Read Khiamniungan Naga Nianlom Jih 119 Bible Online

Nianlom Jih 119 - Khiamniungan Naga bible

Nianlom Jih 119

¹Sauhaiüh apa athoilut nouso chhisiyaji, sauhaiüh mongpem chikü nou apa ngio angji ngüso thaiumei.

²Sauhaiüh APAOU mitha nouso kankeiji, sauüh mongpem thumkü nou Apa yamji ngüso thaiumei.

³Ngüsoüh tilaitso tsüthakün tsüchhiji; lüko APAOU yamai tsakeiji.

⁴APAOU, ni sam hau ngiokhem nouso kium naiuso nungso mongkiukü angio angau sam tü ngiom.

⁵Ni nou ayamhan nouso kankeiau ngo titi mongkiukü noi-ela!

⁶Ngo ni athoilut nouso chikü ta mongkiu naito, nungaito ngo miamatkü tsünoi-e.

⁷Ni nou asio mikhem nouso ngo ngelonai, ngo ni mongpem asangling nou lomsane.

⁸Ngo angiokhem nouso kankei-e; nungtiphe ngü tilaitso lalean!

⁹Oum khaiunia tsaküh apa aa titi sanglingkü taiu-au shio-e? Ni thoiluttsün nouso angio angkü noitsün tsangkülu.

¹⁰Jü mongpem chikü nou ngo ni yathsüo au koweji; angiokhem ainou ngo pungekü lakhuwani.

¹¹Ngo ni thako angei tsüsunau, ngo angiokhem jü mongpemai taim.

¹²Ngo ni lomsanji, O APAOU; ngü hau angiokhem nouso atsande.

¹³Ni kiutsün ngiokhem nouso chikü ngo sangh asong nou wepenge.

¹⁴Chaiou jengtsaiu asong chiai ngo angiokhem nouso da hoiluttsünko monglingji.

¹⁵Ni ayam hantsün ta ngo aokü thaluji; Ni athoilut nouso ngo tsübeane.

¹⁶Angiokhem nai ngo amongling noin, Ni thoilut nouso ngo tsübeane.

¹⁷Ngo aa noiau, ni tsandetsün da angio angkü noiau ngo atsamki ta, atsüojin hankü athe.

¹⁸Angiokhem nai athanga ngiotsüo nou ngo epkü hau jü niovei asopsatkiu.

¹⁹Ngo nung goumchi nai süme shitsün tsak khekkü noin; ni thoiluttsünso ngü ainou tsangkü lawan.

²⁰Angiokhem ngeluao ngo atao pungkü mongchiotsün nou jü mongpem kiaji.

²¹Abülom nouso tü ni thutji; sauhaiüh ni thoiluttsün angio tsüang ngüso athesan noin.

²²Ngüso alochi naiuso alomiam amowani, tiautenai ngo angiokhem nouso kankeikü noin.

²³Nokpao nouso jü thako chhi tsümeikü chhiao kamshiji, lüko ngo to ni tsandetsün ta yame.

²⁴Amitha nousoüh ngü hau amongling kiuji; nungso jü thaiutha alopung kiutsünso noin.

²⁵Ngo pukhao nai shioheankü loikü noin; ni thaloutaiutsünli, ngü ayan ashankiu.

²⁶Ngo chhisiyakü shitsün chikü ngo shananiu, naiuso ni ngü tü thalakü noiküla; ayam nouso ngü hau atsande.

²⁷Angiokhem nouso ngelaau ngü tü ahachu, naiuso ngo ni athanga atsande nouso ta aokü yanglu-e.

²⁸Ngo mongkia nou meankü noin; ni thaloutaiutsünli, jü ou alokongkiu.

²⁹Yam tsüthakü ainou ngü alolaokiu, atsüojin nou ngü hau angiokhem atsande.

³⁰Angio angkü theau ngo shinglo-iu; amikhem nouso da ngo mong nou kiu-iu.

³¹APAOU, ngo ni ayamhantsün da hoilutiu; ngü miamikü lataiuwan.

