Read Khiamniungan Naga Nianlom Jih 147 Bible Online

Nianlom Jih 147 - Khiamniungan Naga bible

Nianlom Jih 147

¹APAOU nou lülomsan! Sam Goa tü alomsan jih jihlutau amei noin; apa lomsanau amei naiuso ayam thakü noin.

²APAOU nou Yirusalem müjam shanshiji; me goh ai kanlükhunkü noitsünso apaüh niakamshiji.

³Apaüh alothe mongpem nouso lomeishiji naiuso ngüso mou nouso kekiuji.

⁴Apaüh kianthsüo nouso haove thasankiuji naiuso nung pungkü hau nian jonkiuji.

⁵Asong naiuso akong nou sam Goa noin; apa mongthat mongsai athatau tsüshioji.

⁶Anyaploutsünso apaüh loktsutji, lüko tsümeikünso to goh ai tenthiowanji.

⁷Alomsan jih nouso APAOU tü lüjih; sam Goa tü kokiang nai jih lüjih.

⁸Apaüh maou nai thengmia nouso sapengji; apaüh goh hau ah-ou kiuji küta king nouso chiai khengliu nouso samsaniji.

⁹Apaüh thainianhoi hau ngüso eheshiu kiuji naiuso mükhothso nouso hau asaotsün taoko eheshiu kiuji.

¹⁰Mokthso akongting nouso da apa mong lengtsün tsünoi, tsüdekünai mongnyan süpai nouso da apa monglengtsün tsünoi;

¹¹lüko sauhaiüh apa da asuhatji naiuso apa atsüojin da niolutji ngüso da apa mong lengtsün noin.

¹²APAOU nou lülomsan, O Yirusalem! A Goa lülomsan, O Zion!

¹³Apaüh a-bekhan nouso mongkü taiuji; apaüh akhaiuniaso ouk kiuji.

¹⁴Apaüh a-elung nouso kipsankü taiuji naiuso jinyak ameiting nou ni mongtsamiji.

¹⁵Goumchi ta apaüh athoilut tsak kiuji, naiuso apaüh ti ngioji nung liukü chhi-anji.

¹⁶Apaüh nyin nou neseem tsak khekkü sapengji naiuso nyin sun nouso pukhao khekkü sukpengji.

¹⁷Singtso sun khekkü apaüh san nou sao-iji; apaüh hongtsün chong nung sauühtso jeilo-au tsüshioji.

¹⁸Apaüh ngiokhem tsak kiuji, naiuso nung nyin nouso khiamanji; apaüh ahsheih nou hongji, küta khiam nou tsangji.

¹⁹Apaüh apa ngiongem apa khaiuniaso hau kiuji, apa ayamhan naiuso ngiokhem nouso Israel hau kiuji.

²⁰Apaüh nung amao mele nouso thaiutha tsüchhiji; ngüsoüh apa ngiokhem nouso tsünge. APAOU nou lülomsan!