Read Khiamniungan Naga Yob 33 Bible Online

Yob 33 - Khiamniungan Naga bible

Yob 33

¹Yob, ngü lo ngioau noitsün ngio chikü ta meikü anglu.

²Ngo jü mongai ti noin nung ngioau khemlokü noin.

³Jü ngioyak nouso chikü saitha noin, naiuso ngo ngiotsüo chiteji.

⁴Goa Onthso nou ngo shan naiuso ngo hau aa nou kium.

⁵Ni shionaito ngo tü athala. Ni ashioh-e au ngio nouso meikü lükhemlo.

⁶Goa khako ni naiuso ngo tsaklu noin, je nemtso puja ainou saikü noin.

⁷Nungtiphe ni ngo lun hatau ti ayam tsünoi; ngo ni da pha tsüpo-e.

⁸Ni ngiotsün nung ngü lula-iu:

⁹“Ngo aphio tsünoi; ngü tsüthakü ti tsüshan. Ngo aphio tsünoi naiuso angei ainou khaiuniatsüo noin.

¹⁰Lüko Goa jü thako angei yamji naiuso apaüh ngo ehoi tsakta vesanji.

¹¹Apaüh jühok nai sonkhiang nou keji; apaüh ngo khutsün alumai jiokü thapkü noiji.”

¹²Lüko ngü nitü ngioji, Yob, ni aphio noin. Tiautenai khaiunia koto Goa song.

¹³Khaiunia tsak namnam nou ta tilaitso tsüthalatsün Goa tü ni tiau khengeji?

¹⁴Goa nou paikü chite lüko, apaüh ti ngioji nung da mong kiutsün tsaktso tsünoi.

¹⁵Asoh taoko tilai khaiuniahoi saikü noiji, meamean si atsangshei nai Goa nou chiteji.

¹⁶Apaüh ngüso hau apa ngio da anglu-iji, naiuso apa alohat nousoko ngüso hatatji

¹⁷Goa nou ngüso angei chhi ainou lolao au chiteji naiuso ngüso bülomkü iulatsün ainou kipsanji.

¹⁸Apaüh ngüso tsülomo-i-e; apaüh ngüso ee ainou kipsanji.

¹⁹Goa nou khaiunia tsak akiasiya apa pem kiakü sungitsün tsangkü lothaji.

²⁰Akia khaiunia nou apa eheshiu tsümongchioji, naiuso eheshiu ameiting lüko chinyankü epiji.

²¹Apa pem paiukü shianji; naiuso apa ou nouso jinchukü epji;

²²naiuso nungti apa eanhai goumchi nai khuwanau noin.

²³Tsüngean, Goa ün hengsiheng ongko tsak apa hachuau shiküta khaiuniahoi nouso hau ngüso chhi yangsan-iau shiom.

²⁴Atsüojinyang shiko hong nou ngio-e, “Apa alean! apa eanhai goumchi ai khuau tsünoi. Apa jashiau nungko ashiosantsün tsak noin.”

²⁵Apa pem loüh oum naiuso oukongkü iulashi-e;

²⁶apaüh tilai misao sao-e, Goa nou apatü thala-e; apaüh Goa nou amongling nouko amkhame. Goa nou apa hau alum waokü shankiu shi-e.

²⁷“Ngo angei sunhe-iu, ta apaüh nyung khako ngio-e, Ngo ayamtha nou tsüchhi, lüko Goa nou, ngü poikium.

²⁸Apaüh ngo eanhai goumchi nai khuao noitsün ainou lolao, küta ngo losaokü aa noin.”

²⁹Goa nou nung chikü tsülaokü chhiji;

³⁰apaüh khaiunia aa nou kipsanji, küta apa hau monglingkü kih au kiuji.

³¹Lo, Yob, ngü ti ngioji nung ta anglu; tsamkü anoi küta ngü chite-e.

³²Lüko ni tso tsak ngioau noinaito, ngü nung anglu ko; tiautenai ngü ni aphio tsünoi ta hanau aiuji.

³³Lüko nungti tsüdekünaito, nyankü anoi küta ngütü anglu, naiuso ngü ni hau angelatsün noiau tsande-e.