Read Khiamniungan Naga Nianlom Jih 118 Bible Online

Nianlom Jih 118 - Khiamniungan Naga bible

Nianlom Jih 118

¹APAOU hau nianlom lükiu, tiautenai apa amei noin, naiuso apa atsüojin athontsüyang.

²Israel khaiuniahoi hau, “Apa atsüojin athontsüyang,” ta lüngio-i.

³Goa mesonhoi hau “Apa atsüojin athontsüyang,” ta lüngio-i.

⁴Apa amkhamtsünso chikü hau “Apa atsüojin athontsüyang” ta lüngio-i.

⁵Jü amongmat nai ngo APAOU ta jon; apaüh ngo tü thala naiuso sokshi.

⁶APAOU ngüko noin, ngo hatkü tsünoi-e; sauüh ngü ta ti chhiau shio-e?

⁷APAOU ahachutsün ngüko noin, nungtiphe jü ehso khako shiolotsün ngü eppe.

⁸Khaiunia da amonglam taiutsün konaito APAOU da amonglam taiu nai meithso.

⁹Aheihoi nouso da amonglam taiutsün ko naito APAOU da amonglam taiu nai meithso.

¹⁰Eh piakü nou ngü lemjeikü noiküla; lüko ngo ngüso APAOU oukong tsangkü lomokü wan!

¹¹Ngüsoüh ngü yampungkü lemjeikü noiküla; lüko ngo ngüso APAOU oukong tsangkü lomokü wan!

¹²Noum khekkü ngüsoüh ngü chomjei, tsao ongko in liukü nyaisantsünli ngüso nyaisan; lüko ngo ngüso APAOU oukong tsangkü lomokü wan.

¹³Ngüso thsüokü pokü ngo shiolowankü noiküla, lüko APAOU nou ngü hachu.

¹⁴APAOU nou ngü kongsimongkü shankiu, apaüh ngü kipsan.

¹⁵Goa ün khaiuniahoi nejenkhio nouso nai shiolouküta wetsün sangh anglu: “APAOU oukong asong nou nung chhin!

¹⁶Apa oukong nou sam hau ashiolou nou kankü shin — apa oukong nou ehli nai shiolouji!”

¹⁷Ngo tsü eane; lüko aa kih-e naiuso APAOU chhisiya nouso pungpenge.

¹⁸Apaüh ngü tü thatü thsüokü thut, lüko apaüh ngü tsü eani.

¹⁹Amkham Tsam bekhan nouso ngü hau asopankiu; nungko ngo nappe naiuso APAOU hau nianlom kiu-e!

²⁰Nung APAOU ün bekhan noin; nungko asiohoilu napau shio-e.

²¹APAOU, ngo ni lomsanji, tiautenai ni jü sangh lula, naiuso ni ngü hau ashioloutsün kium.

²²Lung sübao tsamlahoi nou atheau tsümei ta wanan nung lung apem khaiuko thatü atengtingau iulan.

²³Nung APAOU nou chhitsün chhisiya noin; nung sam nioveiko thatü athanga noin!

²⁴Nung ajekhaiu APAOU nou shan; sam nungko monglingkü noiko!

²⁵Samüh kojaji, APAOU, sam akipsan? O APAOU, sam hau ashiolou nou akiu!

²⁶APAOU nianko sau shiji Goa nou lü oukkiu! APAOU Amkham Tsam ainou samüh ni ouk kiuji.

²⁷APAOU nou Goa noin; apa sam ko meikü shin. Asam phako paikia nouso semkü sümai lütsalou naiuso amthang lemkü lütsakei.

²⁸Ni jü Goa noin, naiuso ngo ni hau nianlom kiuji; ngo ni songtsün thaiutha thipenge.

²⁹APAOU hau nianlom lükiu, tiautenai apa amei noin, naiuso apa atsüojin athontsüyangkü noin.