³²Ngo ni thoiluttsünso tü mongchiokü angio ange, tiautenai ni ngü hau angelatsün piakü kiu-e.

³³APAOU, angiokhem alat nouso ngü hau atsande, naiuso ngo nungso atao chikü nai kankei-e.

³⁴Ngü hau angiokhem nouso thanekü angela-i, naiuso ngo nung ang-e; Ngo nung jü mongpem chikü nou kankei-e.

³⁵Ngü ni thoiluttsünso tü angio angtsün yamai ania, tiautenai nungso ko ngo amongling epji.

³⁶Alum tsükhemkü theau yangtsünko naito angio angau amongchiotsün ngü hau akiu.

³⁷Yaang nou ta mongkiutsün ainou ngü lolaokü ataiu; ni thaloutaiutsünli, ngü ko meikü anoi.

³⁸Ni yathsüotsün — ngü ko, angio angtsünso ta thaloutsün ataiu.

³⁹Ngo hattsün alochi nouso ainou ngü akipsan; amikhem nouso titi athanga noin!

⁴⁰Ngo ni thoiluttsünso angio angau aiuji; ngü hau aa ayan akiu, tititenai ni asio noin.

⁴¹Ni ngü tü tititso tsüojinji nung ngü hau ahan, APAOU, naiuso ni thaloutaiutsün tsangkü ngü akipsan.

⁴²Nungai ngo lochitsünso ta ngo thashi-e, tiautenai ngü angio da monglamji.

⁴³Asaita ngiotsüo ngioau ngü tü ahachu, tiautenai angiokhem nailu ngo ayangtaiu noin.

⁴⁴Ngü athontsüyangkü, angiokhem ang-e.

⁴⁵Naiuso ngo khaiuniatsüo aküo nai kih-e, tiautenai ngo ni tsandetsün theao yamji.

⁴⁶Amitha nouso ngo nokpao nouso ta ngio-e, naiuso ngo amiam tsüeppe.

⁴⁷Angiokhem nouso kankeitsün ko ngo amongling noin, tiautenai ngo nungso tü tsüojinji.

⁴⁸Angiokhem nouso ta ngo tsüojinji naiuso asuhatji; Ni ayamhan nouso tü ngo aokü yanglu-e.

⁴⁹Ni yathsüotsün ngü tü, thaloutaiutsün ayangsankiu; nungüh ngü hau ayangtaiu kium.

⁵⁰Ngo omhetsün taoko lüko ngo mongtsami tiautenai ni thaloutaiu nou ngü hau aa nou kium.

⁵¹Abülomhoi nou asaita ngü lochilotsaoji, lüko ngo angiokhem ainou pungekü tsükhu.

⁵²Piamkü nai ni mikhem kiutsün ngo yangshiji, naiuso nungsoüh ngü hau amongtsam kiuji, O APAOU.

⁵³Tilai Ngü tsümeikünsoüh angiokhem lotheantsün epji, ngo amongmat nou miankü noiji.

⁵⁴Jü aakih letletkü noitsün ko ngo ni athoilut nouso jü jih noiküla.

⁵⁵APAOU, ngo ni asoh yangsanji, ngo angiokhem thaiutha yangji.

⁵⁶Ngo jü amongling ni nou athoilut nouso angio angtsün tsangkü epji.

⁵⁷Nilu ngü nou noin, O APAOU; ngo angiokhem nouso angau thalouji.

⁵⁸Ni thaloutaiutsünli, jü khako atsüojinyang noiau ngo jü mongpem chikü nou ni tü sangji!

⁵⁹Ngo jü saisile ta yanglu-iu, naiuso ngü angiokhemso ta hoilutau thalouji.

⁶⁰Ni thaloutsünso tsütsangankü kankei au ngü liuliu.

⁶¹Tsümeikünsoüh jü thaiutha jin tsak jintaiu, lüko ngo angiokhem tsübeanji.

⁶²Ni nou asio mikhem taiutha ni lomsanau ngo ahwem chuji.

