Read Khiamniungan Naga Nianlom Jih 10 Bible Online

Nianlom Jih 10 - Khiamniungan Naga bible

Nianlom Jih 10

¹O APAOU, ni tiauta thatü laiukü soikü noian? Sam angja taoko ni tiauta pamkü noianji?

²Tsümeikünsoüh ngüso abülom nai angja hai jeiat-iji; ngüsoüh shantaiutsün jin nai ngüso lüthalou.

³Akausai khaiunia nou apa tsümeikün achinek mongyang nai bülomji; pumsiwom khaiunia nou APAOU tsülouji naiuso athesanji.

⁴Akausai khaiunia nou APAOU thaiutha ti wesankü tsünoiji; apa abülom nai apaüh Goa pokü tsünoi ta yangji.

⁵Akausai khaiunia tsak nou alumko ashio epji. Apaüh Goa ün mikhem nouso tsüngelaji; apa ehso ta lochilotsaokü apa chiteji.

⁶“Ngo ashio tsüepkü tilai tsünoi-e; Ngo tilaitso angja nai tsünoi-e,” ta apaüh meshen chija ngioji.

⁷Athesan, akausai, akhisilat noulu apa ngiosingio meankü noin; achinyan, tsümeikün ngio nouso singioau apa khaolaoji.

⁸Apa nokmong nai pamkü noiküta tsüepkün taoko aphio tsünoikün khaiunia loatji. Ahachu au tsünoikünso tü apaüh kauthaji;

⁹chongkhao nou apa ajiothang nai jiokü taiutsün khekkü. Angja hai thalouau apaüh taiukü noiji; apaüh ngüso apa jinai thalouji küta kankü khuwanji.

¹⁰Ahachu au tsünoikünso oukong suntsünsoüh shioloküta thamiakü leanji.

¹¹Akausai khaiunia nou apa mongai ngioji, “Goa nou beaniu! apa niovei maishikü noianphe ngü tilaitso tsü eppe!”

¹²O APAOU, akausai khaiunia hau angja lükiu! sauhai omheji ngüso ayangsan!

¹³“Apaüh ngü hau angja tsükiu-e” ta akausai khaiunia tsaküh titi Goa lotsaokü meshen chija ngioau shio-e?

¹⁴Lüko ni nung epji; angja si omhetsün ngem nou ni ngoi-iu naiuso asaita ahachuau khemlokü noin. Ahachu tsünoikün khaiunia nou meshen pem thumkü nihau kiuji; ni apotsünso ta asaita hachukü shin.

¹⁵Akausai naiuso tsümeikün khaiunia nouso oukong ni alothean; ngüsoüh tsümeikün chhi molaoloukün lektso ngüso chhisiya tsüthakün thaiutha ngüso hau angja lükiu.

¹⁶APAOU athontsüyang thaiutha nokpao noin. Sauhaiüh amao goa nouso amji ngüso apa goumchi ainou mowane.

¹⁷O APAOU, ni tsamlokü noitsünso misao ta anglu-e; ni ngüso hau mongnyan nou kiu-e.

¹⁸Athangmang nai noinso si mejetthso nouso misao ni lula-e; nungtiphe eantsün khaiuniathso nou loto alohat tilaitso tsükiushi-e.