Read Khiamniungan Naga Nianlom Jih 135 Bible Online

Nianlom Jih 135 - Khiamniungan Naga bible

Nianlom Jih 135

¹APAOU lülomsan! Asam APAOU yathsüotsünso, apa nian lülomsan,

²APAOU tsamai, sam Goa Amkham Tsam nai tsatsünso.

³APAOU lülomsan, tiautenai apa amei noin; apa nian lomsantsün jih lüjih, tiautenai apa atsüojinyang noin.

⁴Apaüh Yakob meshen thaiutha hau cholo, naiuso Israel apa tengkamau cholo.

⁵Sam Goa asong noin, naiuso goa nouso khako asongting ta ngo ngeji.

⁶Apaüh aün nai naiuso goumchi ko, khiamnok nai naiuso nungkheiai a-aoting nai ti mongchioji nung chhiji.

⁷Apaüh goh athon nouso ainou ah-ou-ahsheih thengmia kankü shiji; apaüh ah-ou-ahsheih thaiutha ahsalap nou shanji, naiuso akamtaiutsün tsampai ainou apaüh ahsheih kankü shiji.

⁸Ijip nai apaüh thsoyamchong nouso naiuso thainian apchiteng nouso chikü loatkü wan.

⁹Nungai apaüh nokpao naiuso apa asonghoi chikü hau angja kiuau ii oukong naiuso athanga nouso chhisiyakü noiküla.

¹⁰Apaüh mele piakü lomowan naiuso oukong suntsün nokpaohoi nouso loat,

¹¹Ngüso: Amor hai nokpao Sihon, Bashan hai nokpao Og, naiuso Kanan nai noitsün nokpao nouso chikü loat.

¹²Apaüh ngüso goumchi apa khaiuniaso hau kiuwan; apaüh nungso Israelhai hau kiuwan.

¹³APAOU, ni Goa ta asaichi wepenge; vetao chikü nou ni yangshi-e.

¹⁴APAOU nou apa khaiuniaso hüjei-e; apaüh apa yathsüotsünso hau atsüojinyang hane.

¹⁵Mele nouso goa hoi nung tangkason naiuso chaiou lakkeng nou shan, ngüso khaiunia pha nou sheithosantsün noin.

¹⁶Ngüso da son nou pokü noin, lüko singio-au tsüshioji, niovei nouso pokü noin, lüko epau tsüshioji.

¹⁷Ngüso da noukhan pokü noin, lüko tsülulaji. Ngüsoüh iloau lüko tsüshioji.

¹⁸Nungso sauhaiüh sheithosanji naiuso nungso da sauhaiüh monglamji ngüso chikü ngüsoüh shantsün sotsom nouso khekkü lü-iula-i!

¹⁹APAOU lülomsan, Israel khaiuniahoi; asam Goa meson nouso, apa lülomsan!

²⁰APAOU lülomsan, asam Levihoi; asam apa amkhamtsünso chikü apa lülomsan!

²¹Yirusalem nai noitsün APAOU, Zion nai lülomsan. APAOU lülomsan!