Read Khiamniungan Naga Yob 37 Bible Online

Yob 37 - Khiamniungan Naga bible

Yob 37

¹Ah-ou-ahsheih nou jümong thsüokü toktokiji.

²Asam chikü nou Goa sang-i nou ta naiuso apa son ainou shihtsün ahmok nouso ta a-anglu.

³Apaüh ahsalap nou goh aniokun tsak ainou amao aniokun tsak saokü maou jithatkü hongji.

⁴Küta apa sang-i sübao ahmok sangh asong ngaotsün lulaji, naiuso apem ai ahsalap nou lapji.

⁵Goa ün athoilut nouko alekkat chhi naiuso athanga sübao samüh tsüngela nung thawaoji.

⁶Apaüh nyin nou goh chiai saoau thoilutji, naiuso apaüh ah-ou khiamtsang asong nou hongji.

⁷Apaüh khaiuniahoi chhi lolaoji; apaüh ti chhi au shioji nung ngüso hau hanji.

⁸Liu thainian nouso ngüso ken nai khuji.

⁹Ahthe ahsheih nou ajepekki ainou shiji, naiuso ahsheih adang nou ajenapki ainou shiji.

¹⁰Goa ün ilu nou khiam nouso tangiji, naiuso nungso nyinsonau phokle-iji.

¹¹Ahsalap awon nou thengmia ainou shiji,

¹²nungso Goa nou mongchiotsün nai kihji. Alummai goumchi thapekkü ngüso chhi chikü Goa athoilut nai chhiji.

¹³Goa nou loupenau ah-ou nou hongji; apaüh nung khaiuniahoi hau angja kiuau tsüdekünai ngüso hau apa atsüojinyang hanau hongau shiom.

¹⁴Yob, anglu; tsülemlemkü jam nyankü anoi; küta Goa athanga chhi nouso lüyanglu.

¹⁵Goa nou athoilut titi kiuji naiuso thengmia nouso ainou ahsalap titi shanji, nung ni ngejimo?

¹⁶Goa ün athanga chhi nung, titi thengmia nouso maou nai tsakeiji nung ni ngejimo?

¹⁷Tsüde, tilai shingan ahsheih nou goumchi thangmange ni aje jeknai angja aulu shio-e.

¹⁸Maou nou cheilaiu küta nung son atsoche tsakli shanau ni Goa hachuau shio-e süne!

¹⁹Goa tü ti ngio-e sam hau atsande; sam mong akeng jije; samüh ti ngioau tsünoi.

²⁰Ngü Goa ko chiteau tsüsange; Ngo apa hau ngü lotheanau tiauta atao kiu-e.

²¹Naiuso lo maou nai awon nou ouji, sam thaiutha nung ta athapau tsüshiokü ouji; naiuso ahsheih tsangkü maou nou yanthsüokü shipaniu.

²²Ajenapki ainou ajinka awon shiji, naiuso ahatau lümeikü nou Goa ajinka nou sam meankü noin.

²³Sam shimkü shiau tsüshiokü Goa ün ajinka thatü thsüokü noin; khaiuniahoiko apa chhisiya nai asio naiuso ngiotsüo noin.

²⁴Nungtiphe khaiunia pungkü apa khako ahat nou tsakü noin, naiuso sauhaiüh mongai ange ta vesankü yangji apaüh ngüso tsüwesaniji.