⁶³Sauhaiüh ni yathsüoji naiuso sauhaiüh ngiokhem nouso angji, ngüso chikü haimei ngo noin.

⁶⁴APAOU, goumchi nou ni ün atsüojin nou miankü noin; ngü hau ni thoiluttsünso atsande.

⁶⁵APAOU, ni thaloutsün kankeikü, ni yathsüotsün ngüko ameilu noin.

⁶⁶Ngü hau mongthat mongsai ange nou akiu, tiautenai ngo ni thalouttsün da amonglam taium.

⁶⁷Ni molotsüokiukün khako, ngo tsüthakü nai khuwanküla, lüko lo ngo angio angji.

⁶⁸Ni titi amei titi atsüojinyang! Ni athoilut nouso ngü hau atsande.

⁶⁹Abülom khaiuniahoi nou jü thaiutha yaang chite-iu, lüko jü mong chikü nou ngo ni ayamhan nouso angji.

⁷⁰Nung khaiunia nouso ta angelatsün tsünoi, lüko ngo angiokhem nai amongling epji.

⁷¹Ngü angjatsün jü thaiutha ameilu noiküla, tiautenai nungüh ngü hau ni thoiluttsünso ngelo-in.

⁷²Chaiou lakkeng naiuso tangkason heng piakü taiutsün ko naito, jü thaiutha ason ainou shitsün angiokhem meitso noin.

⁷³Ni ngü shan, naiuso ni ngü kipsankü taiuji; angiokhem nouso ngo ngelaau, ngü hau angelatsün akiu.

⁷⁴Sauhaiüh ni asuhatji ngüsoüh tilai ngü eppe ngüso monglinge; tiautenai ngo ni thaloutsün da monglamji.

⁷⁵APAOU, amikhem nouso thakü noin ta ngo ngen, naiuso ni thakü noitsün tsangkü ngü hau angja kiu.

⁷⁶Ni yathsüotsün, tü ni thaloutaiutsünli, ni asai atsüojin nou ngü hau aalo akiu.

⁷⁷Ngo aa noiau ni nou atsüojinyang ahan, tiautenai angiokhem nai ngo amongling epji.

⁷⁸Ngü aphio nai lochitsün thaiutha abülomhoi miamatkü lünoi-i; jü thaiutha to, angiokhem nai aokü yanglu-e.

⁷⁹Sauhaiüh asaichi asuhat kiuji jüdongai ashi-i — naiuso ngüsoüh angiokhem nouso ngelaau thaiutha.

⁸⁰Ni thoiluttsünso tü jü mong athumkü nou ang-e. Ashio tsüepkü miamao ainou ngo athakhu-i.

⁸¹APAOU, ngü kipsanau thaiutha ni ta taiu nou tananiu; Ngo angio da jü amonglam taiuji.

⁸²“Ni tilai ngo hachu-e?” ta sangkü, ni ti thaloutaiukü noiküla nung da thape noitsünko jünio auo kia-aniu.

⁸³Nyikhun thengmeng athe wanantsün khekkü ngo noin; lüko ngo ni nou athoilut nouso tsübean.

⁸⁴Ngo tilektso taiukü noi-ela? Ni ngo jeiatitsünso hau tilai angja kiu-e?

⁸⁵Abülom khaiuniahoi, sauhaiüh angiokhem tsüangji, ngüsoüh ngü sathio-iau khan thaiukü noin.

⁸⁶Ni thoiluttsünso chikü amonglamau noin; khaiuniahoi nou ngü yaang angja-iji- ngo ahachu!

⁸⁷Ngüsoüh ngü loatan aulu noiküla, lüko ngo ni athoilut nouso tsülean.

⁸⁸Ni asai atsüojin shioko jü aa ataiukiu, nungai ngo angiokhem nouso ang-e.

⁸⁹O APAOU, angio, athontsüyange angio aün nai mongkü tsakü noin.

⁹⁰Ni mongkiutsün nung vetao chiküko noiji; ni goum nou athang tsak ko taiu, naiuso nung mongkü noin.

