Read Khiamniungan Naga Nianlom Jih 30 Bible Online

Nianlom Jih 30 - Khiamniungan Naga bible

Nianlom Jih 30

¹Ngo ni lomsanji APAOU, tiautenai ni ngü kipsan. Naiuso jü ehso jü khako tsükoihe-ikü wan.

²O APAOU, jü Goa, Ngo ni tü ahachu thaiutha wekü jon, naiuso ni ngü lomeikiu;

³ni ngü etamkhan ainou kipsan, Ngo ee khan ai napau noiküla, lüko ni jü aa nou laokiushin.

⁴APAOU tü alomsan jih lühang, asam apa da amonglam taiutsün khaiuniahoi chikü! Asio Goa nou ti chhin nung lüyangsan, naiuso apa hau nianlom lükiu!

⁵Apa amongmat atao jam thaiuthalu noiji, apa amei to asai thaiutha noiji. Asoh to shapau shiom, lüko ahom to amongling shiji.

⁶Ngo aalokü noin ta yangküta ngü jü chija ngiom, “ngo tilaitso tsüshiohe-i-e.”

⁷APAOU, ni ngü ko meikü noiküla; king tsok nou khekkü ni ngü sojeikiu. Lüko ni ngü ainou paman, naiuso ngo hatkü noiküla.

⁸APAOU, ngo ni ta jon; Ni ahachu thaiutha ngo koja:

⁹“Ngü eantsün tsangkü ni ti alesan eppe? Ngü ekhan ai khutsünko ti alesan noin? Ean khaiunia nousoüh ni lomsanau shio-e süne? Ni meitsün ngüsoüh wepengau shio-e süne?

¹⁰Ngü tü anglu, APAOU, naiuso ngü da atsüojinyang anoi! APAOU, ngü ahachu!”

¹¹Ni jü mongsaiutsün amongling jihang tsak hau li-e kium; ni jü mongkia wankiukü amongling nou ngü lemjeikium.

¹²Nungtiphe ngo tsamkü tsünoi-e; ngo ni tü alomsan jih nou jih-e. APAOU, ni jü Goa noin, Ngo ni hau athontsüyangkün nianlom kiu-e.