Read Khiamniungan Naga Yob 30 Bible Online

Yob 30 - Khiamniungan Naga bible

Yob 30

¹Lüko loto achet yamko ngo da methsohoi nousoüh lochilotsaoji! Ngüso poso asaita titsüdekü noiküla ngü ngüso hau jü jiisoüh onnemok jimtsün nai hachu-iau tsükiu.

²Ngüso sonthehai phalam tsak jü thaiutha chhiau thatü outsükongkü noiküla.

³Ngüso thatü tsosilu naiuso naiukü noiküla nungtiphe ngüsoüh asoh aodangkü nai liutsa nai pai eiu awon nouso chiuhe.

⁴Hemdangkü noitsün yanpon eiu nouso saokü, naiuso liutsa nai samtsün pai nouso seksanküta ngüsoüh nung hekü noiküla.

⁵Kaohoi nouso tü vekü komtsünli khaiunia pungkü nou ngüso sang asong nou vekü koman.

⁶Ngüso to lung ongnai-khan thaiuküta ken nai kih-aulu noiküla.

⁷Liutsa nai ngüsoüh thainianhoili vekü shein naiuso paikhemso nai aikü kamshin.

⁸Ngüso mainga thsoso, peikhem thsoso! Ngüso goumchi ainou komankü noiküla.

⁹Lo ngüso shiküta ngütü nyaikiuji; ngo ngüso thaiutha alonyai au tsaklu noin.

¹⁰Ngüso ngo tü chinyanji; jü thaiutha ngüso aphop mei-in ta ngüsoüh yangji, naiuso ngüso shiküta jü kha nai lei saokü thuplutji.

¹¹Tiautenai Goa nou ngo outsükong naiuso ahachuau iula-iphe, ngüso jü thako amongmat chikü nou tsalouji.

¹²Nung khaiuniahoi asong nou ngü ta khaiu ai yakü poau tsalouji; ngüsoüh ngo ajing komkeiji; ngüsoüh athonting lochi au khemlokü noin.

¹³Ngüsoüh ngo haiulotsün lothean küta ngo lowanau koweji; naiuso ngüso lolaoau nungko tsaktso tsünoi.

¹⁴Ngüso ngü jiotaiu nai khan thuksatkü naptsün khekkü shiji naiuso jükhaiu ai yakü ngo ngamthiowanau shiji;

¹⁵Ngo alekkat nou shioheankü noin, jü niansong ahsheih tsak khekkü, naiuso jü atsüomei thengmia tsak khekkü khuwaniu.

¹⁶Lo to ngo eanau lümeikü noin; jü omhe thaiutha ti aalo tsünoi.

¹⁷Asoh jü ou nouso chikü kiaji; nung akiasungtsün tilaitso tsülaoji.

¹⁸Goa nou ngü da sangke nai thalou küta jü neshe ayamli tsüdekü thsashikü wan.

¹⁹Apaüh ngü puchet ongai yakkan; Ngo lolampu tü tsaokü noin.

²⁰Ngo nitü jonji, O Goa, lüko ni tilaitso tsüthala; naiuso ngü tilai misao saoji, nungai ni thaptsün ti tsünoi.

²¹Ni ngo thatü tsaokü kankeiji; ni ngo a-oukong chikü nou jeiat-iji.

²²Ni ngo ahsheih hau shipkü khu-i; ni ngü ah-ou-ahsheih hau chinnatiji.

²³Khaiunia apem thaiutha akuo noitsün, nai eanau ni ngo kanlükhunji ta ngü ngeji.

²⁴Atsüojinyang sao au nou ta simkü ti chhiau tsüshiokü nyomankü noitsün khaiunia ta ni tiauta pha poji?

²⁵Angja nai noitsün khaiuniahoiko ngo tsüshap ha süne naiuso apoutsünso thaiutha tsüojinkü tsüyangkiu süne?

²⁶Ngü amongling naiuso awon thaiutha yangkü noiküla, lüko nung liko angja naiuso anyakhem shin.

²⁷Ngo ayangelat naiuso akiasung nou chipekaniu; ajekhaiu tsütokü angja ngü waohe-iu.

²⁸Ngo aje awon tsüepkü mongsaiukülu noiji; ngo nyung khako tsaji küta ahachu thaiutha kojaji.

²⁹Chiu tsüdekünai Ostrich waio shihtsünli jü sangh amongkia naiuso aodangkü tsak noin.

³⁰Jü khun nyachingkü shi-aniu; naiuso akia nou jek keiji.

³¹Ataojam ngü amongling jihang lutsün loto amongsaiu naiuso ashap sanghlu lulaji.