniatsüo athang nou noin.

²⁰Tiauta khaiunia nou omhekülu noiji? Tiauta akuothe nai noitsün khaiunia hau awon kiuji?

²¹Ngüsoüh ee nou ta taiuji, lüko nung tilai tsüshiji; chaiou kamtaiutsün ko hau ngüsoüh etam mongchioji.

²²Ngüso eanküta mokhanankün lektso ngüso amongling tsünoi;

²³Goa nou ngüso ashiau noitsün tsangan naiuso aniokun pungkü nai ngüso khopokkü wanan.

²⁴Ehetsün liko, ngo mongsaiuji, naiuso ngü ngettsün tilaitso tsülaolo.

²⁵Ngo hatattsün alumko ngo ta shithawaoji.

²⁶Ngo nokmei tsünoi, aalo tsünoi, naiuso jü angja nouso tilaitso tsüthonla. Elifaz: