Read Khiamniungan Naga Yob 7 Bible Online

Yob 7 - Khiamniungan Naga bible

Yob 7

¹Khaiunia aa nou süpai chhisiya oukong, achek chaichen chhisiya aa tsak khekkü,

²tsamki tsak chhisiya nai ah-khemso aiutsün khekkü; chhi chhitsün tsaküh apa amai epau taiutsün khekkü noin.

³Ngü alei ainou alei ta ngo kih au ti tsünoiji; asoh ainou asoh nou ngo hau amongsaiu kankü shikiuji.

⁴Tilai ngo asaiau monlühongji, atao nou laiula anji; Ngo asoh chikü monkeikü ah-nge nou ta mongchetji.

⁵Jüpem sung nousoüh mean; nung chaikia khup nou lopokkü noin; jü mou nouso ainou tsao thsan-iji.

⁶Jü ajekhaiu nouso ayang tsünoikü yanlükhunji, nung nela shimphean tü khaolaokü khuwanji.

⁷Oh Goa, jü aa nungto ilo tsaklu ta ayangsan; jü amongling nou thonaniu.

⁸Ni ngo lo epji, lüko tilaitso tsüepshi-e. Ni ngo tü yam nai, ngo khuwankü noi-e.

⁹Thengmiakhao asun tsak nyiomkü khuwantsün khekkü, khaiunia tsak eanji loüh tilaitso laokü tsüshi shiji; sauhaiüh apa ngekü noiküla nungso chikü nou apa peanji.

¹¹Tsüde! Ngo tsamkü noiau tsüshio! Ngo khosakkü mongmatji. Ngo singioau noin.

¹²Ni ngo tiauta ehükü wan? Ngo she asongai noitsün thainian tsak ta ni yangjiso?

¹³Ngo monlühong küta ahlou au koweji; Jü akiasung ainou ngo atsamlou au thaiutha yamji.

¹⁴Lüko ni ngo meamean nou lohatji; ni jüdongai atsangshei naiuso meamean nouso hongshiji.

¹⁵Nung akuothe pem aa noitsünko naito ngo thsa-atkü wannaibao chenela.

¹⁶Ngü leanji; ngo aakih nou oukiakü noin. Ngo pemsa awan; tiautenai jü aa nung isa tsaklu noin.

¹⁷Athaiutha khaiuniathso nou tiauta thatü atengting noin? Apaüh ti chhiji nung ta tiauta mongkiuji?

¹⁸Ni apatü ahom tsütokü sailuji naiuso apa münet pungkü theluji.

¹⁹Jü lei mioliau thaiuthako jü thaiutha ni tilektso jüdongai tsüthapkü noisome?

²⁰Ni aketsam jimtsün, jü angeiüh ni tawain süne? Awatthat dunluau ngo tiauta kankeiji? Athaiutha ko ngo thsale asong tsak süne?

²¹Jü angei tilaitso ni wankiuau tsüshio süne? Jü aphio chhisiya nai wankiuau tsüshio süne? Shakta ngo jü etam nai nappan-e, naiuso tilai ni ngo yame nungaito ngo khuwankü tha-e. Bildad