Read Khiamniungan Naga Nianlom Jih 18 Bible Online

Nianlom Jih 18 - Khiamniungan Naga bible

Nianlom Jih 18

¹Ngo ni tsüojinji, APAOU! Ni jü akiulotsün noin.

²APAOU jü akiplotsün noin; apa jü akongting lungpe. Jü Goa jü akiplotsün noin, apa hanai ngo aalukü noiji. Apaüh ngü shikhao tsaküh kiulotsün khekkü kiuloji; apaüh ngü kiuloji naiuso kipsankü taiuji.

³Ngo APAOU tü jonji, naiuso apaüh ngü jü ehso ainou kipsanji. APAOU lülom!

⁴Ee ahat nou ngü lemjeikü noiküla; naiuso alotheantsün khiampek nou jüchiai tsangkü khu.

⁵Ee ahat nou ngü lemjeikü noiküla, naiuso etamkhan nou jü thaiutha jin nou jintaiukiu.

⁶Jü angja nai ngo APAOU tü jon; Ngo jü Goa tü ahachu thaiutha jon. Apaüh apa amkham tsam ainou jüsangh lula; ahachu thaiutha ngü wetsün tü apaüh ang.

⁷Nungai goumchi nou ngaongao naiuso saiusaiu king athanya nouso saiusaiu naiuso lemlem, tiautenai Goa mongmat sungkü noiküla.

⁸Apa ngankhan nouso ainou inkhao nou sungh apa son ainou innyai naiuso hengkü noitsün inkaio nou shi.

⁹Apaüh maou nouso chipek küta saom naiuso apa hok khemko thengmia anyaching noiküla.

¹⁰Apa akoi potsün thainian tsak chiai liukü jeikü khu; apa ahsheih ekok chiai jeikü khu.

¹¹Apaüh apa pem anyakhem nou lopoklo, khiam nou meankü noitsün thengmia ateitham nou apa lemkü lopokkü noiküla.

¹²Apa khako ahsalap ainou san naiuso innyai nou sungh, naiuso nung thengmiakhao ateitham nou thsatkü sao.

¹³Nungai maou ainou APAOU nou ahmokli ngem; naiuso Akhengting ün sangh lula.

¹⁴Apaüh apa uokopchon nouso kop küta apa ehso pengpunani-iu; apaüh ngüso ahsalap laptsün nou khupengan-i.

¹⁵APAOU, tilai ni a-ehso tü thut, naiuso amongmat nai ngüso tü ngaokü noiküla, nungai khiamnokthan nou naiuso goumchi athanya nou akeng iulakü ep.

¹⁶APAOU nou khütha ainou apa pha tsad-i, naiuso apaüh ngü da thalou; apaüh ngü khiam aouting ainou tensan.

¹⁷Apaüh ngü jü akongting nouso ainou, naiuso ngütü chinyantsünso chikü ainou kipsan — ngüso jü thaiutha thatü kongkü noiküla.

¹⁸Tilai ngo angja nai noiküla, ngüsoüh ngü da pha po, lüko APAOU nou ngü kiplom.

¹⁹Apaüh ngü angja ainou hasan; apaüh ngü kipsan, tiautenai apa ngüko mong lengkü noiküla.

²⁰APAOU nou ngü hau amai kiuji tiautenai ngo ayamtha nou chhiji; apaüh ngü oukkiuji tiautenai ngo aphio tsünoi.

²¹Ngo APAOU ün ngiokhem angio angiu; Ngo jü Goa ainou phoklekü tsükhuwan.

²²Ngo apa ngiokhem nouso apem kankei-iu; Ngo apaüh thoiluttsünso angio tsüangkü tsünoi.

²³Ngo aphio tsünoi ta apaüh ngeji, ngo tsüthakü chhitsün ainou jü chija thatsamlou-iu.

²⁴Nungtiphe apaüh ngü hau amai kiuji naiuso ngo ayamtha nou chhiji; naiuso apaüh ngo aphio tsünoi ta ngeji.