⁹¹Ni athoilut kiutsün shioko lonyi saokü alum nung athang ko noin, tiautenai nungso chikü ni yathsüotsünso noin.

⁹²Angiokhem jü amongling losangtsün tsüdetünto, ngo angjatsün taoko nai eankü noi-ela.

⁹³Ngo angiokhem nouso tilaitso tsüpeane, tiautenai nungso tsangkü ni ngo aa taiukium.

⁹⁴Ngo athaiutha nou noin — ngü akipsan! ngo ni nou athoilut nouso kankeiau kowe-iu.

⁹⁵Tsümeikün khaiuniahoi nousoüh ngü loatau taiuji, lüko ngo angiokhem nouso da aokü yanglu-e.

⁹⁶Alum thaiutha ahaopungkhem tsüyang ta ngo ngelaji; lüko angiokhem nouso to haopungkü noin.

⁹⁷Titi ngo angiokhem tsüojinji! Ngo nung thaiutha ajekhaiu thathonkü yanglutsün noin.

⁹⁸Ni thoiluttsün nouso atao chikü ngüko noin — naiuso nungüh jü ehso ko naito jü mongyang pungtso iula-iji.

⁹⁹Ngü hau atsandetsünso chikü chiai ngo ngelaji, tiautenai ngo angio nouso ta aokü yamji.

¹⁰⁰Petche nousoko naito, mongthat mongsai ngo da haopungtso, tiautenai ngo angiokhem nouso kankeiji.

¹⁰¹Ngo tsümeikün saisile chikü wananiu, tiautenai ngo angio angau aiuji.

¹⁰²Ngo ni nou ayamhan nouso ainou pungekü tsükhuji, tiautenai ni jü atsandetsün noin.

¹⁰³Angio nouso titengkü anyaothing noin — nung liukhiam chiai nyaothingkü noin!

¹⁰⁴Ngo mongthat mongsai angiokhem ainou epji, nungtiphe ngo saisile tsümeikün chikü chinyanji.

¹⁰⁵Angio jühok thaiutha tson, naiuso jü yam thaiutha awon tsak noin.

¹⁰⁶Ni nou asio ayamhan nou angio angau ngo thaloutsün ngiomong nou taiu-e.

¹⁰⁷APAOU, ngü omhetsün thatü thsüokü noin; ni thaloutaiutsünli, ngü aa anoi-i.

¹⁰⁸O APAOU, jü nianlomkiu misao nouso alou, naiuso ni athoilut nouso ngü hau atsande.

¹⁰⁹Jü aakih asaita achek nailu noin; ngo angiokhem tsübeankü taim.

¹¹⁰Tsümeikün khaiuniahoi nou jü thaiutha jin tsak jintaim, lüko ngo angiokhem nouso angio tsüangkü tsünoi.

¹¹¹Amitha nouso jü thaiutha athontsüyang tengkam noin; nungso jümongpem monglingitsün noin.

¹¹²Ngo eantsün ajekhaiu saokü ngo angiokhem angau thaloukü noin.

¹¹³Sauhai ni da saitha tsünoi nungso ta ngo chinyanji, lüko ngo angiokhem tü tsüojinji.

¹¹⁴Ni jü akhuluttsün naiuso sokiutsün jü ayangtaiu ni thaloutsün da taim.

¹¹⁵Ngo ainou lükhuwan, asam angei khaiunia nouso, Ngo jü Goa ün athoilut nouso ang-e.

¹¹⁶Ni thaloutaiutsünli, ngü hau oukong akiu, nungaito ngo aa noi-e; jü ayangtaiu nai ngü yangelatikü lawanan!

¹¹⁷Ni ngü athalou, nungai ngo kipsane, naiuso ngo ni thoiluttsün da asaita mongkiu-e.

¹¹⁸Angiokhem tsüangkü khutsünso chikü ni wananji; ngüso akausai mongyang atheau tsünoi.

¹¹⁹Tsümeikünso chikü ni beisikin khekkü kankeiji, naiuso ngo to ni ayamhan nouso tsüojinji.

