Read Khiamniungan Naga Yob 42 Bible Online

Yob 42 - Khiamniungan Naga bible

Yob 42

¹Nungai Yobüh APAOU nou tü thalan. Yob

²APAOU, ni Akongteng; ni mongchiotsün alum ni chhiau shioji ta ngü ngeji.

³Ni nou angelatsün ta ngü titi sangsomji ta ni sangh tilai ngo thatü a-aiu noiküla. Ngo tsüngelakün chhisiya thaiutha ngü chite, nung jü thaiutha angelaau thatü athanga tsak noiküla.

⁴Ni chitetsün taoko ni ngo tü angluau ngiom, naiuso ni sangtsün ta thalaau akowe ta ngiom.

⁵Ngo ayanan taoko ngü amaohaiüh ngo hau chitetsünlu ngekü noiküla, lüko lo ngü ni jünioveiüh epiu.

⁶Nungtiphe ngü ngiokü shitsün chikü thaiutha ngo miamji naiuso pusilou laokü mongphokleji.

⁷APAOU nou Yob ko chitetsün khemküta Apaüh Elifaz tü ngiom, “Ni naiuso ahai nimeko ngo mong- matji, tiautenai jü tsamki Yobüh chitetsünli, asamüh jü thaiutha ngiotsüo nou tsüchite.

⁸Lo jangtso- pong chinyat naiuso onnemokpong chinyat alou küta Yob dongai kankü khukü nungso asam thaiutha aloat chaithio lüthio. Yobüh asam thaiutha mi saokiu-e, naiuso ngü apa misao thala-e, naiuso asamüh epau maikü noitsün amiam nou tsülomiame. Apaüh chhisiyakü shitsünli asamüh jü thaiutha ngiotsüo nou tsü- chite.”

⁹Elifaz, Bildad, naiuso Zofarsoüh APAOU nou ngüsotü ti chhiau ngiom nung chhin, naiuso APAOU nou Yob misao thalan.

¹⁰Yobüh apa hai süme nouso thaiutha mi saokütün phiai, APAOU nou apa loüh tsüomeikü shankiushin naiuso apa hau apaüh nung khako taiutsün tü haoson nime nou phopkü kiushin.

¹¹Yob ün deisinio naiuso nousinio loüh akeng paiusihaiso chikü apa sailuau shi naiuso apa tsamai apako ngüso sümai noiküla. APAOU nou apa khako angja kankü shikiutsün chikü thaiutha ngüsoüh ngüso atsüojinyang hankü apa aalo-i. Ngüso pungkü nou apa hau chai naiuso chaiou lakkeng khiaptso nouso kium.

¹²APAOU nou Yob aa nouko apaüh achongnai oukkiukü shitsün ko naito apa aa athon nai tekkü oukkiu. Yobüh onnemok heng 14, 000, ut heng 6000, jangtso heng 2000, naiuso gado heng 1000, taiuküla.

¹³Apa, thso melothso chinyat naiuso menyiuthso süme po noiküla.

¹⁴Apaüh menyiu- thso yamchong nou Jemima ta niankiu, niowem nou Kezia ta, naiuso niophi nou Keren Happuk ta niankiukü noiküla.

¹⁵Yob ün menyiuthsosoli athapau alengmei goumchi athum nouko sautso tsünoiküla. Ngüso poüh ngüso hau ngüso deisoko aikü tengkam haoson kiukü noiküla.

¹⁶Nungphiai Yob aakihlaiu pon 140, apa thsaoso naiuso thsaoli nouso saokü epkü kih.

¹⁷Naiuso apa ve somkü kiheküta asonkia nou ean.