Read Khiamniungan Naga Nianlom Jih 109 Bible Online

Nianlom Jih 109 - Khiamniungan Naga bible

Nianlom Jih 109

¹Goa, ngo ni lomsanji; ni nyankü lanoian!

²Tiautenai tsümeikün naiuso ngiotsüo tsüdekün khaiuniaso jü thako noin. Ngüsoüh jü thaiutha yaang ngio chiteji

³naiuso ngüsoüh jü thaiutha tsümeikün ngio ngioji, naiuso mi tsünoikü ngü da pha poji.

⁴Ngo ngüso tsüojin lüko, naiuso ngüso thaiutha mi saokiu lüko ngüsoüh ngü tü khengshiji.

⁵Ngüsoüh ngü hau amei liko tsümeikün naiuso atsüojin liko achinyan laokiu shiji.

⁶Jü eh tü mi khemau ni tsümeikün mikhemhoi ajantso achosan naiuso apa ehso tsak hau apa alotsao-i.

⁷Apa mikhem nai aphio a-epsani; apa misaotsün lüko aphio ta awesani-i.

⁸Apa aakilaiu shakta alothonan; amaohai tsaküh apa chhikamthang noikham alowan!

⁹Apa thsoso mejetthsoso naiuso apa tsammongnyiu jihi tsak lü-iula-i!

¹⁰Apa thsoso tsam tsüyangkü asaohe lü-iula; ngüso kihtsün tsam athe ainou ngüso akomani!

¹¹Apaüh chai laiutaiutsünsoüh apa jengtsaiu chikü kankü akhuwani, naiuso apaüh chhisantsün alum mesanhaiüh alowan.

¹²Apa tü atsüojinyang hanau sau lanoi-i tsüdekünai apaüh letaiutsün mejet nouso paotsangau sau tsünoikü lü-iula.

¹³Apa thsaosithsoso chikü lü ean-i, naiuso nungthan vetao nai apa nian layangsan-i.

¹⁴APAOU nou apa paosiposo tsümeikün lüyangsan naiuso apa nyiu ün angei nouso tilaitso lawankiu.

¹⁵APAOU nou ngüso angei asai yangsankü anoi, lüko ngüso pem to thumkü beankü anoi-i.

¹⁶Nungh khaiunia nou tilaitso atsüojinyang tsühan; apaüh angjahai, pokü noitsünso, naiuso outsükongkünso hao angja kiukü loat.

¹⁷Apaüh athesan tsüojin- nungtiphe apa athesan lünoi! Apaüh a-oukiutsün chinyan- nungtiphe sauühtso apa la oukiu!

¹⁸Apaüh neshe thotsünli asaita athesan kiukü shin, apa ün athesan nou apa pem khiam nou pentsün khekkü naiuso apa ou mongai khaiutsom khekkü lünoi-i!

¹⁹Nung athesan nouso apa neshe nou tenpoktsün khekkü naiuso omkhi tsak khekkü asaita apa lemkü anoi-i!

²⁰Ngü thako tsümeikü chitetsünso jü ehso ta APAOU nou nungti angja lükiu!

²¹Lüko jü atsokting APAOU, ni thaloutaiutsünli ngü tü ahachu, ngo akipsan, tiautenai ni tsüojintsün amei noin.

²²Ngo tsosilu naiuso angja khaiunia jümong akheiting saokü ngo tawaikü noin.

²³Ah sham ahkhemsoh tsak khekkü ngo mowanau noin; paosuong tsak khekkü ngo shipkü khuwanji.

²⁴Eheshiu tsütaiutsün shioko jüsingkau outsükongkü noin; Ngo ta ou-si-khun lu sunkü noin.

²⁵Tilai khaiuniahoi nou ngü epji, ngüso ngü tü nyailutji; ngüsoüh ngüso khaiu satkü thekü lomiamji.

²⁶Ngü ahachu, O APAOU jü Goa; ni tsüojintsün tsangkü, ngü akipsan!

²⁷Ngü kipsankiutsün ni noin ta jü ehso hau angela-i.

²⁸Ngüsoüh ngü ta athesan kiu-e, lüko ni ngü ouk kiu-e. Ngü hau angja kiutsünso ashiolouwani, ngüso amiami, atsamki amonglingi.

²⁹Jü ehso amiam nou loipokkü lünoi-i; ngüso amiam phakhut tsak khekkü ngüso hau lüthe-i.

³⁰Ngo APAOU hau nianlom asongting nou kiu-e; khaiuniahoi ajeiaikam nai ngo apa lomsane,

³¹tiautenai apaüh tsosilu khaiunia nou loatau khemtaiutsün ainou kipsanji.