¹²⁰Ni shioko ngü hatkü noin; ni nou mikhem nouso shioko ngo ahat nou miankü noin.

¹²¹Ngo ti thakü naiuso amei noin nung chhisiya-iu, jü ehso hau ngü lalethiowan!

¹²²Ni yathsüotsün tü ni hachu-e ta athalou; Abülom khaiuniahoi hau ngü lathangmangi!

¹²³Ahachu naiuso akipsan thaiutha ni thaloutaiutsün ta taiu nou jü niovei kia-aniu.

¹²⁴Ni atsüojinyang khekkü ngo akankei, naiuso ni thoiluttsün ngü hau atsande.

¹²⁵Ngo ni yathsüotsün noin; ngü hau angelatsün akiu, nungai ngo ni thoiluttsün ngelaau shio-e.

¹²⁶APAOU, nung ni chhi au atao noin, tiautenai khaiuniahoi nou angiokhem tsüangji.

¹²⁷Nungti lüko ngü to chaiou lakkeng chiai ni thoiluttsün ta tsüojinji, ni chaiou lakkeng ameiting ta simkü tsüojinji.

¹²⁸Nungtiphe ngo ni ayamhan chikü ko noilutji; naiuso ngo yam tsüthakün chikü chinyanji.

¹²⁹Ni tsandetsünso athanga noin; nungso jü mong chikü nou angio angji.

¹³⁰Ni tsandetsünso thanekü chitetsün nou awon kiuji naiuso tsüngekünso hau mongthat mongsai kankü shikiuji.

¹³¹Ngo ni thoiluttsün ngiokhem nouso ta, mongchetkü jü son koupengkü taiukü noiküla.

¹³²Sauhaiüh ni tsüojinji nungso ta ni chhikü shitsünli, jü dongai sakü ashi naiuso ngü da atsüojinyang anoi.

¹³³Ni thaloukü taiutsünli, ngü salianau ainou alolao; tsümeikün hau ngü lashiolowani.

¹³⁴Sauhaiüh ngü thangmangji ngüso ainou ngü akipsan, nungai ngo ni thoiluttsün ngiokhem nouso kankei-e.

¹³⁵Ni yathsüotsün khako akha awon nou athsalut naiuso ngü hau angiokhem nouso atsande.

¹³⁶Jü niochekhiam haiu tsak khekkü tsangji, tiautenai khaiuniahoi nousoüh angiokhem nouso tsükankeiji.

¹³⁷APAOU, ni asio noin, naiuso angiokhem nouso ngiotsüo noin.

¹³⁸Ni kiutsün ngiokhem nouso to thumkü ngiotsüo naiuso ayam thakü noin.

¹³⁹Jü amongmat nou jü mongai in nouli jekji, tiautenai jü ehsoüh ni thoiluttsün ngiokhem nouso tsüwesan.

¹⁴⁰Ni athalou nou titi thakü noin! Ngü nung tü tsüojinji!

¹⁴¹Ngü ateng tsüde naiuso lochi lotsaokü noin lüko ngo ni tsandetsünso tsübeanji.

¹⁴²Ni asio nou athontsüyange, naiuso angiokhem asaita ngiotsüo noin.

¹⁴³Angja naiuso omhe nou ngü miankü noin, lüko ni athoilut nousoüh ngü hau amongling kankü shiji.

¹⁴⁴Ni ayamhan nouso asaita asio noin; ngü hau angelatsün akiu, naiuso ngo aa kihe.

¹⁴⁵Jü mongpem thumkü nou ngo ni tü jonji; APAOU, ngü tü athala, naiuso ngo ni thoiluttsün ang-e!

¹⁴⁶Ngo ni tü weji; ngü akipsan, naiuso ngo angiokhem nouso kankei-e.

¹⁴⁷Ajepek khako ngo ni ta ahachu thaiutha weji; Jü mongyang angio da noin.

¹⁴⁸Ni ayamhan nouso da aokü yangluao ngo asoh chikü tsüsailakü noiji.

