Read Khiamniungan Naga Yob 39 Bible Online

Yob 39 - Khiamniungan Naga bible

Yob 39

¹King wonthso nouso tilai apji ni nung ngejimo? Tsüdekünai jinchai nou athso pontsün ta ni thaplümo?

²Nungsoüh athso nou alei titso kanji ni nung ngejimo? Nungso ponsanau thaiutha atao nou ni ngejimo?

³Nungso kaukü napküta athso nouso goumchi ai ponsantsün ni ngejimo?

⁴Nung athso nouso liutsa nai oukongkü shejikanji; nungso khuji naiuso loto tilai tsülaoshiji.

⁵Liutsa gado nouso sauüh jashin? ngüso sauüh soktham küta tsakei-iji?

⁶Ngü ngüso hau liutsa nou ngüso tsamau theau kium, naiuso ngüso jem tsamei nai kihi.

⁷Angemtsün noknio nouso ainou ngüso laiukü pungekü noiji, naiuso sauüh ngüso thameloküta chhi chhi-iau tsüshio.

⁸Ngüsoüh tsamhetsün thsanyan nou king nouso noin, nungko ngüsoüh heau asangnya nou ta yamji.

⁹Tsüthamekün jangtsopong tsaküh nihau chhikiu-e süne? Tsüdekünai apa ajang tsamai saikiu-e süne?

¹⁰Ni nungso aou tsaküh phanloküta apa hau eiu a-iau shio-e süne? Tsüdekünai apa hau a eiu ai chap nou a pekei-e süne?

¹¹Ni apa oukong asong tü monglamkü ni nou achekting chhi apaüh chikiu-e ta yangau shio-e süne?

¹²Ni nou tsonyak nyatsün athang ainou tsonyak kamloküta apa hau ni nou be-eiuyam yamkiu-i-e ta yangau shio-e süne?

¹³Ostrich waio ekuk nouso titi oukong! Lüko ostrich waio tsaktso khiam waio tsak khekkü jeiau tsüshio.

¹⁴Ostrich waio nou ali nou lamkü noi-iau goh ai pu ongnai thiokü wanji.

¹⁵Liu thainian nou nungso lopekkan au tsüdekünai nungso hok nou ngampekkanau apa ti tsüolokü tsünoiji.

¹⁶Nung waioli nouso apa ün tsüdeli kankeiji, naiuso apa kowekü chhisantsün nung asapat ta tsüyangji.

¹⁷Nung waio hau angelatsün tsükiu kü apa aiu shantsün nung ngo noiküla.

¹⁸Lüko tilai apa ajingau tsalo-e, mokthso chiai noikü jingtsünso tü apa nyaiji.

¹⁹Yob, mokthso oukongitsün ni süne naiuso ngüso sangphi nai akoi potsün ni kium süne?

²⁰Ni ngüso jongku nouso khekkü hamiküta ngüso angaotsün nou khaiuniahoi lohatji süne?

²¹Ngüso tsamei nai achan nou monglingkü hamkeiji; naiuso ngüso oukong chikü nou ngüso ehlithang nai kopkü khuji.

²²Ahat ta ngiotsün alat ngüsoüh tsünge, naiuso ti salaiuüh ngüso phokle kiuau tsüshio.

²³Ngüso chiai mokthso noitsünsoüh suntsün ehli jengtsaiu nou aje nai ngüso ouji naiuso laplapji.

²⁴Tilai jangong matji, ngüso tsamkü noiau tsüshiokü, mokthso nouso amongchio nou ngaongaokü khaai jingkü khuji.

²⁵Jangong mattsün pungkü ngüso ngaoji; ngüso ehlithang shimkü moshikün khako ngüsoüh anyam nou ngeji, naiuso ngüsoüh asonghoi nousoüh vekü thoiluttsün ngiokhem angji.

²⁶Letche tsaküh ajeiau ni ainou angelo epji süne tilai ajepekki nai apa akoi nouso sapengji?

²⁷King atsok nai a-ap shanau letche tsaküh ni athoilut ta taiuji süne?

²⁸Lung atsokting nouso ta apa tsam shanji naiuso kingkhaiu nouso apa pe noin.

²⁹Tso tsak loat küta heau thaiutha nungai noikü ashimko si alaiu nai jiokü thapji.

³⁰Ee mea lemkü letche nouso kamshiji, naiuso letche thso nousoüh ashe nou shiuji.