Read Khiamniungan Naga Nianlom Jih 107 Bible Online

Nianlom Jih 107 - Khiamniungan Naga bible

Nianlom Jih 107

¹“APAOU hau nianlom lükiu, tiautenai apa amei noin; apa atsüojin athontsüyang!”

²Apaüh kipsantsünso chikü nou APAOU tü nung alomsan ngio nouso laoshikü lüngio. Asam ehso ainou apaüh asam kipsaniu

³naiuso ajepek si ajenap naiuso ajepekki si ajenapki gohmao goumchi nouso ainou apaüh asam nialokü shi-iu.

⁴Ajantso yamthang tsünoikün liutsa nai tsakei naiuso noknio ai khutsün yam ngüsoüh tsüep.

⁵Ngüso naiukü naiuso lekü noiküla naiuso ayangtaiu chikü lean.

⁶Nungai angja taoko ngüsoüh APAOU tü jon, naiuso ngüso omhetsün ainou apaüh ngüso kipsan.

⁷Ngüso kih au noitsün noknio yamai saitha apaüh ngüso nialokü khu.

⁸Apa asai atsüojin naiuso ngüso hau athanga chhi chhikiutsün thaiutha ngüsoüh APAOU hau nianlom kiuau noin.

⁹Sauhai lekü noin apaüh ngüso mong tsamiji naiuso naiukü noitsünso eheshiu amei nou tsadji.

¹⁰Ajantso jeiatkü naiuso anyakhem nai son auo nou kekü akhothiohoi omhetsün nai kihkü noiküla,

¹¹tiautenai ngüsoüh Apemshiotsün Goa athoilut nouso thako khengshi naiuso apa ayamhan nouso wanan.

¹²Ngüso nung chhisiya achek chitsün shioko ouchankü noiküla; ngüso loian, naiuso ahachuau tsaktso tsünoiküla.

¹³Nungai ngüso angja taoko ngüsoüh APAOU tü jon, naiuso ngüso omhetsün ainou apaüh ngüso kipsan.

¹⁴Apaüh ngüso jeiattsün ainou naiuso anyakhem ainou niasan naiuso ngüso ketaiutsün sonkhiang nelangkü chanthatkü wan.

¹⁵Apa asai atsüojin naiuso athanga chhisiya chhikiutsün thaiutha ngüsoüh APAOU hau nianlom kiuau noin.

¹⁶Apaüh taoson lung bekhan nouso lopek naiuso sonpe nou thiopekkiu.

¹⁷Ngüso a-aiu tsümeikün chhisiya naiuso angei shioko, ngüso angja omhekü noiküla.

¹⁸Eheshiu in pungkü ngüsoüh mongchio, naiuso ngüso eau shimkü noiküla.

¹⁹Nungai ngüso angja taoko ngüsoüh APAOU tü jon, naiuso ngüso omhetsün ainou apaüh ngüso kipsan.

²⁰Apaüh apa ngio hongkü ngüso lomeikiu, naiuso ngüso eanau noitsün ainou kipsan.

²¹Apa asai atsüojin naiuso athanga chhisiya chhikiutsün thaiutha ngüsoüh APAOU hau nianlom kiuau noin.

²²Ngüsoüh apa hau aloat chaithio nou nianlom kiuau noin, naiuso apa chhisiya chikü amongling jih tsangkü chiteau noin.

²³Ajantso kheng nai noikü khiamnok nai khu. Ngüso eheshiu chaile hekü khiamnok asong nouso ai tsakei nai,

²⁴Apa athanga chhisiya nouso khiamnok nai ngüsoüh ep.

²⁵Apa ngiokhem tsangkü ahthe ahsheih nou sungji, naiuso khiamnok nai khiampek nou sungiji.

²⁶Nung kheng asong nouso tsokkü tsopkü sungji naiuso loüh khiamnok akheiting nai nyapkü napji. Nungtin ahatau noitsünko khaiuniahoi nou mongsong mowanji.

²⁷Thengtuk haili ngüso tsakai jam tsakai jam ta lemkeiji ngüso ange amon chikü yaang noiküla.

²⁸Nungai ngüso angja nouko ngüsoüh APAOU tü jon, naiuso ngüso omhetsün ainou apaüh ngüso kipsan.

²⁹Apaüh ahthe tsamkü iula-i, naiuso khiampek nouso sangkü iula.

³⁰Ah-ou-ahsheih tsamkü iulatsün thaiutha ngüso monglingkü noiküla, nungtiphe apaüh ngüsoüh mongchiotsün akhulut thang nai nialokü shin.

³¹Apa asai atsüojin thaiutha naiuso ngüso hau apa athanya chhi chhikiutsün thaiutha ngüsoüh APAOU hau nianlom kiuau noin.

³²Khaiuniahoi ajeiaikam nai apa asong thaiutha ngüsoüh wepengau noin naiuso aheihoi nouso akhengting ajeiaikam khako apa lomsanau noin.

³³APAOU nou haiu nouso apani-ji naiuso haiuchetngan nouso wai-aniji.

³⁴Apaüh iu-suntsün goh nou jem goh au iula-i tiautenai nungko sauhai noiji nung ngüso tsümeikün tsangkü noin.

³⁵Apaüh singtso goh nouso khiam temkhao noikü li-ekiu naiuso goh awai nouso haiuchettsün hau li-ekiu.

³⁶Apaüh naiusile khaiuniahoi nung ko kihlo-i, naiuso ngüsoüh akih au noknio tsak shan.

³⁷Ngüsoüh eiu nai le nou lethio naiuso sainaoshep nou thomthio naiuso nung be-eiuyam meikü yamhe.

³⁸Apaüh apa khaiuniaso oukiu, naiuso ngüso tü methso piakü chetsinyim; naiuso apaüh ngüso tsam thainianhoi shingkü iula-i.

³⁹Tilai Goa ün khaiuniahoi thangmangtsün naiuso omhe-itsün tsangkü lomiamkü shiohean,

⁴⁰apaüh ngüso thangmangtsünso phio-i naiuso yamthang tsünoikün liutsa nai pengkei-i.

⁴¹Lüko apaüh angja hoi nouso ngüso angja omhe ainou kipsan naiuso ngüso tsammong onnemok hoi khekkü shingkü khu-i.

⁴²Asiohoi nousoüh nung epji naiuso monglingatji, lüko tsümeikünso chikü ti singioau tsüshiokü iula.

⁴³Sauhai da mongthat mongsai noin, ngüsoüh tsüokü yangluao noin, naiuso ngüsoüh APAOU ün asai atsüojin thaiutha lüyanglu.