Read Khiamniungan Naga Nianlom Jih 31 Bible Online

Nianlom Jih 31 - Khiamniungan Naga bible

Nianlom Jih 31

¹Asoloau thaiutha ngo adongai shiji APAOU; tilaitso ngü lashiohean-i. Ni asio Goa noin; ngü akipsan ta, ngo misaoji!

²Jü sang alula! ngo lo akipsan! Ni ngü soluau lung, naiuso akipsanau akongting pe tsak athe.

³Tiautenai ni ngo khuluttsün, naiuso solotsün noin; ni thaloutsünli jüyam ahan naiuso ania.

⁴Ngü moniau ngüsoüh jintaiutsün ainou ngü akipsan; angja ainou ngü asolo.

⁵Ngo jüpem, aphamongai taiukiuji Ni ngü kipsane APAOU; ni amonglamau nou Goa noin.

⁶Tsüthakü nou goa nouso amtsünso ni chinyanji, lüko ngo Ni da monglamji.

⁷Ni asai tsüojintsün shioko monglinge naiuso koiate. Ni ngü omhetsün epji; naiuso jü angja ngeji.

⁸Ni jü ehso hau ngü tsüthalouwan-i; naiuso ngo mongchiotsün nai ni ngo khuao sopkiu.

⁹Ngü hau atsüojinyang ahan, APAOU, tititenai ngo angja nai noin; thsüokü shaptsün nou jü niovei kiakü ngo tanatkü noin.

¹⁰Ngo amongsaiu nou tankü noin, naiuso ashaptsün nou jü aakilaiu loletiu. Jü aangja shioko ngo outsükongshi; jü uo saokü nyomanji.

¹¹Jü ehso chikü, mothikü, jü phaosiposoüh ngü awesan tsünoi; sauhaiüh ngü ngeji ngüso ngülon hatji; tilai ngüsoüh ngü sonkeng nai eppe, ngüso jingkü khuwanji.

¹²Ngo eaniuli, khaiunia pungkü nou ngü beaniu; Ngo tsütheshikü yakkantsün jengtsaiu khekkü iula-iu.

¹³Jü ehoi piakü nou sangkaokü chitetsün ngo lulaji, ngü lemkü ahatau jije noin. Ngüsoüh ngü tü mongkiaji, naiuso ngo loatau thatsanji.

¹⁴Lüko jü amonglam ni da taim, O APAOU; ni jü Goa noin.

¹⁵Ngo asaita ni paotsangtsün nai noin; jü ehso sauhaiüh ngü angja-iji nungso ainou ngü akipsan.

¹⁶Ni atsüojinyang nou ni yathsüotsün ta athap; ni tsüojintsün nai ngü akipsan.

¹⁷Ngo ni ta jonji, APAOU; Ngü lamiamat-i. Akausai nouso lümiam-i; ngüso eantsün goumchi nai nyankü lüsaowan-i.

¹⁸Asio khaiuniahoi thako bülomkü naiuso lochilotsaokü chitetsünso chikü losangkü awan.

¹⁹Ni hau asuhat kiutsünso thaiutha ni haoson amei taiukiu nouso titi athanga noin. Ni titi amei, ni da amonglam taiutsünso ni titi sojeikiuji nung khaiunia pungkü nou ngeji.

²⁰Khaiuniahoi akausai athattaiu ainou adongko ni ngüso solo-iji; ngüso ehso alochi lotsao ainou ni ngüso aalokü sojeiji.

²¹APAOU lülomsan! Tiautenai jü ehsoüh ngo lemlokü pha potsün taoko jü thaiutha apaüh atsüojin athanga han.

²²Apaüh ngü Apa dong ainou komaniu, ta ngo hatkü yangkü noiküla. Lüko tilai ngo apa tü ahachu thaiutha jon apaüh ngü wetsün lula.

²³Asam asio khaiuniahoi chikü nou APAOU nou lütsüojin. APAOU nou amonglamhoi nouso kipsankü taiuji, lüko abülom nouso hau ngüsoüh epau maikü angja kiuji.

²⁴Asam APAOU da ayangtaiu noi nouso, oulükong, naiuso mongnyankü lüthe.