Read Khiamniungan Naga Nianlom Jih 132 Bible Online

Nianlom Jih 132 - Khiamniungan Naga bible

Nianlom Jih 132

¹APAOU, David naiuso apaüh jeilokü shitsün angja chikü labean.

²APAOU, apaüh ti thaloukü shin, sauüh niko ti ngiomongshinge shankü noin nung ayangsan, oukongting Yakob Goa.

³“Ngo tsamai tsüdekünai then ai tsükhu-e;

⁴Ngo tsü-aalo-e tsüdekünai tsüsai-e,

⁵Ngo oukong suntsün Yakob Goa thaiutha tsam tsak naiuso APAOU thaiutha athang tsak moshankiukün lektso.”

⁶Betlehem nai samüh Athalou-e Ngiokhem Paidan thaiutha lulakü noiküla, naiuso samüh nung Jearim hai khengpun nai epsan.

⁷Samüh ngiom, “Sam APAOU tsamai khuko; apa nokpao noikham khako amko.”

⁸Amkham Tsam nai ashi APAOU, Athalou-e Ngiokhem Paidan a-oukong ii nou noin, nungko athontsüyangkü anoi.

⁹A-mesonsoüh asaita ayam thakü chhiji; akhaiuniaso hau koikü lüwe-i!

¹⁰Ni yathsüotsün David ta ni athalou tsak shan; ni chosantsün nokpao lalean APAOU.

¹¹Ni David ko athalou-e mongkü tsak shan — nung athalou-e ni tsülaopengshi-e: “Ngo athsoso ongko tsak nokpao au cholo-e, naiuso apaüh ni tü thankü nok-shinge.

¹²Athsosoüh jü athalou-e naiuso athoilut ngüso hau kiutsün kankei-e tünaito, ngüso thsoso lüko asaita nokpao noikham nai noi-e.”

¹³APAOU nou Zion chosaniu; apaüh nungko apa tsam shanau mongchioji:

¹⁴“Ngo athontsüyangkü kih au nou nung noin; ngo nokshingau mongchiotsün nung noin.

¹⁵Ngo Zionüh potsün chikü ouk kiu-e; angjahoi nouso ngo eheshiu nou mongtsami-e.

¹⁶Ngo apa mesonhoi nouso chhisiya chikü nai oukkiu-e, naiuso apa khaiuniasoüh koikü jih jih-au we-e.

¹⁷Nungko ngo David thsaosithsoso ongko nokpao asongting tsak shane; Nungko ngo jü achosan nokpao nou nokshingtsün kipsankü taiu-e.

¹⁸Ngo apa ehso amiam nou loipokke, lüko apa nokshing to shingkü naiuso tsüomeikü khu-e.”