Read Khiamniungan Naga Yob 6 Bible Online

Yob 6 - Khiamniungan Naga bible

Yob 6

¹Jü angja si amongkia nouso tsoi nouko thatlu naito,

³khiamnok singtso nouso chiai tsoi nouko sunge lüsao, nungtiphe jü ngioyak akong nousoüh ni tsülekkat au noin.

⁴Akongteng Goa chon nousoüh ngütü kopiu, küta nungso sheh nou jütsopem thapekkü pengkü khu-iu. Goa nou apa atsao nou ngo thako lemlokü noin.

⁵Tilai khengliu heji gado mongtsamji, naiuso tilai tsokap heji jangtso tsamkü noiji.

⁶Lüko sauüh tsüsamkün, jem tsüthiokün chihsikhiam heau shioji? Waili monglung khup athaiu nou ta ti anyaothing noin?

⁷Nung khekkü ngo chihsikhiam heshiu au thaiai tsünap, naiuso ngo hetsün alum nou ngü akia iulaji.

⁸Ngo sangtsün Goa nou tiau tsükiu-e? Apaüh jü misao tiauta tsüthala-e?

⁹Apaüh lu ngo loatkü wantünto!

¹⁰Apaüh nungli chhi-e ta ngo ngetünto, jü akia to titi songkü noilünou ngo amongling nou hamela. Goa to asio ta ngü ngeji; Apaüh ti thoilutji ngü tilaitso tsükhengshi.

¹¹Aa tsülaokü kih noiau ngü tü oukong ti noishin? Ngo ti ayangtaiu tsünoishikü tiau aa kih noi-e?

¹²Ngü lung kamshikü shithotaim süne? Jü shesinyih nung taoson süne?

¹³Ngü jüpem kipsanloau loto ti oukong tsünoishi; ngo ahachu thaiutha sheilükhunau tiaitso athang tsünoi.

¹⁴Ngü Goa lean süne tsülean, nungtin angja taoko ngü ngiotsüo paiusihai poji.

¹⁵Lüko asam, jü paiusihaiso, haiuthso nouso ah-tsü ou künai wailiangkü khuwantsün khekkü, asamüh ngo sapthio-iu.

¹⁶Haiuthso nouso khülia naiuso nyin nou pokjeikü noin,

¹⁷lüko alam naito ngüso mowanji, naiuso haiutso thang nou awai naiuso akeng noianji.

¹⁸Thainian kamkü tsakeitsün tao haiu thaiutha yam nai tsüepji; ngüso tsakeikü noiküta singtso goh nai mowanji.

¹⁹Sheba naiuso Tema ainou thainian hoi nou yamji,

²⁰lüko ngüso mongyang waikü noitsün haiuthsokuk nouko mowanji.

²¹Jü thaiutha asam nung haiuthso nouso khekkü noin. Asamüh jü akuo epküta ahat nou soikü khuji.

²²Asam tü ngü paopei tsak akiu ta tsüdekünai jü kothako ajantso hau nekhem paopei lükiu ta

²³tsüdekünai ee angja kiutsünso ajantso ainou ngü akipsan ta ngiom süne?

²⁴Nyu, ngü hau atsande: Jü aphio nouso ngü hau achite. Ngo tsamlokü noi-e naiuso asam tü anglu-e.

²⁵Ngiotsüo ngio nouso titi oukong, lüko asamüh ngio uo tsünapkü ngio chiteji.

²⁶Ngo chitetsün ngio asamüh ahsheih ngiota yangji; nungaito tiauta asamüh jü amongmat ngio nouso tü thashiji?

²⁷Asamüh mejet me-uo nouso thaiutha saokü phongdeji naiuso asamüh meshen paiusihaiting nouko nou asam chija memeiloji!

²⁸Ngotü kha nai athaplu. Ngü yaang tsüngio-e.

²⁹Asam thatü laiukü khuwanniu. Ngiotsüo tsüdekün ainou nungko alaolo. Ngo laphio-i. Ngo thakü nai noin.

³⁰Lüko asamüh ngü yaang chiteji ta yangji — ngo tsüthakü ainou atha nou chiteau tsüshio-e ta asamüh yangji.