Read Khiamniungan Naga Nianlom Jih 35 Bible Online

Nianlom Jih 35 - Khiamniungan Naga bible

Nianlom Jih 35

¹APAOU, sauhai ngüko khengeji, ni ngüso ko lükhenge, naiuso sauhai ngü thako li-eji, ni ngüso thako lüli-e!

²Shikhao naiuso ni nou ehli shitho lütholou naiuso ngü haloau ashi.

³Ngü tü kumkeitsünso thako alai naiuso ni ün ou aloksan. Ni ngü kipsane ta athalou.

⁴Sauhaiüh ngü loatau koweji ngüso shioloküta lomiamkü awanan! Ngü thako sauhaiüh mongthat tsümeikü thatji Ngüso henyikü laokü akhuwan-i!

⁵Ngüso APAOU honghoi nou kumkeitsün taoko ahsheih nou shipkü khutsün tsokap khekkü lünoi-i!

⁶APAOU honghoi nou ngüso shiuhthiotsün taoko ngüso yam nyakhemkü naiuso nyincheikü lünoi-i!

⁷Nung thaiuthako ta ti tsünoikü ngüsoüh jü thaiutha jin jintaiukiu naiuso ngü thalouau khan aokü tsak thaiukü taiukiu.

⁸Lüko ngüsoüh mongehekün khako ngüso a-angja nou thalou-e; ngüso jinko ngüso mone naiuso lomowane!

⁹Nungai APAOU nai ngo monglingate; APAOU nou ngü kipsan shioko ngo monglinge.

¹⁰Jü mong apem nou ngo APAOU tü ngio-e, “Nungko ni khekkü tsaktso tsünoi. Ni tsaosilao nou oukong nouso ainou kipsanji, tsosilu angja nouso athangmangtsünso ainou kipsanji.”

¹¹Khaiunia tsümeikünhoi nou ngü tü khengshikü mitha kiuji naiuso ngo ti tsüngekün thaiutha ngüsoüh aloat mi lolutji.

¹²Ngüsoüh ngü hau amei liko tsümei kiushiji, naiuso ngo mongyang khemankü iulaji.

¹³Lüko tilai ngüso kiakü noiküla, ngo amongsaiu neshe tholou; Ngo jü chija tsüheshiukü noiküla; deisinio tsak tsüdekünai paiushihai

¹⁴tsak thaiutha misao kiutsün li ngo jükhaiu ngamthiokü misaokiu. Meshen nyiu thaiutha khaiunia tsak mongsaiutsünli, ngo amongsaiu nou khushikü noiküla.

¹⁵Lüko tilai ngo angja nai noiküla, ngüso chikü monglingat naiuso alochi kiuau ngü lemkü kamshi; Mesanhaiüh lüko ngü tü tsülaokü thiokei.

¹⁶Chione tsak ta lochi lotsaotsün khaiuniahoi khekkü ngüsoüh ngü tü chinyankü langlutkü thap.

¹⁷APAOU, ni tilektso thaplutkü noi-e? ngüso pha potsün ainou ngü akipsan; nung chongkhao nouso ainou jü aa akipsan!

¹⁸Nungai ngo akhaiuniaso ajeiaikam asong khako anianlome; ngüso chikü khako ngo ni lomsane.

¹⁹Ngü shioheanitsün thaiutha, yaang ngiotsün jü ehso lakoi-i. Ti thaiuthako ta tsüdekü ngü lon chinyantsünso hau jü monghentsün tü lanyailut-i.

²⁰Ngüsoüh ayam nouko ngio tsüchiteji; nunglikoto ngüsoüh nokmei tsüojintsünso thako atsüotsüde mitha in amomo shansan kiuji.

²¹“Ni ti chhin samüh epiu!” ta ngüsoüh wekü ngü hau aphio kiuji.

²²Lüko O APAOU, ni nung epiu. Nungtiphe APAOU, ni tsamkü lanoian; ni laiukü nai soikü lanoian!

²³O APAOU, ni atsalou, naiuso ngü akiplou; jü Goa, jü thaiutha koja kiuau ni atsa.

²⁴O APAOU, ni asio noin, nungtiphe ngü aphio tsünoi ta mitha akiu; jü khako jü ehso lakoihe-i.

²⁵“Samüh mongchiokü noitsünli, samüh apa tha-aniu!” ta ngüsoüh ngüso chija langio-i.

²⁶Jü omhetsün khako sauhai monglingji ngüso henyikü thumkü shiolokü awanan; sauhaiüh ngüko naito ngüso meithso ta ngioji ngüso lümiamat-i.

²⁷Sauhaiüh ngü penkiutsün epau aiuji ngüso hau amongling nou lüwe-i naiuso lunlunkü nungti lüngio-i, “APAOU titi asong noin! Apa yathsüotsün nou ashio eptsün ko apa monglingji.”

²⁸Nungai ajekhaiu thathonkü ngo ni asio nou chite-e naiuso lomsane.