Read Khiamniungan Naga Yob 34 Bible Online

Yob 34 - Khiamniungan Naga bible

Yob 34

¹Asam angelatsün naiuso mongthat mongsai noitsün khaiunia nouso; ngü ti ngioji lo nung tü anglu.

³Tilai asamüh tapluji eheshiu amei nou ngesanji, lüko asamüh lulatsünko angelatsün ngio nouso tsülusanji.

⁴Sam thaiutha athe amei thaluau sam da lu noin.

⁵Yobüh apa aphio tsünoi, lüko Goa nou apa hau ngiotsüo nou kiuau tsümongchio ta ngioji.

⁶Apaüh sangji, “Ngü titi thekü ngo tsütha ta yaang ngio ngioau shio-e? Ngo thsüokü tawaikü noi lüko ngo angei tsünoi.”

⁷Nung khaiunia Yob khekkü asamüh ajantso epkü noimo? apaüh Goa hau asuhat tilaitso tsühanji.

⁸Apaüh tsümeikün khaiunia hoikam mongchioji naiuso angei khaiunia nousoko khuhaji.

⁹Apaüh ngioji, Goa ko jeiaikü noiau nou khaiunia thaiutha titso alesan tsünoi.

¹⁰Asam angelatsün khaiuniahoi nousoüh ngo ta anglu! Akongteng Goa nou tsüthakün chhi-e süne?

¹¹Ngüsoüh chhisiyatsün mai apaüh khaiuniahoi hau kiuji naiuso ngüsoüh epau maitsün ngüso hau kiuji.

¹²Akongteng Goa nou tsümeikün tsüchhiji; naiuso apa tilaitso sau ta lünou ngiotsüo tsüdekü tsünoiji.

¹³Goa nou apa oukong ajantso ainou epm süne? khaiunia ajantsoüh apa goumchi athum khako apaotsang au taiukium süne?

¹⁴Goa nou aa isa nou laokü lowan naito,

¹⁵aa noitsün chikü eane naiuso nung pu au müjam iula-e.

¹⁶Lo ni angelatsün noi naito, ngo tü anglu.

¹⁷Asio Goa nou ni phio-iji süne? Apaüh ngiotsüo ta chinyanji ta ni yangjiso?

¹⁸Nokpao nokshing nouso tilai atheau tsünoikü tsüdekünai akausai iula-e Goa nou ngüso phio-iji.

¹⁹Apaüh nokpao nouso ta tsüjungji tsüdekünai angja hai thako memei hai ta atsüojinyang tsünoiji, tititenai khaiunia chikü apaüh shan.

²⁰Alekta awem khaiunia tsak eanau shiom, Goa nou khaiuniahoi shiohongji naiuso ngüso eanji; akong khaiunia nouso ti akowe tsühakü loatji.

²¹Apaüh khaiuniahoi hokngam pungkü tü thapji.

²²Angei khaiunia tsak Goa ainou pamloau anyakhem thapukkü tsünoi.

²³Khaiunia khaai naiuso apaüh mi khemau Goa thaiutha atao thattaiuau ti pokü tsünoi.

²⁴Aheihoi lowanküta nung thangko amaohai thioshiau Apaüh akautha au tsüpo.

²⁵Tiautenai ngüsoüh ti chhiji nung apaüh ngeji nungtiphe apaüh ngüso yakkanji naiuso asoh sutnekü wanji.

²⁶Apemüh epau shiotsün nouko apaüh angeihoi lohatji,

²⁷tiautenai ngüso apa phi hoiluttsün laowan küta apa athoilut nouso chikü tsüwesankü wanan.

²⁸Angja hai hau Goa tü weau ngüsoüh kongkü choiji; naiuso apaüh ngüso ahachu thaiutha vetsün lulaji.

²⁹Goa nou ti chhisanau tsüthatsan naito lüko, sauühtso apa tü namnamau tsüshio. Apaüh apa kha tsangkü wan naito, khaiuniahoi sapate.

³⁰Goa tsühakün ajeiat kiutsünso nokshing ainou lolaokü taiuau Mele nousoüh chhiau shioko nungko titso tsünoi.

³¹Yob, ni Goa hau angei shankiu wanküta loüh angei tsüsunloshi-e ta thalomo?

³²Ni aphio ahan ta ni Goa tü sangmo? naiuso tsümeikü chhisiyatsün laowanau ni mongchiomo?

³³Goa nou ti chhiji nung da ni nanphe, ni ti mongchioji nung apa hau chhikiu-iau shio-emo? Nung ngio ngü tsüde, lüko ni tapau noin; ni ti yangji nung samhau lo achite.

³⁴Ilatsün khaiunia pungkü nou atsüoting nungko mongchioha-e; angelatsün khaiunia sauhaiüh ngü ngiotsün lulaji ngüsoüh,

³⁵Yobüh mongyang tsünoikün ainou chiteji naiuso apaüh ngiotsün chikü nouko alat tsünoi ta ngio-e.

³⁶Yobüh ngiotsün alum tü thanekü lüyanglu; ni apa tsümeikün khaiunia tsaküh chitetsün khekkü eppe.

³⁷Apa angei nouso ta apa akhengshi nou hoilutji; sam chikü khako apaüh Goa lochiji.