Read Khiamniungan Naga Yob 32 Bible Online

Yob 32 - Khiamniungan Naga bible

Yob 32

¹Yobüh apa chiai aphio tsünoi ta monglaman nou shioko, khaiunia süme nousoüh apatü athala kiutsün lean.

²Elihu nian nou khaiunia tsak sau nung chitetsün shimkü noiküla apaüh loto meshen amongmat jeitaiuau tsüshioshikü iula, tiautenai Yobüh meshen chija penlo küta Goa lochilotsaokü noiküla (Elihu nung Buz thsaosithso Barakel thso noiküla, naiuso apa Ram kau ainou noiküla.)

³Apa Yob paiu khaiunia süme nouso tü lüko mongmat. Tiautenai ngüsoüh Yob tü thalaau ngioyam tsümon, naiuso nung shioko Goa nou tsüthali epsan-in.

⁴Tiautenai ngüso ongko Elihu nung niophi au thephe, apaüh khaiunia chikü nou mochitekhem- kün lektso taiukü noiküla.

⁵Tilai apaüh khaiunia süme nouso Yob tü thashiau tsüshiokü ep, apa mongmat

⁶küta singioau yaloum. Elihu Ngo methso, naiuso asam ashe, nungtiphe ngü ti yangji nung asam tü ngioau ngo hatkü noiküla.

⁷Asamüh lüchite ta ngü jü chija yangkü noiküla, naiuso asam ashe khaiuniahoi nouso ün angelatsün mongthat mongsai kiuau noin.

⁸Lüko khaiuniahoi dongai shiküta ngüso hau angelatsün mongthat mongsai kiutsün nung Akongteng Goa Onthso nou noin.

⁹Khaiuniahoi angela mongyang epkü iulatsün nung aakih somkü kihtsün nou tsüde tsüdekünai ayamtha nou ngeau ngüso hachutsün tsüde.

¹⁰Nungtiphe lo asam hau ngütü anglu-iau mongchioji; ngü ti yangji nung ngü asam hau chiteko.

¹¹Ngü asam chitetsün taoko mongau laiukü anglu naiuso asamüh angela mongyang ngio yamtsün taoko taiukü noiküla.

¹²Ngü asam tü tsokü ang; lüko athaplu, asam sauühtso Yob aphio nung noin ta hanau tsüshio.

¹³Asamüh angela mongyang epsaniu ta titi thekü ngioji? Tititenai asamüh ashio tsüep, ta Goa nou Yob ta thala-e.

¹⁴Ngüko tsüdekü, Yob asam ko chitekü noiküla, lüko asamüh chhitsünli ngo tilaitso tsüthala-e.

¹⁵Ngüso ngio nouso ashio tsüep, Yob; ngüsoüh nitü thalaau tsütaiu.

¹⁶Ngüso tsamkü noitsün taoko ngo lüko taiulutkü noi-e süne? Ngüso nungko angioshiau ti tsünoishikü tsakü noin.

¹⁷Tsüde, loto ngo jü chija athalatsün kiu-e, küta ngo ti yangji nung nihau chiteko.

¹⁸Ngü tsüsingiokü taiushiau tsüshioshi. Ngo ngio nouso lolaokü wanau tsüshioshi.

¹⁹Ngü chitehaau atao tsüepkü naito, ngo theng ayan nou nyikhun nekong ayan paishitsün khekkü paishi-e.

²⁰Ngo atsa noiau tsüshio; ngü chite aulu.

²¹Ngo nung ngio he-e nouko sau kha ta tsüthappe; Ngü khaiunia sautso nian tsülomsane.

²²Ngü titi lomsane nung tsünge, naiuso ngo nung chhi naito Goa nou ngo hau liukü angja akiu.