Read Khiamniungan Naga Yob 9 Bible Online

Yob 9 - Khiamniungan Naga bible

Yob 9

¹Ah, ngü nung chikü nung khako lulakü noiküla. Lüko titi thekü khaiunia tsaküh Goa thako apa mi shiolo-e?

³Sau khaiuniaüh apako ngematau shio-e? khaiunia sauüh tilaitso thalaau tsüshio Apaüh heng tsak ngoikü asang noiau shio-e. Lüko sauüh athashiau tsüshio.

⁴Goa to thatü ange naiuso oukong; khaiunia saulünou apa khako tsaau tsüshio.

⁵Alohat tsühakü apaüh king nouso soianji naiuso amongmat nai apaüh nungso lotheanji.

⁶Goa nou gohhaiu nou hongji naiuso goh nou da saiusaiuji; apaüh goumchi thengsantaiutsün kheam nouso ta khuoji.

⁷Apaüh aje apektsün ainou lolao au shioji, naiuso asoh kianthsüo thso nouso awontsün lolaoau shioji.

⁸Sauüh tsühachukü Goa nou aün nouso khongpeng- tsüdekünai khiamnok akongting thainian chiai ngamlut.

⁹Goa nou kianthsüo nouso maou nai phankü wan-Asongting shap, Orion, Pleiader, naiuso ajepekki ainou kianthsüo nouso.

¹⁰Apaüh chhisiya asong chhitsün samüh tsüngela, naiuso apa athanga chhisiya nou ta nungko athon tsünoi.

¹¹Goa yankü khuji, lüko ngü apa epau tsüshioji.

¹²Apa ti mongchioji apaüh lowanji, naiuso sauüh apa loyangau tsüshioji “Ni ti chhisiyaji?” ta sangau sauüh lüko tsüsomji.

¹³Goa amongmat tsüli-eji. Apaüh apa ehoiso sheasong thainian sauüh Rahab hachukü khengshi-e, nung noipekji.

¹⁴Nungtiphe Goa tü thalaau ngü ti ngioyak eplou-e?

¹⁵Ngo aphio tsünoi lüko, ngü chhiau shiotsün to, jü asio Goa ainou atsüojinyang sao aulu noin.

¹⁶Loüh nungti apaüh ngü hau singio-i lüko, apaüh ngü tü anglu-e ta ngü mongtsülamji.

¹⁷Ngo nelangkü lone au ti koko ta tsüdetengkü apaüh ahthe hongji.

¹⁸Apaüh ngo hau ilu tsülo-i; apaüh jü aa akhosak nou mean-i-iu.

¹⁹Ngü oukong tonlu-e süne? Goa ko oukong khenge-e süne? Ngü apa mikhem tsamai kankü khu-e süne? Khaiunia ajantsoüh apa khu-iau shio-e süne?

²⁰Ngo aphio tsüsun naiuso saitha, lüko jüngio aphioli iula-iji, naiuso ngü ngiotsün alumüh ngo saowaniauli noiji.

²¹Ngo aphio tsüsun, lüko ngo ayang tsünoi. Ngo aakih nou akia noin. Titso tsüngenge; aphio tsüsun lüko sun lüko, Goa nou sam lomowane.

²³Tilai aphio tsüsunkün khaiunia alekta eanji, Goa nou nyaiji.

²⁴Goa nou nung goumchi akausai nouso hau kiuwan. Apaüh mikhemhoi chikü niopek iüla-in Nung goa nou tsüdekünaito, sauüh chhin?

²⁵Jü ajekhaiu nouso she-ekü khuwanji, nungso tsak lüko amei tsünoi.

²⁶Letche tsak sao tsak tü liukü nap potsün khekkü, jü aakih kheng akhaolaoting tsak khekkü yananji.

²⁷Ngo jü akiasung pe-anau thaiutha kowekü nyai lüko, jü angja nouso chikü nou ngo penkiuji. Goa nou ngo aphio ta thalouwan ta ngü ngeji.

²⁹Ngo aphio nai thalouwanphe, ngo tiauta yangelate?

³⁰Jü angei nouso tsowoi nou tsaowanau tsüshio.

³¹Goa nou ngo achinyan khan nai yakthiowan, naiuso jü nesheso lüko ngü lon miamji.

³²Goa nou khaiunia tünto, ngü apa tü thala-ela; sam li-etsün lothamao sam mikhem tsamai lüko khuau shioküla.

³³Lüko je jetko napkiuau tsaktso tsünoi- Goa si ngo nemtso ta sauüh mikhemau tsünoi.

³⁴Ngo hau angja kiutsün alaolo, Goa! Ni ahat au lümeikü ngo ainou lolaokü ataiu!

³⁵Ngo hatkü tsünoi. Ngo chite-e tiautenai ngü jü mongpem ngeji.