Read Khiamniungan Naga Yob 40 Bible Online

Yob 40 - Khiamniungan Naga bible

Yob 40

¹Yob, ni Akongteng Goa tü tai-iu; Ni lo nungko laolo-e süne, tsüdekünai ni thashi-e?

³Ngü aiuhai khekkü chite- iu, APAOU. Ngü ti thalaau shio-e? Ngü titso chiteshiau tsükowe-e.

⁵Ngü ngioau nou chiai ngü ngiowaniu.

⁶Nungai APAOU nou Yob tü ah-ou-ahsheih nai thalakü loühjam chitekü ngiom. APAOU Nou

⁷Melo tsak khekkü lo atsa, naiuso ngü sangtsün ta athashi.

⁸Ni ngo ngiotsüo tsüde ta hanau ngo tsüthakünai naiuso ni apen nai taiuau ni koweji süne?

⁹Ni ngoli kongkü noin süne? Asangüh jüsang chiai sungkü ngao au shio-e süne.

¹⁰Shio-e ta naito, ni nou asuhat si abülom nai atsa; apin neshe ajinkakü atholo.

¹¹Nungso abülomhoi nou ta athaplu; ni amongmat losan küta ngüso lüthatsam.

¹²Ah, abülom nouso chikü ta thaplukü, ngüso alonyappan; tsümeikünso ngüso tsakü noitsünko sutnekü awan.

¹³Ngüso chikü goh ai akhanan; ngüso eantsün goumchi nai kekü awan.

¹⁴Nungaito ni lomsanau ngo chong noi-e naiuso ni achija ashiotsün ep ta mongtsame.

¹⁵Behemot thainian asongting nou ta athaplu; Ngü apa shan naiuso ngü ni shan. Apaüh jangtso tsak khekkü khengliu heji,

¹⁶lüko apa pemai ti akong noin, naiuso apa tsa nouso ai ti oukong noin!

¹⁷Cedar pai tsak khekkü apa mi lemlemji, naiuso apa hok nouso ai tsaphan nouso kongkü noin.

¹⁸Apa ou nouso taosonli tsüokü noin, naiuso apa hok nouso sonlai khekkü.

¹⁹Ngü shantsün thainian chikü nouko nung thatü athanga! Apa shantsün noulu apa shioheau shio-e.

²⁰Apa tsadau thsanyan nouso king nai, liu thainian lomhetsün nai sungji.

²¹Apa tsao-eng nouso khemai saiji, naiuso puchet ongnai apa pamji.

²²Tsaopai-eng nouso si haiusai taopon nousoüh apa hau ngüso ahkhemso nou kiuji.

²³Haiu tsangtsünko apa hatkü tsünoi; Yordan haiu apa son shimkü tsanglüko, apa mong tsamkülu noiji.

²⁴Sauüh apa niovei lopek kiuküta apa thalouau shio-e? Tsüdekünai sonjin auo nouko sauüh apa ngan thalouau shio-e?