Read Khiamniungan Naga Nianlom Jih 141 Bible Online

Nianlom Jih 141 - Khiamniungan Naga bible

Nianlom Jih 141

¹APAOU, ngo ni tü jonji; lo ngü ahachu! Tilai ngo ni tü jone nungai ngü tü anglu.

²Angannyam nyamtsünli jü misao, jü pha loksantsün nung ahsham aloat chaithio tsakli alou.

³APAOU, jü sonai ehü tsak ataiukiu, jü sonkou ko ehükü ajim.

⁴Tsüthakü chhi au mongchiotsün ainou ngü lolaokü ataiu naiuso tsümeikün khaiuniahoi ko tsümeikün chhi nai haau noitsün ainou alolao. Ngü hau ngüso sümai nouko tilaitso haoson lalo-i.

⁵Khaiunia amei tsaküh atsüojin nou lohatkü thutau shiom, lüko tsümeikün khaiuniahoi ainou tilaitso ngo asuhat tsülou-e; tiautenai ngo ngüso tsümeikün chhisiya thako asaita misaoji.

⁶Tilai nokshinghoi nouso saliankü lochi lotsao-e, khaiuniahoi nou jüngio nouso ngiotsüo ta yangshi-e.

⁷Pai nou lopek küta nelangkü wap paitsün khekkü, nungti ngüso ou nouso etam thon nouso ai pengpune.

⁸Lüko ngo ni da amonglam taiuji, jü APAOU Nokpao. Ngo sojei-iau yamji; ngü la wanan!

⁹Ngüsoüh jü thaiutha jin jintaiutsün ainou, naiuso tsümeikü chhisiya yamai taitsün ainou, ngo kipsankü ataiukiu.

¹⁰Ngo tsütawaikü thakhu nai tsümeikünso ngüso meshen jin nai lümonani.