Read Khiamniungan Naga Nianlom Jih 25 Bible Online

Nianlom Jih 25 - Khiamniungan Naga bible

Nianlom Jih 25

¹O APAOU, ngo adongai jü misao hongji;

²Jü Goa, ni da ngo monglamji. Tsüshiohetsün amiam ainou ngü akipsan; Jü khako jü ehso lakoihe-i!

³Ni da amonglam taiutsünso to tsüshiolotsün amiam tsüeppe, lüko ni da khengshitsünso dongai shiji.

⁴O APAOU, ni nou yam nouso ngü hau-atsande; nungso ngü hau atsandeha.

⁵Ni nou ngiotsüo tsangkü kih au ngü hau atsande, tititenai ngü kipsantsün ni jü Goa noin. Ngo ni da asai amonglam taium.

⁶O APAOU, ni nou atsüojinyang naiuso asai tsüojintsün ni pe aita hankü shitsünso ayangsan.

⁷Jü oumtao angei naiuso aphio nouso awankiu. Ni asai tsüojintsün naiuso ameitsün nouko ngo ayangsan O APAOU!

⁸Tiautenai APAOU asio naiuso amei noiphe, apaüh angei khaiuniahoi hau ngüso tsakeiau nou yam hanji.

⁹Apaüh atsamlotsünso yam atha nai niaji naiuso ngüso tü apa mongchiotsün tsandeji.

¹⁰Sauhaiüh APAOU athalou-etsün naiuso athoilut nouso kankeiji ngüso amongkiu naiuso atsüojin nai Apaüh niaji.

¹¹Ni thaloutsün akankei, O APAOU, naiuso jü angei nouso awankiu, tititenai nungso piakü noin.

¹²Sauhaiüh APAOU lon hatji, ngüsoüh tisübao yam cholo-e nung APAOU nou hane.

¹³Ngüso to asai tsüomeikü noi-e, naiuso ngüso thsosoüh goumchi tengkam kame.

¹⁴Sauhaiüh apa ngio angji APAOU ngüso paiu noin naiuso apaüh ngüso ko athalou-etsün lomongji.

¹⁵Atao chikü nai ahachu thaiutha ngo APAOU tü taiuji, naiuso apaüh ngü angja ainou kipsanji.

¹⁶APAOU, ni jüdongai aphokle, naiuso ngü tü atsüojinyang anoi, tiautenai ngo aodangkü tsaosilao noin.

¹⁷Jü mongyangpia ainou ngü aalokiu naiuso jü angja chikü ainou ngü akipsan.

¹⁸Ngü yangelattsün naiuso omhetsün thaiutha ayanglukiu naiuso jü angei chikü awankiu.

¹⁹Ngü da eh tititso noin, athaplu; ngüsoüh ngü tititso chinyanji, athaplu.

²⁰Ngü akiplo naiuso akipsan; Ngü lashiohean-i, Ngo akipsanau thaiutha adongai shiji.

²¹Ngü da suntsün amei nou naiuso saitha saisile nou ngü ajousan tiautenai ngo ni da amonglam taium.

²²O Goa, ngüso angja chikü ainou, akhaiunia Israel akipsan!