Read Khiamniungan Naga Nianlom Jih 106 Bible Online

Nianlom Jih 106 - Khiamniungan Naga bible

Nianlom Jih 106

¹APAOU lülomsan! APAOU hau nianlom lükiu, tiautenai apa amei noin; apa atsüojin athontsüyang.

²Apa chhisiya asong nouso thaiutha sauüh ngioau shio-e? Apa saiukü lomsanau sauüh shio-e?

³Sauhaiüh apa athoilut nouso angio angji, sauhaiüh asaita ayam atha nou chhiji ngüso thaiumei.

⁴Ni tilai akhaiuniaso hau atsüojin hane, ni tilai ngüso kipsane, ngü ayangsanha, O APAOU.

⁵Nungko akhaiuniaso tsüomeikü khutsün ngü epha-au amele monglengtsün nouko ngü haoson theha-au, atengkamhoiso ajinka nouko ngü noiha-au.

⁶Sam paosiposoüh chhitsünli samüh angei chhi-iu; sam tsüthakü naiuso tsümeikü noiküla

⁷Ijip nai sam paosiposoüh Goa nou athanga chhi chhitsün tsüngekü noiküla; Apaüh ngüso hau piaküjam apa atsüojin hankü shitsün bean, naiuso Aseng Khiamnok dongko ngüsoüh Akongteng thako khengshi.

⁸Apaüh thaloutsünli apaüh ngüso kipsan.

⁹Apaüh Aseng Khiamnok tü ngiokhem kiu, naiuso nung goh wai iula; apaüh meshen khaiuniaso khiamnok yankü goh wai chiai niashi.

¹⁰Ngüso tü chinyantsünso ainou apaüh kipsan; ngüso ehso ainou apaüh ngüso kipsan;

¹¹Lüko khiam nou ngüso ehoiso khaiunia tsaktso tsüpoishikü limmat.

¹²Nungai apa khaiuniasoüh apa athalou nouso tü monglam naiuso apa tü nianlom jih jihlut.

¹³Lüko apaüh chhitsün ngüsoüh shakta bean küta apa ayamhan ta tsüthaiukü chhi-an.

¹⁴Liutsa nai ngüso achinek nou meankü noiküla, naiuso nungko Goa ta thelu;

¹⁵nungtiphe ngüsoüh sautsün nung apaüh ngüso hau kiu, lüko apaüh ngüso dongai athsüoting imkia tsak hong.

¹⁶Liutsa nai APAOU yathsüotsün asio khaiunia Mosa naiuso Aron ne tü ngüsoüh niovei kiakü noiküla.

¹⁷Nungai goh nou sopsat naiuso Dathan miolian naiuso Abiram si apa tsammong limlowan;

¹⁸ngüso hoi nouso khako in nou saom naiuso tsümeikün khaiuniahoi nouso chethean.

¹⁹Ngüsoüh Sinai kingai chaiou jangtsopongthso tsak saisan küta nung da amkham;

²⁰ngüsoüh Goa ajinka nou khengliu hetsün thainian tsak sotsom ko li-en.

²¹Apa athanga chhisiya tsangkü Ijip ainou sauüh ngüso kipsankü noiküla ngüsoüh nungh Goa bean.

²²Apaüh ti athanga chhi chhikü noiküla! naiuso apaüh Aseng khiamnok nai ti athanga chhin nung bean!

²³Tilai Goa nou apa khaiuniaso lomowanau ngiom, nungai apaüh chosantsün Mosa, Goa thako tsaküchu küta ngüso lomowanau mongmattsün ainou lolao.

²⁴Nungai ngüsoüh goumchi amei nou tsümongchio, tiautenai ngüsoüh Goa athalou nou da mongtsülam.

²⁵Ngüso nejenkhio nai noiküta namnam naiuso APAOU ngio tsü-ang.

²⁶Nungshioko ngüso liutsa nai mowani-au, apaüh ngüso hau ngiomongshing tsak taiukiu;

²⁷nungti ngüso thsaosithsoso goa tsüngekün mele nouso ongai penglükhun-i, küta melemao goumchi nai ngüso ean-i.

²⁸Nungai Peor nai, Goa khaiuniahoi nouso Baal amkham nouko halut, naiuso aa tsünoikün goa nouso hau aloat chaithio kiutsün heshiukü noiküla.

²⁹Ngüso chhisiya tsangkü APAOU mongmat sungi, naiuso ngüso ongko atsaoting imkia tsak shin.

³⁰Lüko Phinehas tsaküta aphio nouso mi nou khem, naiuso imkia nou laolo.

³¹Nung atao nai apaüh apa atsüojin yangsanshi naiuso nung ashiau vetao si vetao thaiutha noi-e.

³²Khaiuniahoi nou Meriba haiu ko nai APAOU mongmat sung-i, naiuso ngüso shioko Mosaüh angja epkü noiküla.

³³Ngüsoüh apa onthso khosakkü iula-i naiuso apaüh tsüyangloshikü ngiokü noiküla.

³⁴APAOU nou ngüso hau ngiokhem kiutsünli, ngüsoüh goa tsüngekünso loatkü tsüwan.

³⁵Lüko ngüso nung khaiunia nousoko tsamsigoh yangekü lao-ekü, ngüso kihkihyam sailokü khuwan.

³⁶Goa ün khaiunia nousoüh sotsom nouso amkham, küta nungüh ngüso alothetsün sungi.

³⁷Kanan hai sotsom goa hau ngüsoüh ngüso thso melothso naiuso menyiuthso nouso aloat chaithio kiu.

³⁸Aphio tsülepkün methsohoi ngüsoüh loat, naiuso ngüso loattsün tsangkü goumchi nou lochinyan.

³⁹Ngüsoüh chija ngüso chhisiya tsangkü tsüyanthsüokü iula-i naiuso Goa tü mongtsükiukü noiküla.

⁴⁰Nungtiphe APAOU nou apa khaiuniasoko mongmat; apa ngüso tü chinyankü iula.

⁴¹Apaüh ngüso goa tsüngekünso phamongai kiuwan, naiuso ngüso tü chinyantsünsoüh ngüso chiai nokshing shing.

⁴²Ngüso ehsoüh ngüso tü thangmang naiuso ngüso phamongai thumkü napan.

⁴³Atao piaküjam APAOU nou apa khaiuniaso kipsan, lüko ngüsoüh apa thako khengshi au choloküta angei nai thatü aokü limkü nappan.

⁴⁴Lüko tilai ngüsoüh ween APAOU nou ngüso sangh lula, naiuso apaüh ngüso angjatsün ngela.

⁴⁵Apaüh ngüso shioko apa athalou-e yangsan, naiuso apa atsüojin asong shioko apa mongyang li-eshi.

⁴⁶Apaüh ngüso tü thangmangtsün chikü hau ngüso thaiutha mongkiakü yangshi-i.

⁴⁷Sam akipsan, O APAOU sam Goa, mele nouso ong ainou sam loüh aniakamshi, nungaito samüh ni asio nian alomsan kiu-e.

⁴⁸Israel Goa APAOU lülomsan; lo naiuso athontsüyang apa lülomsan! Khaiunia pungkü hau, “Amen!” ta lüngio-i. APAOU lülomsan!