Read Khiamniungan Naga Yob 31 Bible Online

Yob 31 - Khiamniungan Naga bible

Yob 31

¹Menyiuthso hai tü achinek hakü tilaitso tsüthapau Ngü ngiomongshing tsak shaniu.

²Akongteng Goa nou sam tü ti chhiji? Khaiunia chhi mai apaüh titi thamshiji?

³Tsüthakü chhitsünso dongai apaüh akuothe naiuso alothe hongji.

⁴Ngü chhitsün alum Goa nou ngeji; jü hokngam pungkü apaüh epji.

⁵Tsümeikün chhi ngü tilaitso tsüchhi naiuso amaohai kausaiat au tilaitso tsükowe ta ngü ngiomong shingkü ngioji.

⁶Goa nou ngü ngiotsüo tsoi nai lüthatlu-i naiuso ngo aphio tsünoi ta apaüh epsane.

⁷Ngo yam atha ainou phoklekü khuwankü noi naito tsüdekünai jüpem nung tsümeikü nai tailükhun-ikü noi naito, naiuso jüpha nouso da angei lepkü noi naito,

⁸nungaito jü chihsam nouso lülothean-i tsüdekünai ngü lethiotsün chihsikhiam amaohai hau lühe-i.

⁹Jü phao ün tsammongnyiu ko jümong kiuwankü noi, küta apa koukhan phiai pamkü taiukü noinaito,

¹⁰nungaito jü tsammongnyiuüh amao khaiunia tsak ün chih lütheng küta amao khaiunia tsak ün then ai lüsai.

¹¹Nungtin tsümeikü chhitsünso to loatkü wanau noin.

¹²Nungto ngü taiutsün alum chettheantsün alotheantsün inheeng tsak khekkü noi-e.

¹³Tilai ngo yathsüotsün tsaküh ngo thako namnamkü khengshiji, ngü apa ngio angkü ayam nai apatü kankei-ela.

¹⁴Ngü nung tsükankei naito, ngo titi thekü Goa ko pheteau shio-e? Tilai Goa nou ngo tü mikhemao shi-e ngü ti ngio-e?

¹⁵Ngü shantsün Goa nungühlu ngo yathsüotsünso lüko shan.

¹⁶Ngü angjahai da tilaitso tsühachukü tsüwan; tsüdekünai jihi nouso tilaitso angjakü tsütaiu

¹⁷tsüdekünai ngü henai, mejetthsohai naiuatkü nai tsüwan.

¹⁸Jü aakihlaiu chikü ngo ngüso paotsangkü shin.

¹⁹Ngü tilai ajantso neshe tuhluao thatü angjakü apoutsün nai epsanji.

²⁰Ngü jü onnemok hoi ainou losantsün emok ewoi nou lahkü apa hau alam ne nou kium. Nungai apa mong apem nou ngü lomsan.

²¹Mikhem nai ngo shio-e ta yangkü, ngü mejetthso hai kausaiatkü shikü noi naito,

²²nungaito jüpha nouso jü sangdongkhaiu ainou chansankü lüpaian.

²³Tiautenai ngü Goa ün alohat lon hatji, nungtiphe ngü nungti nou chhi tilaitso chhiau tsüshio.

²⁴Ngo tilaitso memei nai mongkiukü tsünoi

²⁵tsüdekünai jü atsüomei nai ngo tilaitso tsübülom.

²⁶Ngü aje awon nouta tilaitso tsüamkham tsüdekünai alei alengmei nouso ta tsüamkham.

²⁷Nungso hau alomsan nou jüpha nou pipkü ngüso lomsantsün nai ngo soikü khukü tsünoi.

²⁸Nungli nou angei ee tsangkü lohatau noin; tiautenai nungüh Akongteng Goa tsülouji.

²⁹Jü ehoi angja nai ngo tilaitso tsümonglingha, tsüdekünai ngüsoüh akuothe phete taoko tsümongling;

³⁰Ngüso ean-iao thaiutha misaokü ngü tilaitso angei tsüsunlu.

³¹Ngü mesanhai asaita monglingkü nialokü shin ta jü thaiutha chhikiutsün khaiunia chikü nou ngeji.

³²Atsakeitsünso ngo jü tsamai niathio naiuso ngüso tilaitso yamkheng nai tsüsai-i.

³³Khaiunia amaohaiüh ngüso angei tsangpokkü taiuau kowe, lüko ngü jü angei tilaitso tsangpokkü tsüwan.

³⁴Khaiunia nou ngiotsün ko ngo tilaitso hatkü tsünoi; Ngo ngüso athutlon hatnou tsüsingiokü, tsüdekünai tsamkhemai tilaitso tsünoian.

³⁵Ngü ti ngioji, nung ta tsakühtso tsüanglu-e süne? Ngioyak pungkü ngiotsüo ta ngü ngiomong shingkü ngioji. Akongteng Goa nou ngotü athalatsün anoi-i. Ngü ta khengshitsünsoüh jü thako mi kankü shiküta ngü nungso epau lümeikü satkü taiunaito.

³⁶Ngü nungso jü sangdongkhaiu ai monglingkü thio-ela naiuso nungso kandioli jü khaiu ai keikü the-ela.

³⁷Ngü chhikü shitsün alum ngo Goa hau chite-ela, naiuso apa khako jü nianlom noi-ela.

³⁸Ngü eiu a-tsün goh ngü kaulowankü noi nai naiuso nung APAOU ainou lowankü noi nai —

³⁹ngü nung eiu mongko sungtsün chihsikhiam heshiuwankü lüko nung losantsünso eiu- ah hoi naiuat-ikü noi nai —

⁴⁰nungaito jinyak si barlitso liko, chih-ai nouso si tsao nouso asamsan-i. Yob ngio nouso thoniu.