²⁵O APAOU, sauhai niko saitha noiji ngüsoko ni lüko saitha noiji; Aphio tsüleptingkünsoko ni thumkü mei-anji.

²⁶Asangling khaiunia nouso tü ni achija sanglingkü hanji, lüko akausai khaiunia nouso tü ni tsaoji.

²⁷Sauhai nyaplokü noin ni ngüso kipsanji, lüko ni abülom nouso lonyapji.

²⁸O APAOU, ni ngü hau awon kiuji; ni jü anyakhem nouso koman kiuji.

²⁹Ni ngü hau jü ehso tü poau oukong kiuji naiuso ngüso shioloau oukong nou kiuji.

³⁰Nung Goa nou Apa chhisiyaso titi ahaopung noin! Apa ngio nouso titi monglamau meikü! Apa asolo yamtsünso chikü thaiutha apa shikhao tsak khekkü noin.

³¹APAOU lu Goa noin; Sam kiulotsün Goa Apalu noin.

³²Ngü kongitsün Goa apa noin, apaüh jüyam aalokü shankiuji.

³³Apaüh ngo jinchai tsak khekkü tsakeiau shio-iji; naiuso apaüh ngü king nai mongkü tsa-iji.

³⁴Uokoppai akongting nou ngü kankei monau, apaüh ngü tü ehli-iau tsandekü chimji.

³⁵O APAOU, ni ngü solokü kipsanji; ni paotsangtsün nou ngü songkü shankium, naiuso aoukongüh ngü kipsankü taiukium.

³⁶Ngü thalowanau nou ni lolaokiu, naiuso ngo tilaitso tsüsalian-i.

³⁷Ngo jü ehso tü kom naiuso ngüso thalou; Ngo ngüso molomokün lektso ngo tsülao-e.

³⁸Ngo ngüso shioat, naiuso ngüso tsütsashi; ngüso jükhako shioheankü noian.

³⁹Ehli thaiutha ngü hau oukong naiuso jü ehso khako ashiolotsün kiuji.

⁴⁰Ni jü ehso ngü ainou khulükhun-i; naiuso ngü tü chinyantsünso ngo lomokü wan.

⁴¹Ngüsoüh ahachu thaiutha wekü jonji, lüko ngüso sauüh tsükipsan; ngüsoüh APAOU tü jonji, lüko apaüh tsüthala.

⁴²Nungai ngo ngüso da ahsheih nou shiplükhuntsün pukhaoli iulakü thione-an. Yamkheng nai puchetli ngüso tü ngo ngamkei.

⁴³Akhengshitsün khaiuniahoi ainou ni ngü kipsan naiuso mele nouso khako nokpao au shankiu; ngo tsüngekün khaiunia nouso lo jü khaiunia au iula-iu.

⁴⁴Gohmao khaiunia nousoüh jü khako kauji, tilai ngüsoüh jüsang lulaji, ngüsoüh angio angji.

⁴⁵Ngüso mong tsüsongshikü ngüso lungpe ainou ngaongaokü shiji.

⁴⁶APAOU aa noin! Jü akiulotsün lülom! Ngü kipsantsün Goa asong thaiutha lüwepeng.

⁴⁷Apaüh jü ehso khako ngü hau ashiolotsün kiuji; apaüh mele nouso jükhemko taiukiuji

⁴⁸naiuso jü ehso ainou ngü kipsanji. O APAOU, ni jü ehso khako ngü hau ashiolo nou kiuji naiuso shelam khaiuniahoi ainou ngü solokiuji.

⁴⁹Nungtiphe ngo ni mele nouso ongko lomsanji; ngo ni tü nianlom jih hangji.

⁵⁰Apa nokpao hau Goa nou ashiolotsün asong kiuji; naiuso apaüh tsomkiukü chosantsün David naiuso apa thsaosithsoso tü apaüh atsüojinyang athontsüyangkü hanji.