¹⁴⁹Ni atsüojin asaita noiphe, ngü tü anglu, O APAOU; ni nou atsüojinyang ahan, naiuso jü aa akipsan!

¹⁵⁰Ngü hau angja kiutsünso shimkü shiji, ngüsoüh angiokhem tilaitso tsükankeiji.

¹⁵¹Lüko ni ngüko shimkü noin, APAOU, naiuso ni thoiluttsün nouso chikü tongta noin.

¹⁵²Angiokhem nouso asai thaiutha shan ta, piamkü aita ngo ngen.

¹⁵³Ngo omhetsün ta athap, naiuso ngü akipsan, tiautenai ngo angiokhem tsübean.

¹⁵⁴Jü thaiutha akojakiu, naiuso ngü ashiosan; ni thaloutaiutsünli, ngü akipsan.

¹⁵⁵Tsümeikünso tsükipsane, tititenai ngüsoüh angiokhem tsü-ang.

¹⁵⁶Lüko APAOU, ni atsüojinyang songkü noin; ni atsüojinyang hankü ngü akipsan!

¹⁵⁷Jü ehso naiuso athangmangtsünso piakü noin, lüko ngo angiokhem beankü tsükhuwanji.

¹⁵⁸Ngo tilai kausaikü kankeitsünso tü thapji, ngo amongmat nou miankü noiji, tiautenai ngüsoüh ni thoiluttsünso tsükankei.

¹⁵⁹Ni ayamhan nouso ta ngo titi tsüojinji athap, APAOU, Ni atsüojin tilaitso tsüli-eshiji, nungtiphe ngo akipsan;

¹⁶⁰Angiokhem akheiteng nou ngiotsüo noin, naiuso ni asio mikhem nouso chikü athontsüyang.

¹⁶¹Oukong khaiuniahoi nou mi tsünoikü angja kiuji, lüko ngo to angiokhem asuhatji.

¹⁶²Khaiunia ajantsoüh chaiou jengtsaiu eplokü monglingtsünli, ngo ni thaloutsün ta monglingatji.

¹⁶³Ngo yaang nouso chikü chinyanji, lüko angiokhem tsüojinji.

¹⁶⁴Ni asio mikhem nouso thaiutha ajekhaiu pungkü ngo chinyatjam nianlom kiuji.

¹⁶⁵Angiokhem tsüojintsünsoüh aalo asong taium, naiuso ngüso tü ti nou sali-iau tsüshio.

¹⁶⁶APAOU, ngo kipsanau ni tü taiuji naiuso ni ti thoilutji ngo nung chhiji.

¹⁶⁷Ngo ni atsande nouso angio angji; ngo nungso ta jümong chikü nou tsüojinji.

¹⁶⁸Ngo ni thoiluttsün nouso naiuso ayamhan nouso kankeiji; ngo chhitsün alum ni epji.

¹⁶⁹APAOU, ngü ahachu thaiutha wetsün nou ni angoi-i! ni thaloukü taiutsünli, ngü hau angelatsün akiu.

¹⁷⁰Jü misao ta anglu, naiuso ni thaloutsün tsangkü ngü akipsan!

¹⁷¹Ngo ni asai lomsane, tiautenai ni ngü hau angiokhem nouso tsandeji.

¹⁷²Ngo angiokhem thaiutha jih jih-e, tiautenai ni thoiluttsünso nung ngiotsüo noin.

¹⁷³Ngo hachuau ni asai khemlokü anoi, tiautenai ngo ni athoilut nouso ta hoilutji.

¹⁷⁴O APAOU, ni akipsan thaiutha ngo titi mongchetkü noin! ngo angiokhem nai amongling epji.

¹⁷⁵Ngü hau aa nou akiu, nungaih ngo ni lomsane; naiuso ni ayamhan nousoüh ngü ahachu-i.

¹⁷⁶Amowan onnemok tsak khekkü ngo tsakeiji, nungtiphe shikü, ni yathsüotsün ngo tü ayam, tiautenai ngo angiokhem nouso tsübeanji.