Read Khiamniungan Naga Yob 41 Bible Online

Yob 41 - Khiamniungan Naga bible

Yob 41

¹Chong chajeen tsak ni ngoutai aou tsaküh thalouau shio-emo? tsüdekünai apa lei auo tsaküh kejeiau shio-emo?

²Au tsak ni apa ngan nai phanlutau shio-emo? tsüdekünai apa kup ta ngoutai auo tsak phanlutau shio-e?

³Apaüh apa khu-iau ni tü koja-e süne? tsüdekünai apaüh ni tü atsüojinyang thaiutha koja-e süne?

⁴Apaüh niko athalou-e tsak shanküta ni asaita yathsüo-e ta thalou-e süne?

⁵Waio thso tsakli ni apa, yathsüotsün menyiuthsohoi monglingiau phantaiu-e süne?

⁶Ngouphek hoi nou apa amai tsülou-e süne? Chaijan haiüh apa tapneküta jane süne?

⁷Ngou taison nou ni apa khun chatkü lapau shio-emo? tsüdekünai lai tsaküh apa khaiu ai chisatau shio-emo?

⁸Apa tü jam lüthantan, naiuso ni tilaitso müjam thantanshiau tsükoweshi-e; ni ehlitsün tilaitso tsübeane!

⁹Chong chajeen nou sauhaiüh eppe ngüso monghenkü ta goh ai loianji.

¹⁰Tilai apa monglingji, apa thatü jeji; apa khako sau tsakü tsünoisom.

¹¹Apako likü ta loüh sau aa noishiau shio-e? Goumchi chikü nouko sauüh nung chhiau tsüshio-e.

¹²Ngü ni hau chong chajeen hok nouso thaiutha chiteko naiuso apa titi oukong asong nung thaiutha ngioko.

¹³Sauühtso apa a-chikhunthe lowanau tsüshio tsüdekünai apaüh thotaiutsün sheitho nouso chatkü langau tsüshio.

¹⁴Sauüh apa ahat au lümeikü nou hou samtsün kup nouso kopeng-iau shio-e?

¹⁵Apa ngamtha nou lungli jüokü ahoi yangkü tsapkü naiuso mongkü shan.

¹⁶Ajet nouko ahsheih intsotso napau tsüshiokü tsak si tsak ko mongkü thsanekü noin.

¹⁷Nungso chikü tiühtso amomo janeau tsüshiokü hau nungso mongkü jei-ekü noin.

¹⁸Tilai apa hatshio ngioji ahlap lapji, naiuso apa niovei nouso ajepektsün khekkü okü noin.

¹⁹Apa son ainou in ou, naiuso in pe sungkhuji.

²⁰Apa ngan ai inkhao shiji, nung chih-ai lak tsak ainou inkhao sungtsün khekkü noiji.

²¹Apa ilo nouko in nyaisanji, inpe nou apa son ainou sungkhuji.

²²Apa sang thatü kongkü noin naiuso nung wao-etsünso hatkü noiji.

²³Apa khun nai tsaosilao athang tsaktso tsünoi; nung son yapekü noitsünli mongkü noiji.

²⁴Apa mong ahat tsünoikü lungli tsüokü noin, naiuso nung anoipektsün lungli jüochekü noin.

²⁵Tilai apa asai ainou tsaji, akongting nouso lüko hatji; ngüso angioau tsüshiokü hatatji.

²⁶Apa tawaiau shiokühau amao ti dun tsünoi; uokopchon, tsüdekünai pailaiüh lüko apa tawaiau tsüshio.

²⁷Apa thaiutha son lüko tsokap khekkü noin, naiuso taoson nou paichoi tsak khekkü noin.

²⁸Apa jingkü khu-iau nungko amao ukopchon titso tsünoi; apa ta lung yakluttsün nung tsokap khekkü noin.

²⁹Apa khako pailai tsak nung tsokap tsak khekkü noin, naiuso apa tü lai nou langnai apa nyaiji.

³⁰Apa thaikhun nung lakpai khekkü noin: nungsoüh asutnetsün khekkü puchet goh nou sutneji.

³¹Apaüh sheasong nouso khiamputtsün khekkü shipekji naiuso nung khaiutsom lak tsak khekkü leichiomükong sungiji.

³²Apaüh apa phiko yam sanglingkü wanji naiuso sheasong nou leichiomükong athaiu iula-iji.

³³Goumchi ko apako we-eau ti tsünoi; apa ahat tsüsunkün thainian tsak noin.

³⁴Abülomtsün thainian nouso ta apaüh ti wesankü tsünoi; apa liuthainian chikü khako nokpao noin.