Read Khiamniungan Naga Nianlom Jih 145 Bible Online

Nianlom Jih 145 - Khiamniungan Naga bible

Nianlom Jih 145

¹Ngo ni songtsün wepenge, jü Goa naiuso nokpao; naiuso ngo ni hau athontsüyangkü nianlom kiu-e.

²Ajekhaiu pungkü ngo ni hau nianlom kiu-e; naiuso ngo ni athontsüyangkü lomsane.

³APAOU to asong noin naiuso thatü tsokkü lomsanau noin; naiuso apa songtsün nou ngelakhemao tsüshio.

⁴Achhi thaiutha vetao tsak ainou vetao tsak saokü lomsane; naiuso ngüsoüh ni nou akongting chhi nouso wepenge.

⁵Ngüsoüh ni nou ajinka naiuso asong thaiutha chite-e, naiuso ngo ni nou athanga chhi nouso da aokü yanglu-e.

⁶Khaiuniahoi nou ni nou akongting chhi nouso thaiutha chite-e, naiuso ngo ni songtsün wepenge.

⁷Ngüsoüh ni meitsün chikü thaiutha chite-e naiuso ni atsüojinyang thaiutha jih jih-e.

⁸APAOU nouto atsüojin naiuso atsüojinyang noin, amongmat sungtsün yamlukü naiuso asai atsüojin nou miankü noin.

⁹Apa apem ko meikü noin naiuso apaüh shantsün chikü khako atsüojinyang noin.

¹⁰APAOU, ni shantsün aathso chikü nou ni lomsane, naiuso akhaiuniaso chikü nou ni hau nianlom kiu-e.

¹¹Ngüsoüh anokpao oukong ajinka thaiutha chite-e naiuso a-oukong thaiutha chite-e,

¹²nungaito khaiunia pungkü nou a-oukong chhi nouso naiuso a-oukong ajinka nokshing nou nge-e.

¹³Anokshing athontsüyangkü noin, naiuso ni asaichi nokpao noin. APAOU nou apa athalou nouso da mongkiuji, naiuso apa chhi chiküko apa da atsüojinyang noin.

¹⁴Sauhai angja nai noin apaüh hachuji; sauhai saliankü noin apaüh tenthsaji.

¹⁵Aa kihtsün chikü nou ni tü ayangtaiukü thapji, naiuso atao tongtü nai ni ngüso hau eheshiu kiuji.

¹⁶Ni ngüso hau saiukü kiuji naiuso apotsünso chikü mongtsamiji.

¹⁷APAOU nou apa chhi chikü nai asio naiuso atsüojinyang noin.

¹⁸Sauhaiüh apa jonji ngüso dongko apa shimkü noin, naiuso sauhaiüh ngiotsüo nai jonji apa ngüso dongko shimkü noin.

¹⁹Sauhaiüh apa asuhatji ngüso potsünko apaüh kiuji; ngüsoüh wetsün apaüh lulaji naiuso ngüso kipsanji.

²⁰Sauhaiüh apa da tsüojinji ngüso apaüh juosankü taiuji; lüko apaüh tsümeikünso chikü lomowane.

²¹Ngo APAOU nou asaita lomsane; naiuso aathso chikü nou apa asio nian asaita lülomsan.