Read Khiamniungan Naga Nianlom Jih 22 Bible Online

Nianlom Jih 22 - Khiamniungan Naga bible

Nianlom Jih 22

¹Jü Goa, jü Goa, tiauta ni ngü wanji? Ahachu thaiutha ngo liukü jonküla, lüko lo saokü nung ahachu tsüep.

²Jü Goa, anyi taoko ngo ni jonji, lüko ni tsüthala; asoh lüko wekü jonji, lüko aalu tsüepji.

³Lüko ni Asio Tsak, Israelüh lomsantsün nokpao noikham nai noin.

⁴Sam paosiposoüh ngüso amonglam ni da taiuküla, Ngüsoüh ni da monglam, naiuso ni ngüso kipsankü noiküla.

⁵Ngüsoüh ni tü jon naiuso angja ainou thakhu; ngüsoüh ni da monglam, naiuso ngüso tsüsappat.

⁶Lüko ngo suong tsak; khaiunia tsüde, khaiunia pungkü nou chinyanji naiuso lotsaoji.

⁷Ngü eptsün chikü nou ngü lotsaokü nyaikiuji; ngüsoüh ngüso lei chinshiji naiuso ngüso khaiu ta mounji.

⁸Ngüsoüh ngioji, “Ni APAOU da monglamkü noiküla. Nungaito apaüh ni tiauta tsükipsan? APAOU nou ni da mongleng naito, apaüh ni tiauta tsühachuji?”

⁹Ngü aalokü chet-itsün nung ni noiküla, naiuso tilai ngo nionyaothso noiküla, ni ngü kipsankü taiukiu.

¹⁰Ngo chettsün ajekhaiu ai yanou ngo ni da niolutkü noiküla, naiuso asaita ni jü Goa noikü shin.

¹¹Ngü ainou pungekü lanoi! Tititenai angja nou shimkü noin, naiuso ahaloau sau tsünoi.

¹²Jangtsoponghoi khekkü ngüsoüh ngü lemlowaniu, Ngüso Bashan goh ainou akongting jangtsoponghoi khekkü noin.

¹³Chongkhao naiukü ngaokeitsün khekkü ngüso son kopengji.

¹⁴Jü oukong khemaniu, goh chiai khiam tsapengantsün khekkü khemaniu. Jü oujei chikü thamaniu; jü mongpem yap khekkü khiamaniu.

¹⁵Jü aiukhan siutekü waila aniu, naiuso jülei jü koh tü yaplutaniu. Ni ngü pukhao nai ee ta wanan.

¹⁶Tsümeikün khaiuniahoi nou ngü lemkü noin; Jipin nouli ngüsoüh ngü lemlowaiu; ngüsoüh jü phasihokso ai jeiji.

¹⁷Jü O chikü epau shioji, jü ehsoüh ngüda langlutkü thapji.

¹⁸Jü neshe thaiutha ngüso lomji naiuso nungso ngüso mongko janeloji.

¹⁹O APAOU, ngü ainou pungekü lanoi! Liukü shiküta ngü ahalou!

²⁰Sahlaiu ainou ngü akipsan; nung ji nouso khako jü aa akipsan.

²¹Nung chongkhao nouso ainou ngü ahalou; nung tsüthamekün jangtsopong nouso khako ngo titi tsüthe.

²²Ngo jü khaiuniaso hau ni chhitsün chite-e; Ngüso kam nai ngo ni lomsane:

²³“Asam APAOU yathsüotsünso, apa lülomsan! Asam Yakob thsaosithsoso, apa hau Asuhat lükiu! Asam Israel khaiunia chikü, apa Lü am!

²⁴Apaüh angja hai da tsüthapkü tsüwanji tsüdekünai ngüso omhetsün tsüluwanji. Apa ngüso ainou tsüsalükhunji, lüko ngüsoüh ahachu thaiutha jonnai apaüh thalaji.”

²⁵Hoikam achingteng nouko ni chhitsün thaiutha ngü ni lomsane; ni amkhamtsünso khako ngo thaloukütaiutsün aloat chaithio nou kiu-e.

²⁶Aangja khaiuniahoi nou mongchiothasangkü heshiu-e; APAOU dongai shitsünsoüh apa lomsane. Ngüso asaita tsüomeikü lünoi-i!

²⁷Mele apemüh APAOU nou yangshi-e. Goumchi aniokun pungkü ainou apa dongai phokle-e; naiuso mele kau chikü nou apa ta amkhame.

²⁸APAOU nou nokpao noin, naiuso mele nouso khako apaüh nokshingji.

²⁹Abülom khaiunia chikü nou apa khako kauthio-e; khaiuniathso chikü nou apa khako kauthio-e.

³⁰Ashiau vetao ta khaiuniahoi nou APAOU thaiutha chite-e.

³¹Khaiunia loüh mochetkü noitsünso ta: “APAOU nou apa khaiuniaso kipsankü shin, ta chite-e.”