Read Khiamniungan Naga Nianlom Jih 104 Bible Online

Nianlom Jih 104 - Khiamniungan Naga bible

Nianlom Jih 104

¹APAOU lülomsan! jü onthso, O APAOU, jü Goa, ni titi asong! Ni nianlom naiuso ajinka nou thopukkü noin;

²ni apem awon nou lopukkü noin. Ni aün nouso nejenkhio khekkü sapengkü taim

³naiuso maou nai khiam nouso chiai tsam nou lahkü noin. Ni thengmia nouso ehli tsamkeili kankeikü ahsheih ekuk nou chiai ni mokkü noin.

⁴Ahsheih nouso ni angiongem kanau kankeiji naiuso ahsalap nouso ni yathsüotsünsoli kankeiji.

⁵Ni goumchi nou nung athanya nou chiai mongkü noilutkü taim, naiuso nung tilaitso tsülemleme.

⁶Ni nung chiai khiamnok nou sheitho tsakühli loijeikü taium, naiuso king nouso khiam nou loipokkü wan.

⁷Ni tilai khiam nousotü thutji, ngüso khulükhunanji; tilai ngüsoüh sangh asong nou lula-e ngüso liuliukü khuwanji.

⁸Ni ngüso thaiutha shantaiutsün king naiuso tsamei nouso ai ngüso tsangthioji.

⁹Goumchi loüh tsülimkü taiuao, naiuso laoau ni elung tsak shankü taiukiu.

¹⁰Ni haiuthso nouso tsamei nai tsang au naiuso, haiu nouso king nouso jetko tsangkei ao shan.

¹¹Liu thainian nouso thaiutha ngüsoüh khiam nou shenji; nungko liuai noitsün gado nouso letsün thasangji.

¹²Shimkü pai nouso da, liu waio nousoüh ap shanji naiuso jih hangji.

¹³Maou ainou king nai ni ah-ou hongji, küta ni nou ouküh goh nou mianji.

¹⁴Thainian thaiutha ni khengliu samsan-iji naiuso khaiunia nou kankeiau thaiutha paisam, nungti apaüh chihsikhiam asanau thaiutha

¹⁵apa monglengau theng sungiji, apa monglingao Olip khiam naiuso apa hau oukong kiuau themtsai lousanji.

¹⁶Apaüh thomtsün APAOU pai nouso Lebanon nai Cedar pai nousoüh ah-ou nou saiukü epji.

¹⁷Nungko waio nousoüh ngüso ap shanji, naiuso khiam waio nouso ap Fir pai nouso ta shanji.

¹⁸Liu ai noitsün won nouso king atsok nai kihji, naiuso shipthso nouso lungkap nai pamloji.

¹⁹Ni alei nou ataothat hanau thaiutha shan; aje nou apa napau atao ngeji.

²⁰Ni asoh nou shan, naiuso nung anyakhem nouko liu thainian nouso tsakeiji.

²¹Chongkhao thso nouso Goa nou kiutsün eheshiu homhe au ngaokü tsakeiji,

²²Tilai aje nou sungji, ngüso laokü khukü ken nai sai-anji.

²³Nungai khaiunia nouso ngüso chhi chhiau tsalokü khuji naiuso ahsham saokü ngüsoüh tsülaokü chhiji.

²⁴APAOU, ni chhisiya piakü chhikü noin! Nungso chikü ni titi mongthat amei nou shan! Goum nou ni shantsün nou miankü noin.

²⁵Ni khiamnok songkü naiuso punkü shan, nung khiam thainian nou miankü noin, ehen naiuso asong aikü kihji.

²⁶Nung chiai kheng nouso keiji, naiuso ni shantsün khiam thainian akongting Leviathan nou nungko lomji.

²⁷Nungso chikü nou ngüso naiutsün taoko ngüsoüh eheshiu epau ni da monglamkü noin.

²⁸Ni nung ngüso hau kiuji, naiuso ngüsoüh nung heji; naiuso ngüso mongtsamji.

²⁹Tilai ni lapkü khuji, ngüso hatkü noiji; tilai ni ilo nou kankü khuwane, ngüso eanji, küta ngüso pu au laokü khushiji.

³⁰Lüko tilai ni ngüso hau ilo nou kiuji, ngüso shanshiji; ni goh hau aa ayan nou kiuji.

³¹APAOU ajinka athontsüyangkü lünoi! Apa chhisiya nai APAOU monglingkü lünoi!

³²Apaüh goh nou ta thapji, naiuso goh nou ngaongaoji; apaüh king nouso ta thanji, naiuso ngüso da inkhao nou shiji.

³³Jü aakihlaiu chikü ngo APAOU tü jih jih-e; ngo aakihtsün lektso jü Goa lomsankü jih jih-e.

³⁴Jü jih nouko apa lümongleng. Tiautenai ngo monglingtsün apa ainou shiji.

³⁵Angeihoi nouso goumchi ainou lomokü lüwan; loto tsümeikünso lanoi-ishi. APAOU lülomsan, O jü onthso! APAOU lülomsan!