Read Khiamniungan Naga Nianlom Jih 32 Bible Online

Nianlom Jih 32 - Khiamniungan Naga bible

Nianlom Jih 32

¹Sauhai angei wankiuwaniu, naiuso sauhai aphio nouso wankiuwaniu nungso thaiumei.

²Sau hau APAOU nou aphio tsükiu naiuso sau akausai chikü ainou thakhukü noin nung khaiunia nou thaiumei.

³Tilai ngo jü angei nouso tsüphekkankü noila, ngo ajekhaiu thum shaptsün shioko uochankü iula.

⁴Anyih si asoh chikü ni ngü angja-in, APAOU; ahsaiu ahlam tsangkü ah-paithsao nou waikü iulatsünli, jü oukong apem khemaniu.

⁵Nungailu ngo jü angei nouso ni hau phekkium; jü chhisiya aphio nouso ngo tsütsangtaiu. Ngo nungso ni hau phekkiuau thaloukü noiküla, naiuso ni jü angei chikü wankium.

⁶Nungtiphe apotsün atao chikü nouko ni tü monglamtsün khaiuniahoi nou nitü misaoau noin; angja khiamthe asong tsak shinapnai, nungüh ngüso tsüshi sao-e.

⁷Ni jü asolotsün athang noin; ni ngü angja ainou kipsane. Ni nou akipsantsün ngo sang asong nou jihji, tiautenai ni ngü kiploji.

⁸APAOU nou ngioji, “Ni khuao nou yam ngo ni hau tsande-e; ngo ni hau yam hane naiuso lotsüo-e.

⁹Ni mongyang tsünoikün mokthso tsüdekünai gado tsak khekkü lathe, tiautenai nung thameloau sonkhiang auo noulu thakipji.”,

¹⁰Akausaihai to angja omheaulu, lüko sauhaiüh APAOU da monglamji ngüso to apa atsüojin nou kiplokü taiuji.

¹¹Asam asio nouso APAOU nou ti chhin nung thaiutha lümongling naiuso lükoi. Asam apa ngio angtsünso, amongling nou lüwe!