Read Khiamniungan Naga Nianlom Jih 139 Bible Online

Nianlom Jih 139 - Khiamniungan Naga bible

Nianlom Jih 139

¹APAOU, ni ngü tü yam naiuso ni ngü ngen.

²Ngo chhisiyatsün alum ni ngeji; laiukü jetekü lüko jü mongyang chikü ni ngeji.

³Ngü chhi nai noi lüko tsüdekünai aalokü noi lüko; ngü chhitsün chikü ni ngeji.

⁴Ngo mosingiokü aita, ngo ti ngioau noin nung ni ngeankü noin.

⁵Ni ngü apemai lemjeikü noin; a-oukong nou ni ngü kipsanji.

⁶Ni ngü ngelatsün jü thaiutha thatü aokü noin; nung ngü ngelaau tsüshiokü tsokkü noin.

⁷Ni ainou ngo tiai pamloau shio-e? Tsüdekünai akhako nou ngü tiai khuao shio-e?

⁸Ngo aün ai sung lüko, ni nungai noin; ngo eantsün goumchi nai noi lüko, ni nungai noin.

⁹Ngo ajepek yankü jeikü khuwan lüko, tsüdekünai ajenap alaiuting athang nai kih-an lüko,

¹⁰nungai lüko apha nou ngü niakei-e, nungai lüko ni ngü hachu-e.

¹¹Anyakhem nou tü ngü asolo ta sang lüko tsüdekünai ngü lemkü noitsün awon nou asoh au iula lüko athaiutha to anyakhem nou tsünyakhemji,

¹²naiuso asoh nou anyi lilu awonkü noin. Athaiutha to asoh anyi nou wekülu noin.

¹³Jü oujei apem ni sheitho; jünyiu thaimongai ni ngo yachukan-i.

¹⁴Ngo ni lomsanji tiautenai ni ahatau naiuso athanga au tsak noin; achhisiya chikü athanga noin. Ngo nung jü mong chikü nou ngeji.

¹⁵Tilai ngo jü nyiu thaimongai ou nouso jei-ekü kamshikü yachukan, naiuso tilai ngo nungko tsangpokkü shechukankü noiküla, ngo nungko noin ta ni ngekü noiküla.

¹⁶Ngo mochetkün khako ni ngü epkü noiküla. Nungso alum moyalokün khako ngü hau thatkiutsün ajekhaiu nouso chikü athsam nai sattaiuwankü noiküla.

¹⁷O Goa, amongyang nouso jü thaiutha titi chaiou; nungso kamsan nai titi thatso songkü noin!

¹⁸Ngo nungso tü welunai, nungso singtso ta piakü noi-e. Tilai ngo chungeji, ngo nikolu noin.

¹⁹O Goa, tsümeikünso ni loatkü wanan aoya ta ngo yangji! Angem losantsün khaiuniahoi nou ngo ainou pungeani-au yangji!

²⁰Ngüsoüh athaiutha akausai chiteji; ngüso anian thako tsümeikün singioji.

²¹O APAOU, ni chinyantsünso tü ngo lüko thsüokü chinyanji! Ni lochi lotsaokü khengshitsünso ngo tsüchinyane süne!

²²Ngo ngüso tü thumkü chinyanji; ngo ngüso jü ehoi ta wesankü yangji.

²³O Goa, ngü tü ayam, naiuso jümongyang angelou; ngü tü athelu, naiuso jümongyang angesan.

²⁴Ngü da tso tsümeikü noi naito ayamsan; naiuso athontsüyangkün yamai ngü aniakei.