Read Khiamniungan Naga Yob 38 Bible Online

Yob 38 - Khiamniungan Naga bible

Yob 38

¹Nungai ah-ou-ahsheih ainou APAOU nou Yob ko chite. APAOU nou

²Ni tsüngekün ngiokeng nousoüh jü angelatsün tü sangau ni sau?

³Oukong suntsün melo tsak khekkü ni lo atsa küta ngo sangtsün athala.

⁴Ngü goumchi shantsün taoko ni nungko noilümo? Ni thatü ngenaito, ngü hau nung thaiutha achite.

⁵Nung tititso sungkü the-e ta sauüh thatsan? Tsüdekünai nung chiai sauüh athat auo nou tenthat? Ni nung athalatsün chikü ngejimo?

⁶Goumchi nou da thengkü noitsün kheam nouso teiüh thajeikü noin? Nung goumchi aniokun lung nou sauüh kitaium?

⁷Nungh ajekhaiu ahshiohchan nai kianthsüo nousoüh aikü jih nou hang, naiuso aün ainouso chikü nou ween.

⁸Tilai goh thaimongai nou paishin, sheasong lolaokü taiuau bekhan nouso sauüh kiapkü noiküla?

⁹Sheasong nou thengmia nou lojeikü anyakhem nai taiutsün nung ngo noiküla.

¹⁰Sheasong thaiutha elung nou ngü kitaiukiu naiuso nungphiai bekhan nouso nyijeikü wan.

¹¹Ngü ngiom, “Nungko yangkülu ni shiau shio-e! Akhiampek oukong nungko yangkü laoau noin.”

¹²Yob, ni aakihlaiu chikü nouko ajekhaiu tsak lüko ngiokhem tsangkü ngesani lümo?

¹³Ah-ngetao nou ta goh nou thaloau ngiokhem kiukü naiuso tsümeikünso ngüso haiulotsün athang ainou saiukeikü noin süne?

¹⁴Puja chiai hokngamthang tsangsheikü sungtsün naiuso nelai tsak khekkü anyi awon nou king naiuso tsamei nouso tsangsheikü iula-iji.

¹⁵Tsümeikünso thaiutha anyi awon nou thatü oukü noin naiuso tsümeikü chhitsün ainou ngüso tenjeikü wanji.

¹⁶Sheasong haiungan nai ni khulu lümo? Khiamnok chiai ni tsakei lulümo?

¹⁷Ee anyakhem goumchi ta hütsün bekhan nouso ajantsoüh ni hau nankü noimo?

¹⁸Goumchi titi sungkü noin nung thaiutha ni tso ngekü noimo? Ni nge naito ngo ta athashi.

¹⁹Awon ti ainou shiji tsüdekünai anyakhem sungtsün nung ti in ni ngejimo?

²⁰Tilektso khaai khu-e tsüdekünai phiai laokü hongshiau ni ngüso hau hanau shio-emo?

²¹Ngü monglamji ni shio-e, tiautenai ni thatü petchekü noin naiuso goumchi shantaoko lüko ni noiküla!

²²Ngü nyin naiuso san kamtaiutsün tsampai nouso ni sailukü noimo?

²³Angja tao, ehli naiuso ali-etsün ajekhaiu nouso thaiutha ngü nungso khemkü taium.

²⁴Aje sungtsün athang nai, tsüdekünai shingan ahsheih shitsün athang ai ni khululümo?

²⁵Ah-ou saoau thaiutha yam nou sauüh thaiusat naiuso ahmok ahsalap thaiutha yam sauüh losatkiu?

²⁶Sau tsükihkün nai aou sauüh ou-iji?

²⁷Khengliu nyimsanau, aletsün goh naiuso gohwai nou da khiam sauüh thsaji?

²⁸Ah-ou tsüdekünai khiamle nou po yangkü noin süne?

²⁹Nyin naiuso chonglungshi nou nyiu sau noin,

³⁰nungüh khiam nouso lüngau phokleji naiuso sheasong kha nouso lungkü iulaji?

³¹Pleiades kianthsüo pungh ni ke au tsüdekünai Orion auo nou ni sokthamau shio-e süne?

³²Ah taopungkü ni kianthsüo nouso niakeiau naiuso shap Asong si Ehen hau ayam hanau shio-e süne?

³³Maou nouso ta shingtsün ngiokhem nouso ni ngemo, naiuso nung ngiokhem nouso goh da lüko lolutau ni shio-e mo?

³⁴Ni thengmia nouso tü ah-ou saiukü Ou-iau thaiutha sangh athsüo nou veau shio-emo?

³⁵Ni ahsalap nou ta alap ta thoilutkü, nung shiküta ni ta, “Sam angiokhem ko noin” ta ngio-e mo?

³⁶Tilai Nile haiuthi shi-e ta Ibis khiam waio nou ta sauüh chiteji, tsüdekünai ah nou ou-e ta waiopong nou hau sauüh chiteji?

³⁷Ange nou sauüh thengmia weau shio tsüdekünai ngüso tsaketsai khep-ikü,

³⁸nung ah ou sübao nou pukhao nouso sunshikü tsola-iau shioji?

³⁹Chongkhao nouso, ngüso ken nai tsüdekünai ngüso tsam nai naiusilekü taiukü noitsün tao,

⁴⁰ngüso naiu lomeiau ni yangji süne?

⁴¹Athso nousoüh wekü ngo ta eheshiu sao nai eheau tsünoikü yamekeitsün Mükho hau sauüh eheshiu kiuji?