Read Khiamniungan Naga Nianlom Jih 105 Bible Online

Nianlom Jih 105 - Khiamniungan Naga bible

Nianlom Jih 105

¹APAOU hau nianlom lükiu, apa asong nou lüwepeng; apaüh ti chhin nung mele nouso hau lüchite.

²APAOU nou tü alomsan jih lüjihlut; apa athanga chhisiya nouso thaiutha lüchite.

³Sam apa ün noin ta lümongleng; apa amkhamtsünso chikü lümonglenge.

⁴Ahachu yamkü APAOU dongai asam lükhu; naiuso tsülaokü apa lü-amkham.

⁵Asam apa yathsüotsün Abraham thsaosithsoso; asam apaüh chosantsün khaiunia Yakob thsaosithsoso: Goa nou athanga ii chhitsün naiuso apaüh mikhem kiutsün lüyangsan.

⁷APAOU nou sam Goa noin; apa ngiokhem goumchi chikü thaiutha noin.

⁸Apaüh apa athalou-etsün asaita taiu-e, apa athalou nouso vetao heng thaiutha noin.

⁹Apaüh Abraham ko ngiomongshing shantsün naiuso Isak tü thaloutsün taiu-e.

¹⁰Athontsüyangkü taiu-au APAOU nou Yakob ko athalou-etsün tsak shan.

¹¹“Ngo asam hau Kanan goumchi kiu-e,” “Nung asam thaiutha tengkam noi-e,” ta apaüh ngiom.

¹²Goa khaiuniahoi haowe nai thsaothsaokü noiküla, ngüso Kanan goumchi nai mesan noiküla.

¹³Ngüso goumchi tsak ainou goumchi tsak ai, nokshing tsak ainou tsakai ta tsakeikü noiküla.

¹⁴Lüko Goa nou ngüso sauhautso tsüthangmangi; ngüso kiploau, apaüh nokpaohoi tü atsüoloau ngiom:

¹⁵“Ngo chosantsün hoi ta ti lathantan; jü epohoi nouso ta lathantan.”

¹⁶APAOU nou ngüso goumchi ai naiusile hong küta ngüso chihsikhiam chikü kankü khuwan.

¹⁷Lüko apaüh ngüso khako khaiunia tsak hongtaiu, nung Yosep, sau sua tsakli janthiowankü noiküla.

¹⁸Ngüsoüh apa hok sonkhiang nou kekü wan, naiuso apa sang lemkü sou-sangkom nou komlut,

¹⁹nung apa khapiam ngio mothawaokün lektso noiküla. APAOU ngio nou apa thakü noin ta mitha kiu.

²⁰Nungai Ijip hai nokpaoüh apa jashin; mele nouso nokpaoüh apa jashi.

²¹Apaüh Yosep apa nokshing paotsangau taiukiu naiuso ngüso goumchi khako apa nokshingau shankiu,

²²nokpao ün asonghoi khako naiuso nokpao lotsüotsünso hau ayam hanau oukong sunkü taiukiu.

²³Nungai Yakob Ijip ai khuküta nungh goumchi nai kih.

²⁴APAOU nou apa khaiuniaso hau methso piakü oukiu naiuso ngüso ehso khengai ngüso kongkü iula-in.

²⁵Apaüh apa khaiuniaso ta Ijip hai chinyan-in, naiuso apa yathsüotsünso ta kausaikü kankei-in.

²⁶Nungai apaüh apa yathsüotsün Mosa naiuso Aron chosankü hongshin.

²⁷Ngüsoüh Goa oukong chhisiya nouso naiuso athanga ii nouso Ijip nai chhin.

²⁸Goa nou anyakhem nou hong, lüko Ijip haiüh apa athoilut nouso angio tsü-ang.

²⁹Apaüh ngüso haiuso she au iula-in küta ngou nouso chikü loatan.

³⁰Ngüso goumchi lükiu nou miankü noiküla, nokpao tsam lüko nungüh miankü noiküla.

³¹Goa nou ngiokhem kiu, nungai chinyi naiuso thsüleen nou ngüso goumchi mianlowan.

³²Apaüh ngüso goumchi ai ah-ou liko san naiuso ahtheji nou hong.

³³Apaüh ngüso sainaoshep naiuso phiupai nouso lothean naiuso paisiau chikü longekan.

³⁴Apaüh ngiokhem kiunai, jongku nouso hengsiheng ta shin.

³⁵Ngüsoüh goumchi nai paisam aosam chikü he-an; ngüsoüh chihsikhiam chikü hean.

³⁶Apaüh Ijip hai tsamkhaiu chikü nai chongting chettsün melothso nouso loat.

³⁷Nungai apaüh Israel hai niashin; ngüsoüh tangkason naiuso chaiou lakkeng nouso kankü khu, naiuso ngüso chikü ameilei si kongsimongkü noiküla.

³⁸Ijip hai ngüso lon hat naiuso tilai ngüso tsaloukü khu ngüso monglingkü noiküla.

³⁹Goa nou apa khaiuniaso khako thengmia naiuso asoh ngüso hau awonkiu au in nou taiukiu.

⁴⁰Ngüsoüh nyih saonai apaüh ngüsohau lüpoi waio nouso hong; apaüh ngüso tsadau aün ainou eheshiu hong.

⁴¹Apaüh lung tsak sopsat, naiuso liutsa tsatkü haiu tsak khekkü khiam nou tangshin.

⁴²Apaüh apa yathsüotsün Abraham tü asio athalou-etaiu nou yangsan.

⁴³Nungti apaüh apa achosan khaiuniahoi niashin, naiuso ngüso amongling nou sangh songkü jih hang.

⁴⁴Apaüh ngüso hau amao mele nouso goumchi kium naiuso ngüso hau melemao hai goumchi lou-i,

⁴⁵tiautenai apa khaiuniasoüh apa ngiokhem nouso kankei-au naiuso apa athoilut nouso chikü angau chhin. APAOU lülomsan!