Read Khiamniungan Naga Nianlom Jih 102 Bible Online

Nianlom Jih 102 - Khiamniungan Naga bible

Nianlom Jih 102

¹O APAOU, jü misao tü anglu, naiuso ahachu thaiutha ngü wetsün alula!

²Tilai ngo angjanai noiji, ngü ainou phoklekü lakhuwan! Ngütü anglu, naiuso tilai ngo jone liukü athala!

³Jü aakih nung inkhao khekkü mowanji; jüpem nung in nou chethe-antsün khekkü noin.

⁴Ngo khengliu awon khekkü chipsanankü noin; ngo eheshiu thaiutha tsümongchioshi.

⁵Ngo thsüokü ngetji; nungüh uo si khunlu iulakü noin.

⁶Ngo liutsa nai liu waio tsak khekkü noin, aodangkü nai anyawaio tsak khekkü noin.

⁷Ngo nio tsüngaoji; Tsamkhaiu nai pemsatso noiantsün waiothso tsak khekkü ngo noin.

⁸Ajekhaiu thathonkü jü ehsoüh ngü lochi lotsaoji; sauhaiüh ngo lotsaoji ngüsoüh jünian athesan nai kankeiji.

⁹Ni mongmat naiuso mongthe shioko, jü eheshiu posilou nouso noin, naiuso ngü shiutsün nung niochekhiamko lao-ekü noin. Ni ngü tenthsa küta yakkan shin.

¹¹Jü aakihlaiu nung ahsham ahkhemsoh khekkü noin; Ngo khengliu awon khekkü noin.

¹²Lüko nito, O APAOU, asaita nokpao noin; naiuso vetao chikü nou ni yangsane.

¹³Ni tsalouküta Zion tü atsüojinyang hane; apa khako atsüojinyang noi-au atao saokü noin; nung lo ataoting noin.

¹⁴Apa lotheankü noi lüko; ni yathsüotsünsoüh apa tsüojinji, apato pukhao iulakü noilüko, ngüso atsüojinyang apa khako noin.

¹⁵Mele nouso APAOU lon hate; goumchi nokpao nouso chikü apa oukong lon hate.

¹⁶Tilai APAOU nou Zion shanshi-e, apaüh apa ajinka tsangsheikü hane.

¹⁷Apaüh leantsün khaiuniahoi misao apaüh lula-e naiuso ngüso misaotü ange.

¹⁸APAOU nou ti chhisiyakü noin nung ashiau noitsün vetao thaiutha satkü ataiu, nungaito lo mochetkü noitsün khaiuniahoi nou apa lomsane.

¹⁹APAOU nou apa asiothang ainou thapiji, apaüh aün ainou goum ai thapiji.

²⁰Apaüh akhothionai noitsün khaiuniahoi ngettsün lula, naiuso loatanau noitsün ainou sokshin.

²¹Nungtiphe apa nian Zion nai wepenge,

²²naiuso tilai mele nouso si nokshing nouso aikü kamshikü ta APAOU nou amkhame, Yirusalem nai apa lomsane.

²³Ngo methso taoko aida APAOU nou tsaosilaokü shan; apaüh jü aakih loletkiu.

²⁴O Goa, ngo mosunkün taoko loto ngü lakanlükhunan. O APAOU, ni athontsüyangkü noiji.

²⁵Pe da ni nung goumchi shan, naiuso aphaüh aün nouso shan.

²⁶Ngüso yankü khuwane, lüko nito noi-e; nungso chikü neshe khekkü nyi-ankü khu-e. Neshe nouso khekkü ni nungso wanane, naiuso nungso mowane.

²⁷Lüko nito asaita wekülu, naiuso ni aakih laitso athontsüyangji.

²⁸Ni yathsüotsünso thsoso asaita noi-e, naiuso ngüso thsaosithsoso akhako mongkü kih-e.